David mdil kwent cheen yezh Keila
23
Zee lee re xaa Filistea mla yezh Keila nu mbe xaa rese nzhobxtil kwaan mloo re xaa. Nu gorna ngune David kwaane, 2 zee ngunii David lo Xaa Tubka Nak nu nzhé xaa:—¿Che nzhaal ya na dil na kwaan re xaa Filistea?
Zee lee Xaa Tubka Nak mkeb lo David nu nzhé:
—Gwa dil kwaan re xaa Filistea nu selaa lu re xaa Keila lozhya xaa.
3 Per lee re xaa nzhi kwaan David nzhé lo David:
—Nzheb nu nzhi nu Judá nee nu chol ya be dil be kwaan re xaa Filistea naz Keila masra nzheb nu.
4 Zee mbare David ngunii lo Xaa Tubka Nak stuba, zee mkeb Xaa Tubka Nak lo xaa:
—Gwa naz Keila nu na le zee le lu gan lo re xaa Filistea.
5 Zee ngwa David kwaan re xaa xaa naz Keila, zee mdil xaa kwaan re xaa Filistea. Zee mbe xaa re xma xaa nu mbit xaa zyen doo xaa Filistea. Sbaa msela xaa re xaa Keila lozhya xaa Filistea.
Saúl mrenal David
6 (Lee Abiatar xgann Ahimelec nzhake tich David naz Keila nu noka mzeno xaa kwaan nzhak mod mandil cheen ngwleyy). 7 Nu gorna nzhé xaa lo Saúl lee David nya naz Keila, zee nzhé Saúl: "Dios mzaa xaa lo na nu gorna mreep xaa leen yezh kwaan nye doo nyaaw naletra xaa gan xonn xaa". 8 Zee mrezh Saúl re xsoldad zee ya dil kwaan re xaa yezh Keila, zee saaw xaa David nu re xaa xaa. 9 Gorna mzeen David lee Saúl nzhekla zen xaa, zee nzhé xaa lo ngwleyy Abiatar: "Teno kwaan nzhak mod mandil kwaan nak xab ngwleyy nu naab lo Xaa Tubka Nak kwent cheen na". 10 Zee nzhé David:
—Xaa Tubka Nak, Dios cheen xaa Israel, mbin na lee Saúl nze gut re xaa yezh Keila kwent cheen na. 11 ¿Che zaa re xaa nzho yezh ne na lo Saúl? ¿Che wli yiid xaa? Xaa Tubka Nak, guzh che zyiid xaa.
Lee Xaa Tubka Nak mkeb nu nzhé:
—Zyiid xaa.
12 Zee ngwanabdizh David lo xaa:
¿Che zaa re xaa Keila na nu re xaa na lo Saúl?
Zee lee Xaa Tubka Nak mkeb nu nzhé:
—Zaa re xaa gu lo xaa.
13 Zee mtoop David re xaa xaa nu nzha xaa. Re xaa xaa nak kan xoop gayoo xaa. Nu mroo re xaa naz Keila nu nzha xaa tub pa nu stub pa. Zee mbin Saúl ngulola mroo David naz Keila zee nangwat xaa baa. 14 Zee lee David nzho naz yizhyo bizh kwaan nzho gax yezh Zif, nu mkaxlaan xaa pa nakap nak leen re yi. Nu rese mbizh mkwaan Saúl xaa per lee Dios tubka mkanap xaa. 15 Nu gorna nzho David naz Hores yizhyo bizh cheen Zif, ngune xaa lee Saúl kakwaan xaa gut xaa. 16 Zee ngwa kwaan Jonatán xgann Saúl David naz Hores, zee mle yud xaa ngu gan lextoo xaa, 17 nu nzhé xaa lo David:
—Nazhebt lu, nalet xuz na gan zen lu. Lu nabeyy lo re xaa Israel nu lee na gak xaa le yud lu. Nu nela xuz naya.
18 Zee myaan rop xaa lo Xaa Tubka Nak, zee mlake David naz Hores nu lee Jonatán mbare garli.
19 Zeera ngwa xob re xaa Zif naz Gabaa zee yé xaa lo Saúl:
—Lee David nzho laan leen yizhyo cheen nu leen re yi nakap naz Hores naz yi cheen Haquila naz ta yat leen yizhyo bizh pa nakap. 20 Xaa nabeyy, gorna nzhekla lu yiid lu zee zaa nu David lo lu.
21 Zee mkeb Saúl:
—Xaa Tubka Nak nii wen lo gu nel mkano gu yalnles ne na. 22 Lee nal yasewii lu nel paro nzholaan xaa, nu cho ngune lo xaa, nel ne re xaa nzhak doo xaa nkaxlaan xaa. 23 Wen wen wii gu zee nel paro nzholaan xaa, zee nyaad gu zee né guya lo na, zee ya na kwaan gu; chelee David nzho baa, zee kwaan na xaa lo re dii cheen Judá.
24 Zee mroo re xaa lo Saúl nu mya re xaa naz Zif. Lee David kwaan re xaa xaa mlaz yizhyo Maón, kwaan nzhi naz Arabá, naz ta yat. 25 Zee nzha Saúl kwaan re xaa xaa. Nu gorna nzhé xaaya lo David zee ngwa David naz tub ke kwaan nzho yizhyo bizh cheen Maón. Nu gorna mbin Saúl kwaane, zee nzhake xaa tich David naz yizhyo bizh cheen Maón. 26 Nu lee Saúl nzha stub ta yi lee David nzha stub ta kwaan re xaa xaa nu liger nzha David zee xonn xaa lo Saúl. Nu gorna mer zhin re xaa Saúl zee zen xaa David, 27 zee ngwa tub xaa nzhé lo Saúl: "¡Te nal, nel lee re xaa Filistea kadil kwaan re xaa yezh!" 28 Zee mbare Saúl nu namreketra xaa tich David, zee mdil xaa kwaan re xaa Filistea. Zee mlole xaa naz ba aSela-hama-lecot. 29 Zee nya David ngu naz yizhyo nakap kwaan nzhi En-gadi.