David ngu lo re xaa Filistea
27
Zee mle David xgab naz leen lextoo xaa nu nzhé xaa: "Tub mbizh gut Saúl na. Mas wen nya na yo na lo re xaa Filistea zee nakwaantra Saúl na dubse yizhyo Israel zee wen yo na." 2 Zee nzha David kwaan xoop gayoo xaa kwaan nkano xaa yizhyo paro nabeyy Aquis xgann Maoc, rey xaa yezh Gat. 3 Zee ngu David kwaan Aquis naz Gat, kwaan re xaa xaa, nu kwaan re xaa li re xaa. Noka David ngu kwaan rop xngwnaa xaa, Ahinoam, me Jezreel nu Abigail, me ngok xngwnaa Nabal, xaa Carmel. 4 Gorna mzeen Saúl mxonn David naz Gat zee namkwaant xaa xaa.5 Zee nzhé David lo Aquis:
—Naab na lu zaa tub yezh dik pa yo na, nel nebse nak na tub xaa nke zhin lo lu, nawent yo na leeka yezh pa nzho lu.
6 Nu leeka mbizh zee mzaa Aquis Siclag zee nya xaa yo xaa. Nu kwaanzee sbaa ngunabeyy re rey xaa Judá Siclag axta mbizh nalzhe. 7 Tub liin kwaan tap mbee ngu David yizhyo cheen re xaa Filistea.
8 Zee ngwa mlewann David kwaan re xaa Gesur, nu re xaa Gezri nu re xaa Amalek; re xaa ne nzha doo mbizh nzho re xaa yizhyo Shur nu axta yizhyo Egipto. 9 Nu mbit David re xaa yezh baa nu namlaat xaa nik tub xaabyi nu nixa nik tub ngwnaa, mbit xaa xaa nu mbe xaa re xma xaa, mbakxiil, chib, ngoon, ngwes, kamey nu re ler cheen xaa. Zee mbare xaa lo Aquis. 10 Zee nzhé Aquis: "¿Xana yezh mbe lu xcheen nalzhe"? Zee lee David nzhé: "Mdil na kwaan xaa Neguev cheen Judá o mdil na kwaan xaa Neguev cheen Jerameel o mdil na kwaan xaa Neguev cheen Ceneo. 11 Nu mbit xaa rese xaa, ngwnaa nu xaabyi nu nik tub xaa namlaat nu ya xaa nzhé re kwaan naz Gat. Nu rese mbizh ngu xaa naz yizhyo cheen re xaa Filistea sbaa mle xaa. 12 Nu lee Aquis mbin xtizh David nu nzhé: "David mle nayii re xaa yezh Israel ne xaa nu tubka sbaa le zee ngok xaa xaa nke zhiin lo na.