Kwaan myaan Jonatán rop David
18
Nu gorna ngulo ngunii David lo Saúl, zee myenn rop xaa Jonatán nu mkedoola rop xaa. 2 Zee Saúl mle zee mlaz David garli Saúl nu namlaat nya xaa garli xuz xaa. 3 Zee myaan Jonatán kwaan David nel nyenn doo rop xaa. 4 Nu mlache Jonatán xab xaa kwaan nak xaa nu mzaa xaaya lo David, nu mzaa xaa stub naz ler kwaan nkano xaa lo xaa, nu mzaa xaa spad, wez nu yed kwaan nzii lextoo xaa lo xaa.5 Nu nya David loka pa mxaal Saúl xaa nu wen mle xaa rese kwaan. Nu mzo Saúl xaa nabeyy xaa lo re soldad nu nyakla re xaa yezh nu re soldad ne xaa.
Saúl ngok selos David
6 Gorna mbare re xaa lo dil, leezha ngulo mbit David Goliat, xaa Filistea, zee mroo re ngwnaa, me yezh Israel, mkayaa Saúl, nzholl me tambor chuut nu re stub kwaan nzholl me nu nkee re me briink. 7 Nu nzholl re ngwnaa nu nkee re me briink nu mbezh re me:
"¡Saúl mbit tub mil me,
lee David mbit tub chii mil me!"
8 Zee ngunayii doo Saúl nu nanyulat xaa mod mbezh re ngwnaa nu mle xaa xgab: "¡Mbezh re me David mbit tub chii mil xaa, lee na mbit tub milaka xaa, nebse nzho jwalt le re xaa gak xaa rey"! 9 Neta mbizh zee mzelo Saúl mwii nawent David.
10 Nu stub mbizh lee tub mbi mal kwaan mxaal Dios ngunabeyy lextoo Saúl zee ngok naxen xaa leen yoo pa nzho xaa. Nu nzho stak yaa xaa nu lee David tubka nzholl bagwel kwaan nzo chii yiib lo, 11 nu mke Saúl stak yenn David nu mle xaa xgab: "Kich na xaa cho yo". Per lee David mgun nu nangolta xaa, chop welt mle xaa gan nangolt xaaya.
12 Zee nzheb Saúl ne David nel ne xaa lee Xaa Tubka Nak nzo kwaan David per mbachi Xaa Tubka Nak lo Saúl. 13 Zee mxaal Saúl xaa stub pa nu mzaa xaa yalnabeyy lo tub mil soldad. Ngwaner David lo re xaa ya lo dil. 14 Nu lee David wen nle xaa re xchinn xaa nel Xaa Tubka Nak nzo kwaan lee xaa. 15 Nu gorna ngune Saúl wen nle xaa re kwaan zee mzheb Saúl ne xaa. 16 Nu rese xaa Israel nu rese xaa Judá nkedoola David nel lee xaa ngwaner lo re xaa lo dil. 17 Zee nzhé Saúl lo David:
—Za na xchaap na Merab, me yilo, ka lu, nel nak lu tub xaabyi, xaa nanzhebt ndil lo dil cheen Xaa Tubka Nak.
Zee mle Saúl xgab nu nzhé xaa:Mas wen naguta na xaa, laa gut re xaa Filistea xaa. 18 Zee mkeb David lo Saúl nu nzhé xaa:
—¿Cho nak na nu cho nak sawlizh na nu cho nak sawlazh xuz na lo re xaa Israel zee gak na xuzh rey?
19 Nu gorna mzhin mbizh ka David Merab, zee mzaa Saúl me mka Adriel, xaa Mejolá.
20 Per lee Mical, stub xchaap Saúl, nyulara David; nu gorna ngune Saúl, zee nyakdoola xaa. 21 Nu mle xaa xgab: "Chelee David ka xchaap na Mical zee le na tub tramp lo re xaa Filistea kwent cheen me zee gut re xaa David." Zee nzhé Saúl lo David stub welt:
—Gak lu xuzh na nal. 22 Zee mxaal Saúl mos cheen xaa zee yanii lo David nu nzhé xaa: "Wii, nkela rey lu, nu noka re xaa nke zhiin nkela lu. Gok xuzh xaa". 23 Zee lee re xaa nke zhiin lo Saúl mbare nzhé lo David stuba re wdizh zee. Nu lee David mkeb nu nzhé:
—Prob na nu nanont na, ¿xomod gak na xuzh tub rey?
—Gwa guzh lo David: "Nik tub kwaan nankint zaa lu lo rey ka lu xchaap xaa, nebse kwaan nzhekla xaa nak gut lu tub gayoo xaa Filistea, xaa nayii ne na nu yiidno lu tub gayoo yed cho xaabyi.
Per lee xgab cheen Saúl nak zee gut re xaa Filistea David. 26 Nu gorna nzhé re xaa nke zhiin kwaane lo David zee nyakla David gak xaa xuzh rey. Yilo ka xaa xchaap xaa, 27 zee ngwa David kwaan re soldad cheen xaa nu mbit xaa tub chop gayoo xaa Filistea. Zee mbe David kwaan ngunaab Saúl lo xaa zee gak xaa xuzh rey, nu mzaa xaaya lo xaa. Zee mzaa Saúl Mical xchaap xaa mka David.
28 Nu gorna ngune Saúl lee Xaa Tubka Nak nzo kwaan David nu lee xchaap xaa Mical nkedoola David, 29 zee mzheb doo xaa ngune xaa David. Nu tira nayii xaa ngune David dubse mbizh kwaan mban xaa. 30 Nu zyen welt lee re xaa nabeyy lo re soldad Filistea nya ndil kwaan re xaa Israel, nu lee David tuka mle gan lo xaa masra ke lo re stub soldad cheen Saúl, kwaanzee mrib doo xtizh xaa.