Myenn David kwaan Jonatán
20
Zee mroo David naz Naiot Ramá nu ngwa xaa pa nzo Jonatán nu nzhé xaa:—¿Cho kwaan mle na? ¿Xana kwaan nawent mle na, o xana jwalt mle na lo xuz lu, zee nkwaan xaa na gut xaa na?
2 Nu lee Jonatán nzhé:
—Nyent cho gut lu; nyent cho kwaan gak lu. Lee xuz na mbezh rese kwaan nle xaa lo na, ¡nalet lu xgab nanét xaaya lo na.
3 Per lee David mbare mcheroo stuba nu nzhé xaa:
—Ne wen xuz lu lee lu mwii wen lo na, telise nle xaa xgab: "Jonatán nanzhaalt ne kwaane zee nagakt nales lextoo xaa". Per cheroo na lo Xaa Tubka Nak nu lo yalnaban cheen lu, nel gax doo nzo na lo yalgut.
4 Zee lee Jonatán nzhé lo David:
—¿Cho kwaan nzhekla lu le na lo lu?
5 Lee David nzhé lo Jonatán:
—Yee gak yalni cheen mbee yeen, nu nzhaal gaw na kwaan rey. Laa kaxlaan na naz wen axta wiizh zhel yizhyo. 6 Chelee xuz lu nabdizh na zee yé lu lo xaa: "Mle doo xaa jwers lo na zee mlaa na nya xaa naz Belén lazh xaa, nel rese sawlizh xaa le yalni kwaan nted xaa ma yizata liin". 7 Nu chelee xaa né xaa lo lu: "Wena," zeesi wen yo na, xaa nak xmos lu; per chelee xaa yii xaa, zee ne lu lee xaa nzhekla gut na. 8 Kano yalnles lo na, xaa nak xmos lu, nel mcheroo be lo Xaa Tubka Nak. Lee be kwi wen kwaanzee chelee na nkano na jwalt, bit na, nu nankint wee lu na lo xuz lu.
9 Lee Jonatán nzhé:
—Nalet lu xgab komba chelee xuz na nzhekla gut lu zee ni naya lo lu.
10 Lee David ngunabdizh lo Jonatán nu nzhé:
—¿Cho xaa yiid néya lo na chelee xuz lu yii?
11 Zee lee Jonatán nzhé lo David:
—Chaa ya be wen.
—¡Xaa Tubka Nak, Dios cheen re xaa Israel, gak testig! Gorna yilo nabdizh na lo xuz na wiizh, cheleeya rese kwaan wen nak zee xaal na xaa yiid néya lo lu. 13 Per chelee xuz na nzhekla gut lu, lee Xaa Tubka Nak teed na bid chelee na nanit naya lo lu zee wen nya lu. 14 Cheleeya seetaka mban na gorna lee Xaa Tubka Nak le yalwen lo lu, naab na lo lu gak wen lu lo na nu nalaat lu gut xaa na. 15 Nu nalaat lu le wen lu lo re xaa li na, gorna lee Xaa Tubka Nak luux re xaa nayii ne lu lo yizhyo ne.
16 Sbaa myaan Jonatán tub trat kwaan re xaa li David nu nzhé xaa: "Xaa Tubka Nak, naab kwent lo re xaa nayii ne lu". 17 Zee lee Jonatán mle zee lee David mcheroo stub welt nel nkedoola xaa xaa nu nyenn doo rop xaa. 18 Gorzee nzhé Jonatán:
— Yee gak yalni cheen mbee yeen nu lee yagxil cheen lu nyent cho zob lo, zee selazh doo re xaa lu. 19 Wiizh gwa paro mkaxlaan lu welt yilotlaka nu blaz cho ke cheen Ezel. 20 Na kee chon kwaan nkee wez tub lad lo lu mod xaa kakee blank. 21 Zee yé na lo xaa mad, xaa nke zhiin lo na: "Gwakwaan kwaan nkee wez". Chelee na yé na lo xaa mad: "Lee kwaan nkee wez naxto nazre lo lu", zeen luya zee wen nya lu nu nik tub kwaan nagakt lo lu nel mban Xaa Tubka Nak. 22 Per chelee na yé na: "Baa naxto re kwaan nkee wez delant lo lu", zyaa, nel lee Xaa Tubka Nak nzhekla nya lu. 23 Bselazh kwaan mbdizh rop be, nel lee Xaa Tubka Nak ne kwaa nyaan be, nu nzo kwaan be tira.
24 Zee mkaxlaan David naz wen nu gorna mzhin yalni cheen mbee yeen mzob rey gaw. 25 Zee mzob rey lo yagxil cheen xaa naz cho bla. Lee Jonatán mzob lo xaa, nu lee Abner mzob xkwes Saúl, lee lo yagxil cheen David nyent cho nzob. 26 Per lee mbizh zee lee Saúl nik tub kwaan nanzhét, nel mle xaa xgab: "Ngok tub kwaan zee nanzhult nzo xaa". 27 Per nguni yizhyo stub mbizh kwaan nak rop mbizh cheen yalni, lee yagxil cheen David nyent cho nzob lo. Nu lee Saúl nzhé lo Jonatán:
—¿Chozhiin nangiidt xgann Isaí ngaw nalzhe nixa naaze?
28 Zee lee Jonatán nzhé lo Saúl:
—David ngunaab doo lo na zee za na diizh ya xaa yezh Belén. 29 Ngunaab xaa lo na zee za na diizh ya xaa, nel lee re xaa li xaa teed ma lazh xaa nu lee wech xaa ngunabeyy nya xaa. Noka ngunaab xaa lo na le na jabor lo xaa zee yasewii xaa lo re sawlizh xaa. Kwaanzee nambiidt xaa mzob xaa lo xmes rey.
30 Zee ngunayii Saúl lo Jonatán nu nzhé xaa:
—¡Xgann ngwnaa nawent nu nakap! ¿Che nle lu xgab nanet na nyenn lu David, xgann Isaí? ¡Kwaane nak yalnto cheen lu nu cheen xnaa lu me mzan lu! 31 Nel dubse tyemp kwaan ban xgann Isaí lo yizhyo, nyent mod zhin lu gak lu rey kwaanzee bxaal xaa yaxii xaa nel nzhaal yet xaa.
32 Zee lee Jonatán mkeb lo xuz nu nzhé xaa:
—¿Chozhiin yet xaa? ¿Cho kwaan mle xaa?
33 Zee lee Saúl mkee kwaan naluch nak yek yenn Jonatán zee gut xaa xaa, zee ngune Jonatán lee xuz xaa nzhekla gut David. 34 Zee lee Jonatán mrixyan doo nu nguxso xaa lo mes nu nandawt xaa lo yalni cheen mbee yeen mbizh rop nel nales doo nzhak lextoo xaa kwent cheen David nu nel nawent mle xuz xaa lo xaa.
35 Lee nguni yizhyo garziil doo ngwa Jonatán wen kwaan tub xaa mad, xaa nke zhiin lo xaa, gor kwaan nak kwent zhaal rop xaa David. 36 Nu nzhé xaa lo xaa mad xaa nke zhiin lo xaa:
—Brexonn gwakwaan kwaan nkee wez kwaan kee na.
Gorna lee xaa mad, xaa nke zhiin lo xaa, nzhaxonn nzha, nu lee xaa mkee tuba mas delant lo xaa mad. 37 Gorna mzhin xaa mad, xaa nke zhiin lo xaa, paro naxto kwaan nkee wez, zee lee Jonatán nye doo ngunii nu nzhé:
—Lee kwaan nkee wez naxto mas delant lo lu.
38 Nu lee Jonatán nye doo ngunii stub welt:
—¡Le prad brexonn, nakwazt lu!.
Zee lee xaa mad, xaa nke zhiin lo xaa, mtoop kwaan mkee wez nu mbare xaa lo xaa nke xaa zhiin lo. 39 Per lee xaa mad, xaa nke zhiin lo xaa, nik tub kwaan namzeent xaa; techose Jonatán rop David ne cho kwaana. 40 Zee mzaa Jonatán re xkiib xaa lo xaa mad, xaa nke zhiin lo xaa, nu nzhé xaa:
—Zyaa nu beya leen yezh.
41 Gorna lee xaa nke zhiin lo xaa nya zee lee David mroo pa mkaxlaan xaa nu mkichxub xaa chon welt axta mla lachuzh xaa lo yo. Nu ndaw rop xaa bit ta garlo wechxinn xaa nu mbinn rop xaa, per lee David mbinn masra. 42 Zee nzhé Jonatán lo David:
—Wen nya lu, nel ropse be myaan kwaan le Xaa Tubka Nak, nu nzhé be: "Xaa Tubka Nak zo lo lu nu lo na, lo dii cheen lu nu lo dii cheen na tira".
Zee lee David nya nu lee Jonatán mbare naz lazh.