David nu Abigail
25
Ngut Samuel, zee mzhaal re xaa Israel, nu mbinn xaa nu ngusebyo xaa xaa naz garli xaa yezh Ramá. David ngwa naz yizhyo bizh kwaan le Parán.2 Nu naz yizhyo mbizh kwaan le Maón nzho tub xaa nkano tub rench ndok doo naz yezh Carmel. Nu rik doo xaa, nkano xaa chon mil mbakxiil nu tub mil chib. Nu kachub mbakxiil pa nak rench cheen xaa. 3 Lee xaa le Nabal, nu nak xaa lo dii cheen Caleb. Lee xngwnaa xaa le Abigail. Nu ngu yek me nu chul doo nzhak me; per lee sa me ned doo nu nakap doo nak xaa.
4 Nu naz wen yizhyo bizh lee David mbin kachub Nabal xpakxiil xaa. 5 Zee lee David mxaal chii xaa mad nu nzhé xaa lo xaa: "Gwa naz Carmel nu guzh gu dix cheen na lo Nabal. 6 Nu yé lu lo xaa: 'Wen yo lu, nu wen yo re xaa li lu nu wen gak rese kwaan nkano lu. 7 Mbin na lee lu kachub xpakxiil lu. Xomod ne lu lee re xaa nkano xma lu mzo kwaan nu, nu nanayiit nu. Nu dubse gorna mzo xaa Carmel, nik tub kwaan namkiibt nu lo re xaa. 8 Ngunabdizh lo xaa kwaan nke zhin lo lu, lee xaa néya lo lu. Nu wen kayaa lu re xaa na, nel nal zhe le lu yalni. Naab na zaa kwaan lo xmos lu, xaa nzo lo lu, nu lo na, xaa nak mod xgann lu.'"
9 Nu gorna mzhin re xaa mad, xaa mxaal David nu nzhé xaa lo Nabal kwaan nzhé David nu zheta ngok re xaa, mlaz re xaa kwaan keb Nabal. 10 Zee mkeb Nabal lo re xaa mad, xaa mxaal David nu nzhé xaa:
—¿Cho nak David, xgann Isaí? Zyen doo mos nxonn lo xaa nabeyy lo xaa nal mbizh nalzhe. 11 Lee nal ¿chozhiin za na yat cheen na nu xis na kwaan mdexkwaa na gaw re xaa kwaan nke zhiin lo na nu zaa naya gaw xaa, tub xaa kwaan nanet pa naz nze?
12 Zee lee re xaa kwaan mxaal David mbare stuba, nu gorna mbare xaa, zee nzhé xaa rese kwaane lo David. 13 Zee lee David nzhé lo re xaa xaa:
—¡List bzen gu spad cheen gu!
Nu noka lee xaa mbe spad cheen xaa nu nzha xaa kwaan tapgayoo xaa dil xaa kwaan Nabal; lee chopgayoo xaa mlake kanap re kwaan nkano xaa. 14 Per tub xaa nke zhiin lo Nabal ngwa nzhé lo Abigail, xngwnaa Nabal kwaane: "David nzho naz wen nu mxaal me me yé dix lo me nabeyy lo nu, per nawent mle Nabal lo re me. 15 Nu wen doo ngok me lo nu, nu nik tub kwaan nawent namlet me lo nu, nu nixa nik tub kwaan nanyujwalt lo nu dubse mzo me kwaan nu naz wen. 16 Lee me mkanap nu zhe nu yaal leezha mkano nu re mbakxiil gax lo re me. 17 Kwaanzee Nabal, me nabeyy lo nu, nakap doo nak me nu nyent cho nii lo me. Nu lee nal telise tub kwaan nawent gak lo me nu lo re me nzho li me nel nak me tub me nakap nu nyent cho nii lo me. Lee David ngulo myaan dil kwaan re be, kwaanzee naab na lo lu le lu tub kwaan."
18 Zee lee Abigail zoza mxaal chopgayoo yat nu chop yed xis ub, nu gaay mbakxiil ma myeex, nu kan galbgazh kil nzhob kwaan myeex, nu tub gayoo bool ub bizh, nu chop gayoo bool ig bizh, nu mke me reya tich re ngwes. 19 Zee nzhé me lo xaa kwaan nke zhin lo xaa:
—Gwaner lo na, lee na reke tich lu lu.
Per nik tub kwaan nanzhét me lo sa me. 20 Zee nguxoob me tich tub ngwes nu mded me cho re yi nu lee David kwaan re xaa xaa nali nze leeka baa, nu mzhaal xaa me. 21 Nu lee David nzhé lo re xaa: "Kanxlee mkanap na re xcheen xaa ne naz yizhyo bizh, zee naluuxt nik tub kwaan xcheen xaa. Lee nal nawent kale xaa lo kwaan wen kwaan mle na lo xaa. 22 ¡Chelee na naguta na rese xaabyi gorna zeeraka yani yizhyo, Dios teed na bid!"
23 Nu gorna ngune Abigail lo David zee mla me tich ngwes zee mkich xub me lo David nu mla lachuzh me axta lo yo 24 axta lo nii xaa nu nzhé me:
—Me nabeyy lo na, tich na nzhob jwalt. Kwaz ni na lo lu, na nak mod me nkee zhin lo lu, ke nzha xtizh na. 25 Nalet lu kas Nabal, me naras. Lee le Nabal nii "xaa ned" nu wlipa sbaa ned me. Per lee na nangunet lo re me mxaal lu. 26 Lee nal me nabeyy na, modxa mban Me Tubka Nak noka mban lu, nu namlaat me zee ngut lu Nabal. Naab na lo Me Tubka Nak zee teed me re xaa nayii ne lu bid leeka mod le me lo Nabal. 27 Lee nal kayaa kwaan nzeno na, nel nak na mod tub me kwaan nke zhiin lo lu, nu bzaaya lo re me nzhake tich lu. 28 Nu nzhekla na yenlazh lu kwaan mle na lo lu. Ne na lee lu nu re dii cheen lu nabeyy Israel, nel ndil lu gorna né Me Tubka Naka lo lu, kwaanzee nal tubka ble gu kwaan wen. 29 Nu nixa nzho xaa nzhekla renal lu zee gut xaa lu, per lee Me Tubka Nak kanap lu zee nyent cho gak lu. Dios kobi me lo lu mod ngobi me tub ke mandal. 30 Kwaanzee gorna lee Me Tubka Nak le rese kwaan né me nu gak lu rey me Israel, 31 nalet lu xgab nel nangut lu me sbaasa. Nu gorna lee Me Tubka Nak le kwaan wen lo lu selazh lu na, me nak xmos lu.
32 Zee nzhé David lo Abigail:
—Wen nak Me Tubka Nak, Dios cheen be, me Israel. Lee me mxaal lu zee mzhaal lu kwaan na. 33 Naab na zee wen nii me lo lu nel wen doo nak xgab cheen lu nu wen doo mle lu nel namlaat lu gut na me. 34 Nel mban Me Tubka Nak, me nak Dios cheen be me Israel, namlaat me ngle na kwaan nawent. Chol namzhint lu lo na nal yee garziil ngulola mbit na Nabal kwaan re me mbyi cheen me.
35 Zee mzen David kwaan nzhano me nu nzhé xaa:
—Wen nya lu garli lu, mbin na kwaan né lu lo na, nu za na kwaan ngunaab lu lo na.
36 Zee mbare Abigail naz paro nzho Nabal nu gorna mzhin me lee Nabal nzho yalni nu nix doo nzhak lextoo xaa nu nzuzh xaa, zee lee xngwnaa xaa namzaat kwent kwaan ngok axta stub mbizh. 37 Nu garziil stub mbizh mkaxni xaa zee nzhé xngwnaa xaa kwaan ngok lo xaa nu gorna mbin xaa kwaan nzhé me, zee taa ngut doo xaa. 38 Mded chii mbizh zee Xaa Tubka Nak mle zee ngut Nabal.
39 Nu gorna mbin David lee Nabal ngutla, zee nzhé xaa:
—Wen mle Xaa Tubka Nak lo na nel mle xaa mdix Nabal kwaan mle xaa lo na nu namlaat xaa gut na xaa, zee leeka lee xaa mbit Nabal.
Ngulo mded kwaane, David mxaal diizh lo Abigail, nu ngunaab xaa lo me chelya me kwaan lee xaa. 40 Kwaanzee lee re xaa nke zhiin lo David ngwa lo Abigail naz Carmel, zee ngunii xaa lo me, nu nzhé xaa:
—David mxaal nu, zee ka me lu.
41 Nu nguxso me nu mkich yek me axta mla lachuzh me lo yo nu nzhé me:
—Wii, na nak xmos lu, zet na nii lu nu nii re xaa nke zhiin lo me nabeyy lo na.
42 Zee nguxso Abigail kwaan gaay me kwaan nke zhiin lo me nu nguxoob me tich ngwes nu mreke me tich xaa kwaan nke nzhin lo David, zee mka David me.