David nambita Saúl
24
Gorna mbare Saúl mreke tich re xaa Filistea, zee nzhé tub xaa lo xaa: "Wii, lee David nzho naz yizhyo bizh cheen En-gadi". 2 Zee mbe Saúl chon mil xaa, xaa mleyy xaa lo re xaa Israel; nu ngwa kwaan xaa David kwaan re xaa xaa naz yek kelag kwaan le Chib Wen.3 Nu gorna nzha xaa naz, mzhin xaa paro nsebyoo re xaa xmbakxiil xaa nu naz baa ngu tub yeer. Nu zee mreep xaa leena zee nya xaa mandad. Nu lee David nzholaan axta xan yeer kwaan re xaa xaa. 4 Zee lee re xaa David nzhé:
—Wii, nalzhe ngok kwaan nzhé Xaa Tubka Nak lo lu gorna nzhé xaa: "Za na re xaa nayii ne lu lo lu, zee le lu kwaan nzhekla lu lo xaa".
Zee xlaan ngwa David mchoog tik xii xab Saúl. 5 Zeera ngok nales lextoo David nel mchoog xaa tik xii xab Saúl. 6 Nu nzhé xaa lo re xaa xaa:
—Xaa Tubka Nak kanap na zee naguta na xaa nabeyy lo na. Nel mleyy Xaa Tubka Nak xaa, zee nyent mod dil na kwaan lee xaa.
7 Sbaa nzhé David zee naguta re xaa xaa Saúl. Zee mroo Saúl leen yeer nu nzha xaa kwaan re xaa xaa.
8 Zee noka David mroo leen yer nu nzhake xaa tich Saúl nu nzhé xaa:
—¡Xaa nabeyy na, rey cheen na!
Zeera mzere Saúl yenn Saúl mwii xaa naz tras. Zee mkich yek David lo yo mwii lo xaa. 9 Zee nzhé David lo Saúl:
—¿Chozhiin nzhon lu xtizh re xaa mbezh lee na nzhekla le kwaan nawent lo lu? 10 Wii nal Xaa Tubka Nak mzaa lu lo na zee gut na lu leeka nee leen yeer; per nzhekla na ngut na lu, nel Xaa Tubka Nak mleyy lu.
11 Wii, xuz na. Wii lo tik xii xab lu kwaan nzho yaa na. ¡Nambita na lu! Nkin ne lu nanzheklat na gut na lu, per lee lu nkwaan lu na zee gut lu na, nixa nik tub kwaan namlet na lo lu. 12 Naab na lee Xaa Tubka Nak naab kwent lo rop be. Naab xaa kwent lo lu nel nzhekla lu gut lu na. Per naguta na lu. 13 Mod nii re xaa tub wdizh kwaan gox ne: "Lo re xaa nakap roo kwaan nawent". Kwaanzee naguta na lu. 14 Telise nanzeket rey xaa Israel na. ¡Nebse nak na mod tub mbak ngut, mod tub myid! 15 Xaa Tubka Nak, gak xaa naab kwent lo rop be. Nzhekla na lee xaa ne cho kwaan mle na nu lee xaa nkanap na lo lu.
16 Nu gorna ngulo ngunii David re kwaane lo Saúl, zee lee Saúl nzhé:
—David, xgann na, ¿che naleet lu ngunii lo na?
—Wen mle lu lo na, per lee na mle kwaan nawent lo lu. 18 Lu nguné nal wen mle lu na. Nu nambita lu na gorna mzaa Xaa Tubka Nak na lo lu. 19 Kwaanzee gorna nzhaal xaa tub xaa nayii ne xaa, naselat xaa xaa nya xaa. Lee Xaa Tubka Nak mzaa na lo lu, nixa sbaaka nambita lu na. 20 Lee nal, ne na lee lu nabeyy lo re xaa Israel nel Dios zaaya lo lu. 21 Cheroo lo Xaa Tubka Nak ne che li luya, zee naguta lu re dii cheen na gorna yilo yet na nu nixa naluxt lu le na lo re xaa li xuz na.
22 Zee mcheroo David lo Saúl, zee nya Saúl garli xaa. Zee lee David kwaan re xaa xaa nguxoob pa masra nakap.