Gool be lo Dios nel gro nak yalnabeyy cheen xaa
Salm nu kant kwaan mkee David nu mzaa xaaya lo xaa nabeyy lo re xaa nzholl.
66
Rese myet yizhyo,
nye bill gu lo Dios kwaan yalnix.
2 Bill gu chul nak le xaa;
bill gu kwaan yalnix lo xaa.
3 Guzh gu lo Dios:
“¡Aka gro nak re kwaan mle lu!
¡Re xaa nayii ne lu,
zheb ne yalnabeyy cheen lu,
kwaan gro doo nak!”
4 ¡Rese myet yizhyo gool lo lu
nu gool xaa kant lo lu!
{Mbaz}
5 ¡Te gu,
zee wii gu lo re kwaan mle Dios,
re kwaan gro kwaan mle Dios lo re myet!
6 Leezha mle Dios nistoo ngoka yo bizh,
leezha mded re xaa sbaasa.
¡Ngok nix doo lextoo nu ne nu xaa!
7 Kwaan yalnabeyy cheen xaa,
nabeyy xaa tira
nu wii xaa lo rese myet nu lo rese yezh,
kwaanzee re xaa ned nalet gan lo xaa.
{Mbaz}
8 ¡Gu,
xaa rese yezh,
wen nii gu lo Xtios be
nye bill gu lo xaa!
9 Nel mkanap xaa nu
nu namlaat xaa mruzh nii nu.
10 Xtios nu,
mle lu preb nu
nu mle nzhul lu nu modxa nle nzhul xaa plat.
11 Mlaa lu mla nu leen tramp;
mzhib lu re kwaan nga doo tich nu.
12 Mlaa lu mded re xaa nzob tich kabay tich nu;
mded nu lo ki nu leen nis,
per gwluzh mbe lu nu yizhyo pa nzho doo kwaan.
13 Zeeb na leen li lu kwaan gon kwaan zeek xaa lo mdo;
snee le na re kwaan myaan na lo lu,
14 re kwaan ngunii na lo lu,
re kwaan myaan na leezha kadeed na yalzi.
15 Za na gon kwaan zeek xaa lo mdo lo lu,
re ma wenra;
tuka kwaan mbakxiil mach,
ma chul nzebech zek na lo lu
nu ted na ngoon nu chib mach lo lu.
{Mbaz}
16 Rese gu xaa nzheb ne Dios,
te gu zee nii na re kwaan mle xaa lo na.
17 Kwaan roo na mrezh na xaa
nu kwaan roo na mbill na lo xaa.
18 Chol ngozhaw na re xjwalt na leen lextoo na,
nagont Xaa Nabeyy xtizh na.
19 Per wli na,
lee Dios mkenzha xtizh na
nu mbin xaa kwaan ngunii na.
20 ¡Wen doo nak Dios,
mbin xaa xtizh na
nu nkedoola xaa na!