Xaa Tubka Nak, nak xni nu nak yalnaban cheen na
Salm kwaan mkee David.
27
Lee Xaa Tubka Nak,
nak xni cheen na nu yalnaban cheen na,
nik tub xaa nazhebt na ne na.
Lee Xaa Tubka Nak,
nak yalngezh cheen na
nu nik tub xaa nazhebt na ne na.
2 Lee re xaa naras nu re xaa nayii ne na mzhaal tuka,
zee kee xaaya yek na nu gaw xaa xpaal na,
per lee re xaa mdenke nu mla xaa lo yo.
3 Nixa zyen doo xaa nayii ne na nu msaaw xaa na,
per nazhebt na;
nixa tub dil gro doo zhin lo na,
nixa sbaaya per nebse lo lu wii na.
4 Tuka kwaan naab na lo Xaa Tubka Nak,
lee kwaan nzhekla na nak:
Yoo na garli Xaa Tubka Nak,
rese mbizh kwaan ban na,
zee wii na chul doo nak,
Xaa Tubka Nak,
nu kwaan na xaa leen xkyidoo xaa.
5 Lee mbizh zhin yalzi lo na,
telise kanap xaa na leen li xaa;
kaxlaan xaa na leen xkyidoo xaa
nu zob xaa na nazya yek tub ke nye nak.
6 Zee zo xaa na yara lo re xaa nayii ne na,
xaa nzo dubse welt lo na.
Kwaanzee za na gon lo xaa,
kwaan yalnix kozhe na nel nyakdoola na,
nu gol na kant lo Xaa Tubka Nak.
7 Xaa Tubka Nak,
bin kwaan nii na;
¡Bles lextoo lu ne lu na nu keb lo na!
8 Lee lextoo na né lo na:
“Kwaan,
Xaa Tubka Nak.”
Xaa Tubka Nak,
telise kwaan na lu.
9 Nakaxlaant lu lo na,
natexonnt lu na,
kwaan yalnayii cheen lu,
nel na nak xmos lu,
nebse lu nak xaa nle yud na.
Nabachit lu lo na,
nixa nalaat lu na,
nel lu nak Dios,
xaa le yud na.
10 Nixa laa xuz na na nu xnaa na na,
per lee Xaa Tubka Nak,
telise kayaa na.
11 Xaa Tubka Nak,
lu xnaz lu lo na,
be na lo naz kwaan nali,
nel nzho xaa nayii ne na.
12 Nalaat lu na lo re xaa nayii ne na,
nel zyen xaa nii kwaan nawlit lo na
nu nzhekla xaa seweey xaa na.
13 Per lee na ne wen,
lee na wii lo yalwen cheen Xaa Tubka Nak,
lo yizhyo ne.
14 Blaz lo Xaa Tubka Nak;
zee gak nye lu nu nix gak lextoo lu
¡Aja,
blaz lo Xaa Tubka Nak!