Yech chon
Xnaz re xaa nakap
Salm kwaan mkee Asaf.
73
¡Wlipa,
wen doo nak Dios lo re xaa Israel,
lo re xaa nzhul nak lextoo!
2 Xeepse ndenke na
nu mer ngruzh nii na,
3 nel ngok na mbidyos lo re xaa nto yalxwa
nu ngwii na zyen doo nzeyak cheen re xaa nakap.
4 Nanlet re xaa xgab yalgut,
nel wen re xaa.
5 Nandedt xaa bid mod stub naz xaa,
nixa nanket xaa zhiin mod stub naz xaa,
6 Kwaanzee lee yalxwa cheen xaa nak kwenta bga kwaan nyu yenn xaa
nu lee kwaan nakap nak kwenta xab xaa.
7 Nel rik xaa nzak xaa nzho mod le xaa rese kwaan
nu axta garlo xaa nlu nle xaa xgab re kwaan nawent.
8 Nxizhno xaa re myet nu nii xaa kwaan nawent lo xaa nu nkwaan xaa dil
nu tubka kwaan yalxwa nzhedizh xaa.
9 Kwaan roo xaa nii nawent xaa yiba
nu kwaan roo xaa nii nawent xaa yizhyo.
10 Kwaanzee rese xaa nle respet xaa
nu nik tub xaa nangwiit nawent lo xaaa.
11 Nu mbezh xaa:
“¿Xomod ne Dios kwaane?
¿Che nel nkano Xaa Nzob Naz Yiba yalnzhak?”
12 Snee nak re xaa nakap,
tira nanlet xaa xgab
nu tubka nzeyak rik re xaa.
13 ¡Wlipa,
kanxlee mle nzhul na lextoo na
nu kanxlee mle nzhul na yaa na lo re kwaan nakap!
14 Nel yizata mbizh nzaa golp xaa na
nu yizata garziil ndeed na bid.
15 Chelee na wdizh na mod nzhedizh re xaa,
zee kakade na re dii cheen xinn lu.
16 Gorna mle na xgab kwaane,
zee ne na nen xomod laya yek na,
per ngok nagan dooya lo na,
17 axta gorna ngwa na garli Dios,
zee mla yek na paro yilo zhin re xaa ne.
18 Wlipa,
le lu zee ruzh nii re xaa ne
nu sela lu xaa lo yalzi.
19 Kwenta ntiib xaa garlo xaa nu xal xaaya,
sbaa lux re xaa ne
nu lee yalnacheb yilo luux re xaa.
20 Nak kwenta tub xaa nroo mkaal lo,
Xaa Nabeyy,
gorna nyixche lu,
yii lu ne lu xaa.
21 Tira ngulo ngok ne na,
nu tira ngok ne lextoo na,
22 nel ngok na tub xaa ned nu namlata yek na;
¡nu ngok na kwenta tub ma lo lu!
23 Nixa sbaaya,
per tubka mzo na kwaan lu
nu mzen lu yaa na lad li.
24 Mzaa lu xkonsej lu lo na
nu gwluzh mle non lu na.
25 Nankanot na nik stub xaa naz yiba,
nebse lu.
Chelee na nzo na kwaan lu,
nyentra cho kwaan nzhekla na lo yizhyo.
26 Dubse na nguguuzh,
per nebse lu nak xaa kayaa na
nu nebse Dios nak xaa tubka nkanap na.
27 Wlipa,
lux re xaa nzo zit lo lu;
luux lu re xaa kwaan nlaa lu.
28 Per lee na zo gax lo Dios,
nel komba nak kwaan wen.
Nkambaz na lu,
Xaa Tubka Nak,
Xaa Nabeyy,
zee kanap lu na
nu yé na rese kwaan mle lu.