David nu re xaa mbare
29
Zee lee re xaa Filistea nzhaal kwaan re xsoldad naz Afec, nu lee re xaa Israel mri roo xlen kwaan nzhib naz Jezreel. 2 Nu gorna lee re xaa non lo re xaa Filistea mzhin kwaan mil soldad nu kwaan tub gayoo soldad nu lee David kwaan re xaa xaa nzha kwaan Aquis. 3 Zee nzhé re xaa non xaa Filistea:—¿Cho kwaan kale re xaa hebreo ne?
Zee lee Aquis mkeb lo xaa non xaa Filistea:
—David mke zhiin lo rey Saúl xaa Israel.Tubka nzo xaa kwaan na tub mbizh nu stub mbizh masra tub liin nu seetaka nzo xaa kwaan na axta mbizh nalzhe. Nyent kwaan nawent mle xaa.
4 Zee lee re xaa non lo re xaa Filistea ngunayii lo xaa, nu nzhé xaa:
—Bxal xaa ne nya xaa naz yezh kwaan mzaa lu lo xaa. Nayat xaa kwaan be lo dil napa kayak xaa kwaan nayii ne be. Chelee xaa gut xaa be nu zaa yek be lo Saúl, zeesi telise zkayaa xaa xaa stuba. 5 ¿Che naleet David nak xaa nzholl re xaa Israel lo nu nke xaa briink lo, nu nzhé xaa:
"Saúl mbit tub mil xaa,
David mbit tub chii mil xaa".a
6 Zee mrezh Aquis David nu nzhé xaa lo xaa:
—Mban Xaa Tubka Nak, nzho mod yo lu kwaan nu nel axta mbizh kwaan mzhin lu lo na, nik tub kwaan nawent nanyunt lo na lo lu, per lee xaa non lo re xaa Filistea nawent ngwii xaa lo lu. 7 Bare zya nu wen nya lu, zee nawiit nawent xaa nabeyy lo re nu . Nu wen nya lu zee nagakt nawent lextoo re xaa.
8 Zee mkeb David lo Aquis:
—Xaa nabeyy na, ¿cho kwaan mle na? ¿Cho kwaan myun lo lu lo na axta gorna mzhin na lo lu nu axta nal, zee nayat na dil na kwaan re xaa nayii ne lu?
9 Zee mkeb Aquis lo David nu nzhé xaa:
—Ne na wen nak lu lo na mod tub mandad cheen Dios; per xaa nabeyy lo re xaa Filistea né lo nu: Nayiidt gu dil gu kwaan nu. 10 Lee nal, yee garziil doo ya lu kwaan re xaa kwaan nke zhin lo lu, xaa nabeyy lu lo nu gwa gu.
11 Zee garziil doo nguxche David, kwaan re xaa xaa zee nya xaa naz yizhyo cheen re xaa Filistea nu lee re xaa Filistea nzha naz Jezreel.