Yalgut cheen Saúl nu re xgann xaa
(1 Cr 10.1-12)
31
Re xaa Filistea mdil kwaan re xaa Israel, zee mxonn re xaa Israel lo re xaa Filistea nu ngut zyen xaa naz yi Gilboa. 2 Zee mreke re xaa Filistea tich Saúl nu re xgann xaa nu mbit xaa Jonatán nu Abinadab nu Malquisúa nu re xaa nak xgann Saúl. 3 Nu mzelo re xaa mdil pa mzo Saúl nu mke xaa wez zee mseweey xaa zyen doo xaa. 4 Zee nzhé Saúl lo xaa nzhano re yiib cheen dil: "Bloo spad cheen lu nu bit na napa nze stub xaa leya.Per lee xaa nzhano re yiib cheen dil nzheb leya zee leeka Saúl mzen spad cheen xaa nu mbit xaa leeka lee xaa. 5 Nu gorna ngune xaa nzhano re yiib cheen dil lee Saúl ngutla noka lee xaa mlebi leeka lee xaa yek xspad xaa. 6 Sbaa ngut Saúl mbizh zee tubka kwaan yon xgann xaa nu kwaan xaa nzhano re yiib cheen dil, nu rese xaa xaa. 7 Nu gorna ngune re xaa Israel xaa nzhi stub ta roo yuu Jordán lee Saúl ngut kwaan re xgann xaa zee mxonn mlaa xaa yezh, zee mzhin re xaa Filistea ngu baa.
8 Nu stub mbizh mzhin re Filistea mkiib xcheen re xaa ngut, zee nguzhal Saúl lo xaa nu yon xgann xaa naxtoo yi Gilboa ngutla. 9 Nu mchoog xaa yek xaa nu mkiib xaa xkiib xaa. Zee mxaal re xaa dubse yizhyo cheen xaa Filistea zee yé xaa leen li re dios cheen rese yezh cheen xaa kwaan ngok. 10 Nu mlek xkiib xaa leen yidoo cheen Astarot nu mkenga xaa kwerp cheen xaa xan bla cheen yezh Bet-sán.
11 Gorna lee re xaa Jabes cheen Galaad mzeen kwaan mle re xaa Filistea kwaan xkwerp Saúl, 12 rese xaa nazhebt mze dubse yaal zee mkiib xaa kwerp cheen Saúl nu kwerp cheen re xgann xaa naz bla cheen Bet-sán nu mbe xaaya naz Jabes zee mzek xaaya. 13 Nu mzen xaa re zhit cheen xaa nu msebyo xaaya xan yag ndok naz Jabes nu mkwan xaa gazh mbizh.