Nali ngok na lo lu
Salm kwaan mkee David.
26
Xaa Tubka Nak,
naab kwent nali lo na,
nik tub kwaan nawent nyent lo na,
tubka nali ngwii na lo lu,
Xaa Tubka Nak.
2 Xaa Tubka Nak,
laach lo na nu le preb na,
¡Nu laach lo re xgab kwaan nzho yek na
nu axta pa mas nech leen lextoo na!
3 Tubka ngwii na lo yalnkela cheen lu,
nel tubka nle na re kwaan wli cheen lu.
4 Nandawt na kwaan re xaa nkade
nu nixa namzot na kwaan re xaa nkade lo re kwaan nle xaa.
5 Nanyulat na zo na pa nkasa re xaa nakap
nu nixa namzhaalt na kwaan re xaa nawent.
6 Yanag na zee gak nzhul yaa na,
snee,
Xaa Tubka Nak,
zee nzho mod bii na lo mdo cheen lu
7 nu nye doo gol na lo lu
nu yé na re kwaan gro doo,
kwaan mle lu.
8 Xaa Tubka Nak,
nkela na li lu,
pa nzho lu,
pa nzho xni cheen lu.
9 Nakiibt lu yalnaban cheen na tubka kwaan re xaa nzeb jwalt
nixa nalaat lu yet na kwaan re xaa nzhut myet,
10 yaa xaa nzho re kwaan nawent
nu yaa xaa lad li nzho demi kwaan mkayaa xaa zee nakoot xaa roo xaa.
11 Per lee na nali nzo lo lu,
bloo na lo re xaa nawent nu blesla lu ne lu na.
12 Sbaa nye nzo na lo lu Xaa Tubka Nak,
nu nii wen na lo lu pa nkasa re xaa nzholl.