22
Zee mroo David yezh Gat zee ngu xaa leen tub yiloo naz yezh Adulam. Zee ngune re wech xaaya nu re xaa sawlizh xaaya zee ngwa xaa lo xaa baa.2 Noka re xaa nales doo nzhak nu re xaa nankanot demi kix kwaan nzeeb nu re xaa nkano kej ngwa lo David. Zee David ngunabeyy lo tap gayoo xaa.
3 Zee ngwa David naz Mizpa cheen Moab, zee nzhé xaa lo rey Moab:
—Naab na lo lu laa lu yo xuz na nu xnaa na nee axtaka ne na cho kwaan le Dios lo na.
4 Zee mbe xaa xuz nu xnaa xaa lo rey Moab nu ngu rop xaa baa dubse tyemp kwaan gu David leen yiloo. 5 Per Gad, xaa nzaa kwent kwaan nzhé Dios lo, nzhé lo David:
—Nakaxlaant lu nee leen yiloo, zyaa xkizhyo Judá.
Zee mroo David baa nu nya xaa naz yi cheen Haret, pa nzeb doo yag.
Saúl mbit re ngwleyy xaa yezh Nob
6 Nu tub mbizh nzob Saúl xan tub yag ndok naz Gabaa, nu nzho kwaan naluch nak yek yaa xaa nu dub welt lo xaa nzhi re xaa nke zhiin lo xaa. Zee ngune Saúl lee David kwaan re xaa xaa nzho Judá. 7 Zee nzhé Saúl lo re xaa nke zhiin, xaa nzhi dub welt lo xaa:
—Gu xaa nak lo dii cheen Benjamína, nala kenzha gu. ¿Che nle gu xgab lee xgann Isaí zaa yizhyo nu yag ub lo gu nu zaa xaa yalnabeyy lo gu lo tub mil xsoldad xaa o lo tub gayoo xsoldad xaa? 8 Lee nal ne na rese gu nayii ne na nel nanét gu lo na trat kwaan myaan xgaan na kwaan xgann Isaí nu nik tub gu nanet lo na lee xgaan na nayii ne na re mbizh nal.
9 Zee lee Doeg xaa Edom, xaa non lo re xmos Saúl mkeb nu nzhé:
—Na ngune lo xgann Isaí rop Ahimelec xgann Ahitob naz yezh Nob. 10 Ahimelec ngunaab lo Xaa Tubka Nak, kwent cheen David nu mzaa xaa kwaan ndaw xaa nu mzaa xaa spad Goliat, xaa Filistea lo xaa.
—Kenzha nal, xgann Ahitob.
Zee mkeb xaa nu nzhé xaa:
—Xaa nabeyy, lee na nzoka nee.
13 Zee Saúl ngunabdizh:
—¿Chozhiin mle lu kwaan nawent lo na? ¿Chozhiin mzaa lu kwaan ndaw David nu mzaa lu spad noka ngunii lu lo Dios zee le xaa yud xaa? Lee David nzhekla gut na nu nebse nkambaz xaa le xaaya.
14 Zee lee Ahimelec mkeb lo rey nu nzhé:
—¿Xana tub re xmos lu nak nali mod David, xaa nak xuzh rey? Nabeyy xaa lo xsoldad lu nu lo xaa non doo leen yilaw. 15 Nanakt kwaan ba welt yilo kwaan ngunii na lo Dios kwent cheen lee xaa. Naab na, nagaazht lu kwaane tich na, xaa nak xmos lu nu nixa tich re xaa li xuz na, nel nik tub kwaan nanet na cho kwaan kale xaa nixa kwaan tika nu nixa kwaan groya.
16 Zee lee rey nzhé:
—Ahimelec, telise yet lu; lu nu re xaa li lu.
17 Zee nzhé rey lo re xaa nkanap xaa, re xaa nzhi dub welt lo xaa.
—Zaa welt nu bit gu re ngwleyy cheen Xaa Tubka Nak nel noka re xaa ne le yud David kaxonn lo na nu nanét xaaya lo na.
Per lee re xaa nke zhiin lo xaa nanet le nik tub kwaan lo re ngwleyy cheen Xaa Tubka Nak.
18 Zee lee rey nzhé lo Doeg:
—Zaa welt nu bit re ngwleyy cheen Xaa Tubka Nak.
Zee mbit xaa tapgal gaay xaa nak ler kwaan chul doo kwaan nak xab ngwleyy. 19 Nu noka ngwa xaa yezh Nob cheen re ngwleyy zee mbit xaa kwaan spad rese xaa nzho baa, ngwnaa nu xaabyi nu re madoo, ngonn, ngwes nu mbakxiil. Rese xaa mbit xaa kwaan spad.
20 Per Abiatar, xaa nak xgann Ahimelec, xaa ngok xgann Ahitob, mle xaa gan mxonn xaa, nu ngwa xaa lo David 21 Zee nzhé Abiatar lo David nel xomod mbit Saúl re ngwleyy cheen Xaa Tubka Nak. 22 Zee nzhé David lo Abiatar: "Ne na mbizh zee gorna mzo Doeg baa, lee xaa nzhéya lo Saúl. ¡Kwaanzee nzak na leeka na mle zee mbit xaa re xaa li lu! 23 Lakeka kwaan na nu nazhebt lu. Loka cho kwaan lu noka kwaan xaa na. Nal kanap na lu.