David mle gan lo re xaa Amalek
30
Nu gorna ngok yon mbizh lee David kwaan re xaa xaa mzhin naz Siclag, nu lee re xaa Amalek msaaw dubse Neguev nu mdil xaa kwaan Siclag nu mzek xaaya. 2 Nu mbe xaa rese ngwnaa nu rese xaa nzho ba, mad win nu re xaa gol, per nik tub xaa nambita xaa nebse mbe xaa re xaa. 3 Nu gorna mzhin David kwaan re xaa xaa yezh, mwii xaa ngulola nguka nu mbe re xaa Amalek re xngwnaa xaa kwaan re xinn xaa. 4 Zee mbinn xaa nye doo nu noka mbinn re xaa mbare kwaan lee xaa, axta paro nyentra jwers goon re xaa. 5 Xaa Amalek mbe rop xngwnaa David, me le Ahinoam cheen Jezreel nu me le Abigail, me ngok xngwnaa Nabal, xaa yezh Carmel. 6 Nu mle doo xaa xgab nel nzhekla re xaa yezh zaake xaa xaa, nel nzhaal xyan doo re xaa kwent cheen re xchap xaa nu xgann xaa. Per lee Xaa Tubka Nak, xaa nak Xtios David, mzaa yalngezh lo xaa. 7 Zee nzhé David lo ngwleyy Abiatar xgann Ahimelec: "Naab na lo lu yiidno lu ler kwaan nzhak ngwleyy lo na". Zee mzaa Abiatar ler kwaan nzhak xaa lo David. 8 Zee lee David ngunii lo Xaa Tubka Nak nu nzhé xaa:—¿Che nkin ya na tich re xaa nakap ne? Nu chelee na ya na ¿che zyiga xaa lo na?
Zee lee Xaa Tubka Nak nzhé:
—Zyiga xaa lo lu, nu kiib lu rese xaa mbe xaa lo lu.
9 Zee ngwa David kwaan xoop gayoo soldad cheen xaa nu mzhin xaa roo yuu Besor. Naz baa mlaz chop gayoo xaa nel nayetra xaa ze xaa. 10 Nu lee tapgayoo xaa mye mded yuu cheen Besor.
11 Zee mzhaal xaa tub xaa Egipto naz wen, zee mbe xaa xaa lo David. Mzaa David yat ndaw xaa nu mzaa xaa nis ngu xaa. 12 Nu noka mzaa xaa tub bool ig bizh nu chop bool ub mbizh lo xaa nu ndaw xaaya. Nzhala chon mbizh nu chol yaal nik tub kwaan zer go xaa nu zer gaw xaa. Ndaw xaa nu mbare jwers cheen xaa. 13 Zee ngunabdizh David nu nzhé xaa:
—¿Cho lo nke lu zhiin lo nu pa naz nze lu?
Zee lee xaa mad xaa Egipto mkeb nu nzhé:
—Na nak xaa nke zhiin lo tub xaa Amalek, nu nzha chon mbizh nu chon yaal mlaa xaa na nee nel ne nzak na. 14 Ngwa saaw nu zyen doo pa naz Neguev nu Neguev cheen Caleb nu mzek nu Siclag.
15 Zee nzhé David:
—¿Che ze lu na paro nzhi re xaa ba?
Zee lee xaa nzhé:
—Cheroo lo na zee ne na che wli luya nu naguta lu na, nu nixa nazaat lu na lo xaa nabeyy lo na, zee we na lu lo re xaa ba.
16 Zee mbe xaa xaa. Nu gorna mzhin xaa lee re xaa mcheech rese pa kayaw nu kayo. Nyakla xaa nu kakani xaa nel mkiib xaa kwaan lo re xaa Filistea nu lo re xaa Judá. 17 Zee mdil David kwaan re xaa gorna yani yizhyo dub mbizh axta mzhel yizhyo stuba. Nu mle xaa gan lo xaa. Rese xaa mbit xaa, nebse xaa mle gan ngok tap gayoo xaa mad, xaa mxonn nzob tich kamey.
18 Zee mkiib David re kwaan mbe re xaa Amalek nu noka mkiib xaa rop xngwnaa xaa. 19 Nu rese kwaan mkano xaa mbe xaa: xaa yeen nu xaa gol, madbyi nu madnaa, rese kwaan mkiib David lo re xaa. 20 Nu mxaal David re xaa we mbakxiil nu re ngoon nu nu nzhé re xaa: "Ma ne nak ma mle David gan".
21 Nu gorna nzhin David lo chop gayoo xaa nguzha, xaa mlake roo yuu Besor, zee mkayaa re xaa David nu lee David ngunii wen lo re xaa. 22 Nu lee re xaa nakap, ngwa kwaan David nzhé: "¿Chozhiin nangwat gu kwaan re nu? Lee nal nazaat nu nik tub kwaan mkiib nu ka gu nebse be gu xngwnaa gu nu xinn gu nu zya gu." 23 Zee lee David nzhé:
—Wech na, nalet gu kwaan baa lo kwaan mza Xaa Tubka Nak lo be, nel lee xaa mle yud be zee mkiib be re kwaane. 24 Nyent cho yakla kwaan kale gu. Lala ka re xaa kwaan ngwa lo dil nu xaa kwaan mlake mkanap re kwaan.
25 Nu axta mbizh zee mlakeya ngoka ley lo re xaa Israel axta nal mbizh nalzhe.
26 Nu gorna mzhin David naz Siclag, zee mxaal xaa lak kwaan mkiib xaa lo re xaa Amalek lo xaa gol Judá, xaa nyen xaa nu nzhé xaa: "Nee za na cheep kwaan mkiib nu lo re xaa nayii ne Xaa Tubka Nak. 27 Zee mxaal xaa kwaan lo re xaa Bet-el, Ramot cheen Neguev, Jatir 28 Aroer, Sifmot, Estemoa, 29 Racal, nu re yezh cheen Jerameel nu re yezh cheen Ceneo, 30 nu lo re xaa Horma, Corasán, Atac, 31 Hebrón, nu rese stub pa mri David kwaan re xaa xaa.