Nali nabeyy rey
Salm cheen Salomón.
72
Dios,
ble zee wen naab rey kwent,
modxa naab lu kwent
nu ble zee lee xaa xgann rey nali naab kwent.
2 Lee xaa naab kwent lo yezh cheen lu tub mod nali
nu nali nabeyy xaa lo re xaa nales nzhak.
3 Lo re yi ndok zaa yalnix lo re xaa
nu lo re yi chuut wen yo xaa nali nak.
4 Snee nali nabeyy rey lo re yezh,
xaa nales nzhak
nu le xaa yud re xaa nankanot kwaan
nu taazh xaa tich re xaa nayii ne xaa.
5 Nu tubka zheb re xaa yezh ne rey,
gorna seetaka nzho mbizh nu mbee
lo tub dii nu lo stub dii.
6 Gak rey mod yey kwaan nla lo yix wen
nu mod nis gop kwaan nla garziil.
7 Re mbizh cheen xaa yo kwaan wli
nu yo zyen doo kwaan wen,
axta gorna nayotra mbee.
8 Nu nabeyy xaa lo dubse yizhyo kwaan nzho nistoo rop ta
nu nabeyy xaa axta Yuu Éufrates,
nu axta pa mas zit lo yizhyo.
9 Lo xaa kich yek rese xaa nzho lo yizhyo bizh
nu re xaa nayii ne xaa keb yide.
10 Lee rey,
xaa nabeyy Tarsis nu re xaa nabeyy re yizhyo roo nistoo zaa or lo xaa,
nu lee rey,
xaa nabeyy Sabá,
nu lee rey,
xaa nabeyy Seba selazh zyen kwaan lo xaa.
11 Rese rey kich yek delant lo xaa;
nu rese yezh ke zhiin lo xaa.
12 Lee xaa koo re xaa prob,
xaa naab yud
nu re xaa nales nzhak,
xaa nyent cho le yud.
13 Kano xaa yalnles lo re xaa prob nu lo re xaa nales nzhak;
le xaa yud re xaa prob.
14 Le xaa yud xaa lo re xaa nkade nu lo re xaa naras
nu nzak xaa non doo yalnaban cheen xaa koo xaa lo re xaa nayii ne xaa.
15 Nzhekla na ban rey zyen liin
nu zaa xaa or cheen Sabá lo xaa
nu tubka nii xaa lo Dios kwent cheen xaa,
zee tubka nii wen Dios lo xaa yizata mbizh.
16 Noka nzhekla na yo zyen doo nzhobxtil
nu gak zyen dooya yek re yi
nu lee yag xle gaka mod re yag ndok cheen Líbano
nu lee yezh yo zyen doo myet modxa nzeb yix wen lo yizhyo.
17 Nzhekla na tubka selazh xaa le xaa
nu tubka kwib xtizh xaa modxa tubka nzho mbizh.
Rese yezh lo yizhyo kayaa kwaan wen lo xaa
nu nii wen xaa lo xaa.
18 Wen doo nak Dios,
Xaa Tubka Nak,
Dios cheen xaa Israel,
nebse lee xaa nle re kwaan gro.
19 ¡Wen doo nak le xaa kwaan chul nu tira nak!
¡Dubse yizhyo wii lo xni chul cheen xaa!
¡Sbaa gaka nu sbaa gaka!
20 Nee ngulo mlux re kwaan ngunii David,
xgann Isaí lo Dios.