David mxonn lo Saúl
21
Ngwa David naz Nob, lo ngwleyy Ahimelec; nu lee ngwleyy Ahimelec mzheb nzhaal kwaan lee xaa, nu nzhé xaa lo xaa:—¿Chozhiin techo lu nze lu nee nu nik tub xaa nanzeket tich lu?
2 Zee lee David mkeb lo ngwleyy Ahimelec nu nzhé xaa:
—Lee rey mxaal na tub mandad nu né xaa lo na: "Nik tub xaa nanzhaalt ne cho zhiin mxaal na lu, nu nyent cho ne kwaan ngunabeyy na lu". Re xaa nke zhiin lo na nela xaa paro zhaal na kwaan re xaa. 3 Lee nal ¿cho kwaan nzho mod zaa lu gaw na? ¿Che nzho mod zaa lu gaay yat gaw na? Zaa lu loka kwaan nkano lu.
4 Zee lee ngwleyy mkeb lo David nu nzhé:
—Nankanot na yat sbaasa nebse nkano yat nambey. Za naya gaw re xaa nke zhiin lo lu chelee xaa nzhala mbizh mchaal xaa ngwnaa.
5 Zee lee David mkeb lo ngwleyy nu nzhé:
—Wlipa na, naaze nu nese namchaalt nu ngwnaa kwaanzee noka re xaa nke zhiin lo na nzhul na axta nala.
6 Zee lee ngwleyy mzaa yat kwaan nambey kwaan mre xaa lo Xaa Tubka Nak nu pense mzhib xaa yat kwaan nazhoog lo Xaa Tubka Nak, nel nyent yat kwaan sbaasa, nebse yat kwaan nambey nzho. 7 Zee nzo Doeg, tub xaa Edom, nke zhiin lo Saúl. Mzo xaa baa kwent cheen Xaa Tubka Nak. Mnabeyy xaa lo re xaa nkano xma Saúlb.
8 Zee nzhé David lo Ahimelec:
—¿Che nankanot lu kwaan naluch nak yek nu spad? Nanzenot na kwaan naluch nak yek nixa stub naz xkiib na, nel prad doo nzhal na lo kwaan mxaal rey na zee nanzenot na xcheen na.
9 Zee lee Ahimelec mkeb nu nzhé:
—Nzhoka xspad cheen Goliat xaa Filistea, xaa kwaan mle lu gan lo lach cheen Ela. Leeya nral ler nzho tich kwaan nzhak mod mandil. Chelee lu nzhekla lu le xchinn luya nzho moda, ¡nyentra stub spad nee!
Mkeb David nzhé:
—Nyenta stuba mod spad ba. Zaaya lo na.
10 Zee mxonn David lo Saúl mbizh zee nu ngwa xaa lo rey Aquis naz yezh Gat. 11 Zee lee xaa nkee zhiin lo rey Aquis nzhé lo xaa:
—¿Che naleet xaa ne nak David, xaa nak rey? ¿Che naleet xaa ne nak xaa nzholl re xaa lo, xaa mbezh re xaa:
"Saúl mbit tub mil xaa,
lee David mbit tub chii mil xaa"c?