Wen nak Dios, xaa mdexkwaa rese kwaan
Salm nu kant kwaan mkee David, nu mzaa xaaya lo xaa nabeyy lo re xaa nzholl.
65
Dios cheen Jerusalén,
nebse lo lu nzhaal gool nu
nu nebse lo lu nzhaal le nu kwaan myaan nu.
2 Nel lu nzhon re kwaan nii nu
nu lo lu zhin rese myet.
3 Rese kwaan nawent kwaan nle nu,
nak kwaan nabeyy lo nu,
per lee lu nche rese xjwalt nu.
4 Wen xaa nkweey lu Dios
nu wee lu xaa yo xaa gax pa nzho lu,
leen yoo pa nak li lu,
nix doo gak lextoo nu,
lo re kwaan wen kwaan nzho leen yidoo cheen lu pa nambey.
5 Dios,
lu nak xaa nzaa yalnaban lo nu
nu nlu re xcheen lu kwaan nali kwaan gro doo lo nu,
lo re kwaan ndedyall nu ngwii nu lo.
Lu nak xaa kambaz re xaa dubse yizhyo
nu re xaa nzhi stub ta roo nistoo pa mas zit.
6 Kwaan yalnabeyy cheen lu mdexkwaa lu re yi,
nel ngezh doo lu.
7 Lu nsekwaaz nistoo gorna nakap nzhaka
nu nsekwaaz luya gorna nkeeya bi nu ngita
nu nle lu zee nankeet re yezh bi.
8 Kwaanzee rese xaa nzo mas zit lo yizhyo,
nzheb xaa ne xaa re kwaan gro kwaan nle lu.
Axta pa nlen mbizh nu pa nyaaz mbizh,
lu nle zee mbazhe re myet kwaan yalnix.
9 Lu nkanap yizhyo nu nzoog luya kwaan yey,
nle lu zee nzaaya zyen kwaan.
Nu nis yuu cheen Dios nle zee nxen nzhobxtil,
nel sbaa mdexkwaa luya.
10 Lu nle koob leen rey
nu nle lu zee mbaxche nis tich rey
nu kwaan nis yey nle naguuzh lu lo yo
nu nii wen lu loya nu nzaaya zyen doo kwaan.
11 Lu nle zee wen nzhak yalgon rese liin,
nu loka pa ded lu zee yizhal lu zyen doo xle,
12 Nu lee yix kwaan nzeb yizhyo bizh na naye
nu chul doo nlu re yenn lach,
13 Chul doo nlu re lach pa kayaw zyen doo mbakxiil,
chul doo nlu re lach,
nel gro doo pa nzeb nzhobxtil;
naka kwenta dubse yizhyo nzholl nu nkee bi kwaan yalnix.