Samuel mchub nseyt yek David
16
Zee nzhé Xaa Tubka Nak lo Samuel:—¿Axta cho gor laa lu nagonntra lu kwent cheen Saúl, xaa namzeyalt na ngak rey lo re xaa Israel? Gwa, tazhe nseyt leen kach, zee xaal na lu garli Isaí, xaa Belén, nel lo re xgann xaa mleey na tub xaa gak rey.
2 Zee ngunabdizh Samuel:
—¿Xomod ya na? Chelee Saúl neya, zee gut xaa na.
Lee Xaa Tubka Nak mkeb:
—Be tub la ngoon yeen nu guzh: "Lee na nzhal ted tub gon lo Xaa Tubka Nak". 3 Zee kwezh lu Isaí gaw gon, zeera ni na lo lu cho kwaan nzhaal le lu; nu chub lu nseyt yek xaa ni na lo lu.
4 Nu mle Samuel modxa nzhé Xaa Tubka Nak lo xaa. Gorna mzhin xaa yezh Belén, zee mroo re xaa gol xaa yezh mkayaa xaa. Per mzheb xaa nu ngunabdizh re xaa lo xaa:
—¿Cho zhiin nze lu? ¿Che wen nze lu?
5 —Zee nzhé Samuel lo re xaa:
Aja, lee na nzhal ted gon lo Xaa Tubka Nak —nzhé Samuel lo re xaa: —gok nzhul gu nu te gu zee gaw be gon.
Zeera mle nzhul xaa Isaí nu re xgann xaa nu mrezh xaa re xaa gaw gon. 6 Gorna mzhin re xaa zee ngune Samuel lo Eliab nu mle xaa xgab: "Xaa ne nak xaa mleey Xaa Tubka Nak".
7 Per lee Xaa Tubka Nak nzhé lo Samuel:
—Nawiit lu mod nzhak xaa nixa naro xaa, nel namleyyt na xaa ba, nel na Xaa Tubka Nak, nangwiit na naz tich mod nak re myet, lee na ngwii naz leen lextoo xaa.
8 Zee lee Isaí mrezh Abinadab nu mlu xaa xaa lo Samuel, per lee Samuel nzhé:
—Naleetaka xaa ne mleey Xaa Tubka Nak.
9 Zeera mlu Isaí Sama. Nu lee Samuel nzhé:
—Nixa naleetaka xaa ne mleey Xaa Tubka Nak.
10 Zee lee Isaí mlu gazh xgann xaa lo Samuel; per lee Samuel nzhé lo Isaí.
—Naleet re xaa ne mleey Xaa Tubka Nak.
11 Gwluzhtlaka nzhé Samuel lo Isaí:
—¿Che rese xgann lu nee?
Nu lee xaa mkeb nu nzhé:
—Nzo stub xaa win, xaa nkanap mbakxiil.
Zee lee Samuel nzhé lo Isaí:
—Xaal xaa yichezh xaa, nagawt be chelee xaa nazhint xaa nee.
12 Zee mxaal xaa xaa ngwachezh xaa zee nyaadno re xaa xaa nu mzhin xaa lo re xaa. Mex na yich yek xaa nu chul doo nlu zaalo xaa nu chul doo nzhak xaa. Zee lee Xaa Tubka Nak nzhé lo Samuel:
—Bchuun nseyt yek xaa, nel lee xaa mleey na.
13 Zee mzen Samuel kach kwaan nzho nseyt leen nu mchuun xaa nseyt yek xaa delant lo re wech xaa. Nu mbizh zee lee Mbi Naban cheen Xaa Tubka Nak mla tich David. Zeera mbare Samuel nya naz Ramá.
David nzholl bagwel garli Saúl
14 Zee lee Mbi Naban cheen Xaa Tubka Nak mbachi lo Saúl, zee mxaal xaa tub mbi mal kwaan mcheb doo Saúl. 15 Nu lee re xaa nke zhiin lo xaa nzhé:
—Wii lee mbi mal cheen Xaa Tubka Nak kacheb doo lu. 16 Xaal tub xaa yikwaan tub xaa nzhak nzholl bagwel nu gorna lee mbi mal nze, gorzee lee xaa gool bagwel, gorzee gak wen lextoo lu.
17 Zee lee Saúl nzhé lo re xaa nke zhiin lo xaa:
—Gwakwaan gu tub xaa nzhak nzholl bagwel nu yaadno gu xaa lo na.
18 Zee lee tub xaa nke zhiin nzhé:
—Nlabeyy na tub xgann Isaí, xaa Belén, xaa nzhak wen doo nzholl bagwel. Nanzhebt xaa nu nzhak xaa ndil xaa nu wen nzhedizh xaa nu chul nzhak xaa nu nzo Xaa Tubka Nak kwaan lee xaa.
19 Zee lee Saúl mxaal tub xaa lo Isaí nu nzhé xaa:
—Xaal David xgann lu lo na, xaa nkanap mbakxiil.
20 Zee mxaal Isaí xgann xaa David lo xaa kwaan tub ngwes kwaan zyen doo yat nu yed xis ub nu tub chib lo Saúl. 21 Zee ngwa David lo Saúl zee mzo Saúl xaa zee le xaa xchinn Saúl. Mkedoola xaa xaa, zee ngok xaa nzhano re yiib cheen dil. 22 Zee mxaal xaa xaa nzhé lo Isaí: "Naab na lo lu zee lake David lo na nel nkedoola na xaa". 23 Kad welt gorna lee mbi mal cheen Dios ncheb Saúl, gorzee nzen David bagwel nu nzholl xaaya, gorzee lee Saúl nzhak wen nu gorzee mbachi mbi mal lo xaa.