Yalnix nu yalnabeyy cheen Xaa Tubka Nak
Salm kwaan mkee David.
29
Lo Xaa Tubka Nak,
gool re mandad,
gool xaa lo Xaa Tubka Nak,
nel non doo nak xaa nu nkano xaa yalngezh,
2 gool xaa lo Xaa Tubka Nak,
nel non doo nak xaa,
gool xaa lo Xaa Tubka Nak,
leen xkidoo xaa kwaan chul doo nlu.
3 Lee bos cheen Xaa Tubka Nak,
nle zee nyubi nistoo;
lee Dios xaa ngezh nle zee nzhech ngwzi;
¡Lee Xaa Tubka Nak,
nabeyy lo nistoo!
4 Lee bos cheen,
Xaa Tubka Nak,
nye doo nyubi.
Lee bos cheen,
Xaa Tubka Nak,
nle zee nyubi kwaan yalnabeyy.
5 Lee bos cheen,
Xaa Tubka Nak,
ngiich re yag sedr.
¡Ngiich Xaa Tubka Nak yag sedr cheen Líbano!
6 Nu nkun xaa yi cheen Líbano nu yi cheen Sirióna,
kwentaxa ngit beser,
xinn ngoon wen.
7 Lee bos cheen Xaa Tubka Nak,
ngobi bal ki;
8 lee bos cheen Xaa Tubka Nak nkun yizhyo bizh.
¡Lee Xaa Tubka Nak nkun yizhyo bizh cheen Cades!
9 Lee bos cheen Xaa Tubka Nak,
nkwiib re yag zin
nu nalaketra nik stub yag
nu lee leen yidoo mbezh re xaa:
“¡Gro nak xaa!”
10 Xaa Tubka Nak nak xaa nabeyy lo yey
nu tira nzob Xaa Tubka Nak kwenta rey.
11 Xaa Tubka Nak nzaa yalnabeyy lo yezh cheen xaa;
Xaa Tubka Nak nii wen xaa lo yezh cheen xaa,
zee kano xaa yalnix.