Xaa Tubka Nak nzhon re kwaan naab xaa
Salm kwaan mkee David.
28
Xaa Tubka Nak,
lo lu naab na,
lu nak ke kwaan nsaaw na.
Nalet lu mod tub xaa nanzhonta,
chelee lu nakebt lu lo na,
telise yet na,
zee gak na mod re xaa ngut.
2 Kenzha lu kwaan naab na lo lu,
gorna naab naya lo lu,
gorna lep na yaa na naz lo xkidoo lu,
pa Nambey Doo.
3 Nateedt lu na bid tubka kwaan re xaa nawent
nu re xaa kwaan nle re kwaan nakap.
Wen nii re xaa lo re wechxinn,
per lee naz leen lextoo xaa nle xaa xgab gut xaa xaa.
4 Zaa kwaan yalzo xaa lo re kwaan mle xaa
nu lo re kwaan nawent kwaan mle xaa;
zaa kwaan nzhaal yalzo xaa lo re kwaan mle xaa kwaan yaa xaa.
5 Nel nangwiit xaa lo re kwaan mdexkwaa Xaa Tubka Nak,
lo re kwaan mle xaa kwaan yaa xaa,
lee Xaa Tubka Nak,
luux xaa nu nabaretra xaa zo xaa xaa lo yizhyo.
6 ¡Wen doo nak Xaa Tubka Nak,
xaa mbin kwaan ngunii na!
7 Xaa Tubka Nak,
nak yalngezh cheen na
nu nak xaa kwenta tub lee yiib kwaan nsaaw na
nu nebse lo xaa mwii na nel lee xaa mle yud na
nu nix ngok lextoo na.
Gol na nu za na dixkix lo xaa.
8 Xaa Tubka Nak,
nak yalngezh lo re xaa,
nle xaa yud nu nkanap xaa rey,
xaa mleey xaa.
9 Ble yud yezh cheen lu
nu gunii wen lo re xaa lu,
bkanap xaa nu tubka zaa kwaan gaw xaa.