28
Zee lee re mbizh zee lee re xaa Filistea myaan dil kwaan re xaa Israel. Zee nzhé Aquis lo David:
—Nela lu nkin roo lu kwaan re xaa lu zee dil gu kwaan na.
2 Zee lee David mkeb lo Aquis:
—Napa ne lu xomod dil wen na, xaa nke zhiin lo lu .
Zee lee Aquis nzhé lo David:
—Lu gak xaa kanap na dubse mbizh kwaan mban na.
Saúl kwaan wezh yezh Endor
3 Nu leezha ngulo ngut Samuel nales doo ngok re xaa Israel, nu ngu sebyo xaa naz Ramá, yezh cheen xaa. Lee Saúl mtexonn re wezh nu re xaa nzhedizh kwaan xaa ngut yizhyo Israel.a
4 Zee mzhaal re xaa Filistea, nu ngwa xaa msaaw naz Sunem; zee mtoop Saúl re xaa Israel nu msaaw xaa naz Gilboa. 5 Nu gorna ngune Saúl paro mbaz re xaa Filistea, zee mzheb xaa nu ngok nales doo lextoo xaa. 6 Zee ngunaab Saúl lo Xaa Tubka Nak; per lee Xaa Tubka Nak namkebt lo xaa nu ni lo mkaal, ni kwaan Urim nu nixa lo re xaa nzaa kwent kwaan nzhé Dios lo xaa. 7 Zee nzhé Saúl lo re xaa nke zhiin lo xaa:
—Kwaan tub ngwnaa me nkano mbi cheen yalwezh, zee ya nabdizh na lo me.
Zee lee xaa nke zhiin lo xaa mkeb nu nzhé:
—Nzho tub me nkano mbi cheen yalwezh naz Endor.
8 Zee ngok Saúl stub xab xaa zee nalabeyyt me xaa, zee ngwa xaa kwaan chop xaa nke zhiin lo xaa nu ngwa xaa lo ngwnaa zee yaal. Nu nzhé xaa lo me:
—Nzhekla na nii lu lo mbi cheen tub me ngutla. Nzhekla na nabdizh na tub kwaan lo me.
9 Zee lee ngwnaa nzhé:
—Lu ne cho kwaan mle Saúl, mloo me re me nzhak yalwezh yizhyo ne. ¿Chozhiin nzhekla lu le na kwaane, zee gut me na?
10 Zee lee Saúl mcheroo lo Xaa Tubka nu nzhé xaa:
—Mban Xaa Tubka Nak, nyent cho kwaan gak lu.
11 Zee lee ngwnaa mkeb nu nzhé:
¿Cho nzhekla lu yiid lo be?
Zee lee xaa nzhé:
—Laa yiid Samuel.
12 Nu gorna ngune me lo Samuel, nu nye doo ngunii me lo Saúl nu nzhé me:
13 —¿Chozhiin mkade lu na? ¡Lu nak Saúl!
Zee lee rey nzhé:
—Nazhebt lu. ¿Cho kwaan myun lo lu?
Zee lee ngwnaa mkeb lo Saúl nu nzhé:
—Ne na tub mbi kwaan nyixoob lo yizhyo.
14 Zee lee xaa nzhé :
—¿Xomod nzhak me?
Zee lee me mkeb nzhé:
—Tub me gol nze nu nzhak me ler noll.
Zee mzeen Saúl lee Samuel nze; zee mkich yek xaa nu mla lachuzh xaa axta loyo, zee mwii xaa respet lo xaa. 15 Zee lee Samuel nzhé lo Saúl:
—¿Chozhiin mle lu xgab na zee nzhekla lu yal na?
Zee lee Saúl mkeb nu nzhé:
—Nales doo nzhak lextoo na nel lee re xaa Filistea kadil kwaan na, nu mlaa Dios na. Nankebt xaa lo na, nixa kwent cheen re xaa kwaan nzaa kwent kwaan nii Dios lo xaa nu nixa lo mkaal, kwaanzee mrezh na lu zee né lu lo na cho kwaan le na.
16 Zee nzhé Samuel:
—¿Chozhiin nabdizh lu lo na gorna nayii Xaa Tubka Nak ne lu nu mlaa xaa lu. 17 Xaa Tubka Nak mle lo lu mod ni na lo lu, nkiib xaa yalnabeyy lo lu nu mzaa xaaya lo David. 18 Nel nambint lu xtizh Xaa Tubka Nak, nu nixa namlet lu kwaan né xaa lo lu nel nambita lu re xaa Amalec, xaa nayii ne xaa. Kwaanzee mle xaa kwaane lo lu nal. 19 Yee lee Xaa Tubka Nak, zaa lu nu re xaa Israel, lo re xaa Filistea. Nu yiid lu nu re xgaan lu yo gu pa nzho na nee.
20 Nu gorna mbin Saúl kwaan nzhé Samuel zee mkaw xaa nu mla xaa lo yo nel mzheb doo xaa; noka nyent jwers lo xaa nel dub mbizh zee nik tik kwaan nandawt xaa. 21 Zee lee ngwnaa mzheb zee ngwa me lo Saúl nu nzhé me:
—Me nabeyy na, mbin na kwaan né lu lo na, mzaa na yalnaban cheen na lozhya lu mbin na xtizh lu. 22 Kwaanzee noka na naab na lo lu zee gon lu kwaan ni na lo lu. Me kwaan nke na zhiin lo, zeno na lak yat kwaan za na gaw lu zee yo jwers lu zee nya lu.
23 Nu lee xaa mkeb nu nzhé xaa:
—Nagawt na naya.
Per mle me jwers lo xaa zee ndaw xaaya, zee nguxso xaa lo yo nu mzob xaa roo loon. 24 Zee lee ngwnaa ne nkano tub la ngoon, ma nachaa doo, garli me. Zee mbit me ma zee mzen me arin nu mdexkwaa me yat kwaan nanyut lebadur leen. 25 Nu mbe meya lo Saúl nu lo re xaa xaa nu gorna ngulo ndaw xaa nguzhe, zee nya xaa.