Saúl nzhekla gut David
19
Ngunii Saúl lo xgann xaa Jonatán, nu lo re xaa nke zhiin lo xaa, zee gut xaa David, per lee Jonatán, xgann Saúl, nkedoola David, 2 zee nzhé xaa lo David:—Xuz na Saúl nzhekla gut lu. Kanap lu lu yee, nu bkaxlaan zee nayazhalt lu lo xaa. 3 Lee na ya kwaan xuz na naz wen gax paro nzholaan lu, zee nii na lo xaa zee naguta xaa lu, zee nii na lo lu kwaan yé xaa lo na.
4 Jonatán ngunii wen David lo xuz xaa Saúl nu nzhé xaa:
—Xuz na, naguta lu David nel nik tub kwaan nawent namlet xaa lo lu, rese kwaan wen mle xaa lo lu. 5 Mzaa xaa yalnaban cheen xaa mdil xaa kwaan Goliat nu mbit xaa xaa, nu mbizh zee lee Xaa Tubka Nak mle yud be zee mle be gan lo re xaa Filistea, nu mzaa Xaa Tubka Nak yalnaban lo re xaa Israel. Ngune luya nu nyakla lu. ¿Chozhiin nzhekla lu gut lu xaa, nik tub kwaan namlet xaa?
6 Mbin Saúl kwaan nzhé Jonatán, nu mcheroo Saúl nu nzhé xaa:
—Mban Xaa Tubka Nak, naguta na xaa.
7 Zee mrezh Jonatán David zee nzhé xaa rese kwaan nzhé Saúl lo xaa. Zee mbe xaa David lo Saúl zee mke xaa zhiin lo xaa mod yilo.
8 Zeera ngu dil stuba zee ngwa David mdil kwaan re xaa Filistea, zee mle xaa gan lo re xaa, zee mchexonn xaa re xaa Filistea lo yalnacheb. 9 Zee mxaal Xaa Tubka Nak tub mbi nawent lo Saúl. Nu nzob xaa garli xaa nu nzho tub kwaan naluch nak yek yaa xaa, nu lee David kayoll bagwel. 10 Zee lee Saúl mle xgab kich kwaan naluch nak yek lextoo David cho bla per liger mbachi xaa lo Saúl, zee nangolt xaaya zee ngwaza cho yo, zee mxonn David yaal zee. 11 Zee mxaal Saúl xaa nke zhiin lo xaa zee ya kanap xaa dub welt garli David zee yani yizhyo gut xaa xaa. Per lee Mical xngwnaa xaa nzhé lo xaa:
—Bxonn nal yaal nel chelee lu naxonnt lu, yee telise ngutla lu.
12 Zee mted Mical David naz roo bentant, zee mle xaa gan zee nanguta Saúl xaa. 13 Zee mzen Mical tub ngwneb nu mzhib meya lo loon pa nzha David, nu mko meya kwaan nak yichled chib nu msaaw meya kwaan tub lee ler. 14 Nu gorna mzhin re xaa mxaal Saúl, zee nzhé Mical lo re xaa:
—Ne nzak me.
15 Zee mbare Saúl mxaal xaa ngwa kwaan David. Nu nzhé xaa:
—Nexa chol ne xaa teno gu axta lo loon cheen xaa zee gut na xaa.
16 Nu gorna mreep xaa mxaal Saúl, zee ngune xaa lee ngwneb naxna lo loon cheen xaa nu nkoo me kwaan nak yich led chib yeka. 17 Zee nzhé Saúl lo Mical
—¿Chozhiin mkade lu na? ¿Chozhiin mlaa lu mle me nayii ne na gan mxonn?
Zee lee Mical mkeb lo Saúl nu nzhé:
—Lee me né lo na: "Laa xonn na, chelee lu nanat lu xonn na, zee gut na lu".
18 Mxonn David, mle xaa gan zee ngwa xaa lo Samuel naz Ramá, zee nzhé xaa rese kwaan mle Saúl lo xaa, zee nya rop xaa ngu naz Naiot naz yezh Ramá. 19 Zee ngwayé xaaya lo Saúl nu nzhé xaa: "Lee David nzo naz Naiot naz Ramá". 20 Zee mxaal Saúl xaa nke zhiin lo xaa yaxii David. Nu gorna ngune xaa lo lak xaa ngunii xtizh Dios, nu noka Samuel nzo kwaan re xaa zee, zee lee Mbi Naban cheen Dios mla tich re xaa nke zhiin lo Saúl, zee noka re xaa ngunii xtizh Dios.
21 Nu gorna ngune Saúl kwaane, lee xaa mxaal stub naz xaa, nu noka re xaa zee mzaa kwent kwaan gak. Zee mbare Saúl mxaal xaa yon welt nu noka lee xaa ngunii xtizh Dios .
22 Zee leeka lee xaa ngwa naz Ramá, nu mzhin xaa roo bzo naro kwaan nzob naz Secú, nu ngunabdizh xaa nu nzhé xaa:
—¿Ma David rop Samuel?
Zee mkeb tub xaa:
—Lee xaa nzo Naiot naz Ramá.
23 Zee ngwa xaa Naiot naz Ramá, nu noka mla Mbi Naban cheen Dios tich xaa nu mzelo xaa ngunii xaa xtizh Dios axta mzhin xaa Naiot naz Ramá. 24 Zee noka mlache xaa xab xaa, nu ngunii xaa xtizh Dios pa nzho Samuel nu mzo cheey xaa dubse mbizh zee nu dubse yaal zee. Sbaa mroo kwaan nii re xaa: "¿Che noka Saúl nzho lo re ngunii xaa xtizh Dios?"