David nanguta Saúl naz Zif
26
Ngwa re xaa Zif lo Saúl naz Gabaa, nu nzhé xaa: "Wii, lee David nzholaan naz leen yi cheen Haquila, naz wen ta nlen mbizh". 2 Zee ngwa Saúl naz wen cheen Zif, nu mbe xaa chon mil soldad, xaa mleey xaa lo xaa Israel. 3 Nu ngwa Saúl naz ta yi cheen Haquila, nu naz baa mlaz xaa lo wen roo naz; per lee David mlake naz wen, nel mzeen xaa lee Saúl mreke tich xaa. 4 Zee mxaal David xaa ngwa nselach nu mzeen xaa nzeke Saúl tich xaa. 5 Zee ngwa David, paro mbaz Saúl; nu mwii xaa paro nzha Saúl nu paro nzha Abner xgann Ner, xaa nabeyy lo re soldad. Nu lee Saúl naxna xsaw paro mbaz re xaa, nu lee re soldad nkanap xaa dub welt lo xaa. 6 Zee lee David nzhé lo Ahimelec, tub xaa Het nu lo Abisai, xgann Sarvia, wech Joab nu nzhé xaa:—¿Cho gu ya kwaan na paro mbaz Saúl?
Zee nzhé Abisai:
—Na ya kwaan lu.
7 David rop Abisai ngwa yaal pa mbaz re soldad nu lee Saúl naxna xsaw pa mbaz re xaa nu kwaan naluch nak yek nzhi lo yo gax yek xaa. Nu lee Abner nu re xsoldad xaa nax naz xkwes xaa dub welt. 8 Zee nzhé Abisai lo David:
—Nal zhe mzaa Dios xaa nayii ne lu lo lu, lee nal laa gut na xaa kwaan naluch yek nu ted naya axta lo yo nu nakint kich na xaaya stuba, nu liger doo le naya.
9 Zee mkeb David lo Abisai:
—Naguta lu xaa; nel nyent cho gal xaa mleyy Xaa Tubka Nak napa gaka tub jwalt lo xaa. 10 —Nu noka nzhé David: —Mban Xaa Tubka Nak, lee xaa kiib yalnaban cheen xaa gorna lee yalgut nze nu noka nzho mod yet xaa gorna ya xaa lo dil. 11 Mkanap Xaa Tubka Nak na zee nagalt na xaa, xaa kwaan mleyy xaa. Per nal be kwaan naluch nak yek kwaan nzho yek pa ngot Saúl, nu re kwaan nzho nis leen nu chaa ya be.
12 Zee mbe David kwaan naluch nak yek kwaan nzho yek pa ngot Saúl nu re nis nu nzha xaa, nu nik tub xaa nangunet lo xaa, rese xaa naxna nel Xaa Tubka Nak mlo mkaal lo xaa. 13 Zee lee David mded stub ta paro mbaz re xaa nu nguxoob xaa axta yek yi zit chep nu mwii xaa lo re xaa. 14 Zee mrezh David Abner, xaa nabeyy lo re soldad nye doo nu nzhé xaa:
—Abner, ¿chozhiin nankebt lu?
Zee lee Abner nkeb nu nzhé:
—¿Cho nak lu zee nke lu bi lo rey cheen lu?
15 Zee lee David nzhé lo Abner:
—¿Che nanakt lu tub xaabyi, xaa nzob doo xtizh lo re xaa Israel? ¿Chozhiin namkanapt lu rey, xaa nabeyy lo lu? ¡Tub xaa yezh listla nzo gut xaa per namkanapt lu xaa! Nawent kwaan mle lu, nzhaal yet lu nel namlet lu yud rey, xaa nabeyy lo lu. 16 Mle lu nawent. Mban Xaa Tubka Nak, lu nu re xaa lu nzhaal yet gu nel namkanapt gu xaa nabeyy lo gu, xaa mleyy Xaa Tubka Nak. ¿Ma kwaan naluch nak yek cheen xaa nal? nu ¿ma re nis cheen xaa kwaan ngu gax yek xaa?
17 Zee mlabeyy Saúl mod nzhedizh David, zee nzhé xaa lo xaa:
—¿Che naleet lu kanii lo na David, xgaan na?
Nu lee David mkeb nu nzhé:
—Mer naya, rey cheen na. 18 —Nu nzhé xaa: —¿Chozhiin nrenal lu na? ¿Cho kwaan mle nawent na lo lu zee nrenal lu na? 19 Rey xaa nabeyy lo na, lee nal naab na lo lu, gon kwaan yé na lo lu, xaa nak xmos lu. Che Xaa Tubka Nak mle zee nayii lu ne lu na, zee kayaa xaa gon kwaan za na lo xaa; per cheleeya naka kwent cheen myet, zee xobde Dios xaa nel kagoo xaa na yizhyo cheen Xaa Tubka Nak nu nii xaa lo na gool na lo stub dios. 20 Nanzheklat na yet na zit lo Xaa Tubka Nak mod tub mdid nixa mod tub myin naz wen.
21 Zee lee Saúl nzhé:
—David, xgaan na, mle na jwalt, bare lo na. Naguta na lu nel lu nambita na. Ngok na mod tub xaa nachan nu nawent mle na.
22 Zee lee David mkeb nzhé:
—Xaa nabeyy na, lee kwaan naluch yek cheen lu nee. Xaal tub xaa nke zhiin lo lu wee xaaya. 23 Nu Xaa Tubka Nak ngix ka myet lo re kwaan wen nu kwaan nali kwaan nle xaa. Nalzhe mzaa Xaa Tubka Nak lu lo na per nanzheklat na ngut na lu, xaa mleyy Xaa Tubka Nak. 24 Wii nal nambita na lu zee naab na lo Xaa Tubka Nak zee kiib xaa na lozhya re xaa nayii ne na.
25 Zee lee Saúl nzhé lo David:
Xgaan na, wen mle lu. Telise wen nya re kwaan lo lu, telise le lu gan.
Zee lee David mzen xnaz nzha nu lee Saúl mbare garli xaa.