Naab xaa lo Dios zee kanap Dios xaa lo re xaa nayii ne xaa
Salm kwaan mkee David nu mzaa xaaya lo xaa nabeyy lo re xaa nzholl.
64
Dios kenzha kwaan kanii na lo lu;
kanap na nel nzheb na ne na re xaa nayii ne na.
2 Kaxlaan na lo re xgab cheen re xaa nawent nak,
re xaa nawent xaa nzhedizh xlaan na.
3 Re wdizh kwaan nroo roo xaa ndox mod kuchi,
nzhedizh xaa duzna wdizh nawent,
mod yich kwaan ne doo nyaaz.
4 Nu nzholaan xaa nseweey xaa xaa nik tub kwaan nakalet
nu nanzhebt xaa nle xaaya lo xaa nakalet xgaba.
5 Gorna nyaan xaa le xaa kwaan nawent nle xaaya
nu xlaan nyaan xaa pa zob xaa tramp
nu nle xaa xgab nyent cho neya.
6 Nle xaa xgab nyent cho ne re kwaan nawent kwaan nle xaa,
nel wen wen mle xaa xgaba
nu nyent cho nzho mod ne cho xgab nle xaa.
7 Per Dios seweey xaa kwaan xkwez xaa,
gorna nanlet xaa xgab,
zhin yalzi lo xaa.
8 Leeka roo xaa le lux xaa
nu re xaa wii lo xaa xizhno xaa.
9 Zeesi rese myet yizhyo zheb ne Dios
nu zeet xaa re kwaan mdexkwaa Dios
nu la re kwaan mle Dios yek xaa.
10 Gak nix lextoo xaa wen nak,
lo Xaa Tubka Nak,
nu tubka wii xaa lo xaa;
¡rese xaa nali nak lextoo gool lo xaa!