Naab xaa zee le Dios yud xaa
Salm kwaan mkee Asaf. Maskila.
74
Dios,
¿chozhiin tubka nlaa lu nu?
¿Chozhiin nayii lu ne lu re nu,
xaa nak mod mbakxiil cheen lu?
2 Selazh yezh kwaan mzi lu nzha doo mbizh,
re nu xaa mloo lu zee gak nu dii cheen lu.
Selazh Yi Jerusalén pa ngu lu.
3 Te,
wii lu lo li lu kwaan mlake;
¡xaa nayii ne lu mluux dubse li lu!
4 Re xaa nayii ne lu nkee bi garli lu;
mzob xaa xpander xaa kwaan nak nseyn,
kwaan nlu lee xaa mle gan.
5 Nak re xaa mod xaa nlep yibyag,
xaa nchoog yag re yi ndok.
6 Kwaan xkibyag xaa nu kwaan xmarti xaa,
mluux xaa re yag kwaan chul mdexkwaa xaa leen li lu.
7 Mzee xaa bal garli lu
nu axta lo yo mlebi xaaya nu sbaa namlet xaa respet pa nzho lu.
8 Naz leen lextoo xaa nzhé xaa:
“¡Tira luux be re xaa!”
¡Rese pa leen yezh mzek xaa pa nkasa nu nzholl nu lo lu,
Dios!
9 ¡Nanetra be lo xpander be;
nyentra xaa nkayaa wdizh lo Dios lo be,
nixa nyent xaa lo be,
xaa né lak liin gak kwaane!
10 Dios,
¿re xaa nayii ne lu axta cho gor naxizhnotra xaa lu?
¿Axta cho gor laa xaa nii nawent xaa lu?
11 ¿Chozhiin nanlut lu yalngezh cheen lu?
¿Chozhiin nanlut lu yalnabeyy cheen lu?
12 Xtios na,
lu nak rey cheen na axta yilo;
lu nak xaa nzaa yalnaban lo nu lo yizhyo.
13 Kwaan yalnabeyy cheen lu mlerol lu nistoo,
mluux lu yek re waz,
ma nzho leen nistoo.
14 Lu mtaazh yek Leviatánb
nu mzaa lu ma ndaw re ma yizhyo bizh.
15 Lu mle zee mroo nis yuu
nu noka mle lu zee mbizh nis yuu.
16 Xcheen lu nak zhe nu yaal;
lu mdexkwaa mbee nu mbizh.
17 Lu mdexkwaa axta paro ne yizhyo
nu mle lu nyu bayey nu nyu kwares.
18 Xaa Tubka Nak,
selazh re xaa nayii ne lu,
nu xaa nii nawent lu
nu re xaa ned,
xaa nii nawent nak lu.
19 ¡Nazaat lu nu,
xaa nak mod xngog lu lo re ma nakap!
¡Tubka nanyenlazht lu re xaa lu,
xaa prob!
20 Bselazh kwaan myaan lu,
nel dubse yizhyo nzho xaa nakap.
21 Nalet lu zee ton re xaa nales nzhak,
snee zee lee re xaa prob nu xaa nales nzhaal gool lo lu.
22 Dios,
nalaat lu le xaa gan lo lu;
selazh xomod nii nawent re xaa ned lu yizata mbizh.
23 Nanyenlazht lu bi cheen re xaa nayii ne lu,
nel re xaa nayii ne lu tubka nkee bi.