Xaa Tubka Nak nanzeyalt ngak Saúl rey
15
Tub mbizh nzhé Samuel lo Saúl:—Yilo Xaa Tubka Nak mxaal na zee mteeb na nseyt yek lu zee, nak lu rey lo re xaa Israel. Kwaanzee nal kenzha kwaan né Xaa Tubka Nak. 2 Snee né Xaa Tubka Nak xaa nkano dubse yalnabeyy "Na ted re xaa Amalec bid lo re kwaan mle xaa lo re xaa Israel, gorna msaaw xaa re xey gu naz, gorna mroo xaa Egipto.a 3 Gwa yut Amalec nu tira luuxb lu rese kwaan nkano xaa; nalest la lu ne lu xaa; bit rese xaa xaa, rese xaabyi, rese ngwnaa, rese mad nu rese madoo; noka bit gu rese ma kwaan nkano xaa, ngoon, mbakxiil, Chib kamey nu ngwes."
4 Zee mrezh Saúl re xaa yezh naz Telaim nu mleey xaa chop gayoo mil xaa ya kwaan nii lo dil nu chii mil xaa Judá. 5 Zee nzha Saúl naz yezh cheen Amalec nu msaaw xaa xaa roo yuu. 6 Zee nzhé Saúl lo re xaa Ceneo:
—Broo gu lo re xaa Amalec nu zyaa gu zee nayeta gu tubka kwaan re xaa, nel wen ngok xey gu lo re xaa Israel gorna mroo re xey nu Egipto.
Zee mroo re xaa Ceneo lo re xaa Amalec.
7 Zee mdil Saúl kwaan re xaa Amalec naz Havila nu axta Shur, naz ta nlen mbizh naz Egipto 8 Zee mzen xaa Agag, rey cheen Amalec, nu mbit xaa rese xaa xaa kwaan spad. 9 Per nambita rey Saúl Agag nixa nambita xaa ngoon, ngoon yeen, nixa mbakxiil, re ma nachaa nu chul doo nambita re xaa. Nebse mluux xaa re kwaan nanont.
10 Zee ngunii Xaa Tubka Nak lo Samuel nu nzhé xaa:
11 —Nales nzhak lextoo na mzo na Saúl nak xaa rey nel nawent mle xaa lo na nu namlet xaa kwaan nzhé na lo xaa le xaa.
Nu nayii doo ngok lextoo Samuel gorna mbin xaa kwaane. Dubse yaal zee ngunii xaa lo Dios. 12 Nu garziil doo ngwa Samuel, ngwa kwaan xaa Saúl. Per nzhé re xaa lo xaa: "Lee xaa nzha naz Carmel, nel baa mdexkwaa xaa tub ngwneb cheen leeka lee xaa, zee ngwa xaa naz Gilgal". 13 Zee ngwa Samuel lo Saúl, nu nzhé Saúl:
—Kanap Dios lu. Mlela na kwaan ngunabeyy Xaa Tubka Nak lo na le na.
14 Zee lee Samuel nzhé:
—¿Cho kwaan nak bi cheen mbakxiil nu cheen ngoon kwaan kayon na?
15 Zee lee Saúl mkeb nu nzhé:
—Nak re ma kwaan mkiib re soldad lo re xaa Amalec. Nambita xaa ma zee teed be ma lo Xaa Tubka Nak mod gon per lee stub naz kwaan tira mluux nu.
16 Zee nzhé Samuel:
—Laa nii na kwaan né Xaa Tubka Nak lo na nal yaal.
Nu lee xaa nzhé:
—Néya.
17 Zee nzhé Samuel:
—Nixa yilo nzak lu tira nanont lu, per Xaa Tubka Nak mle zee nak lu rey lo re xaa Israel. 18 Nu mxaal xaa lu le lu kwaan nzhekla xaa nu né xaa lo lu: "Gwa nu bit rese xaa Amalec, xaa nakap nak, nu bdil kwaan re xaa axta yilo tira lux rese xaa". 19 ¿Chozhiin nambint lu kwaan nguné Xaa Tubka Nak? ¿Chozhiin mzen lu re kwaan mkiib gu lo re xaa Amalec? Nawent kwaan mle lu lo Xaa Tubka Nak.
20 Zee lee Saúl mkeb lo Samuel nu nzhé xaa:
—Mbin na kwaan né Xaa Tubka Nak, nu mle na kwaan nguné xaa lo na. Nu mbit na rese xaa Amalec nebse xaa kwaan mlaa na nak rey Agag. 21 Per lee re soldad mbe mbakxiil nu ngoon, ma kwaan mle xaa gan lo dil, zee teed xaa ma lo Xaa Tubka Nak, xaa nak Xtios lu, naz Gilgal.
22 Zee nzhé Samuel:
—Kwaan nyula Dios nak gon lu xtizh, xaa naleet gon kwaan zaa lu lo xaa, mas wen bin xtizh xaa ke teed lu ma lo xaa nu zaa lu ze cheen mbakxiil 23 Xaa nanlet kwaan nii Xaa Tubka Nak, nak kwenta xaa nle yalwezh nu ned yek nak kwenta xaa ngwii lo maj. Mod lu nambint lu xtizh xaa zee nagakt lu rey.
24 Zee lee Saúl nzhé lo Samuel:
—Mle na jwalt, namlet na kwaan né Xaa Tubka Nak lo na nu nambint na xtizh lu. Nel mzheb na ne na re xaa yezh zee mbin na xtizh re xaa. Bche re jwalt cheen na. 25 Ya lu kwaan na zee gool be lo Xaa Tubka Nak naz Gilgal.
26 Zee lee Samuel mkeb nu nzhé:
—Nayat na kwaan lu nel nambint lu xtizh Xaa Tubka Nak, nu Xaa Tubka Nak namzeyalt zee ngak lu rey lo re xaa Israel.
27 Zee lee Samuel myek zee nya, per lee Saúl mre xii xab xaa nu tira mraz xaa xab xaa. 28 Zee lee Samuel nzhé:
—Sbaaka le Xaa Tubka Nak. Nalzhe mkiib xaa yalnabeyy lo lu lo re xaa Israel, nu mzaa xaaya lo stub xaa mas wen ke lu. 29 Lee xaa nak xaa nak Xni cheen re be xaa Israel, nu nankadet xaa nu nixa nacheet xaa mod nzak xaa nel nanakt xaa myet.
30 Zee lee Saúl nzhé:
—Mle na jwalt, per nzhekla na wii re xaa gol respet lo na, gwa kwaan na lo re xaa yezh Israel. Chaa ya be zee gool be lo Xaa Tubka Nak, xaa nak Xtios lu.
31 Zee ngwa Samuel kwaan Saúl naz Gilgal zee mbill rop xaa lo Xaa Tubka Nak.
32 Zee nzhé Samuel:
—Teno Agag, rey cheen Amalec.
Zee nyakdoola Agag mbi lo xaa nu mle xaa xgab nzhé xaa: "Ngulo mded kwaan nala cheen yalgut lo na".
33 Zee nzhé Samuel lo xaa:
—Nel kwaan spad mbit lu xgann zyen doo ngwnaa nu sbaaka yet xgann xnaa lu nalzhe.
Zee mchoog Samuel Agag delant lo Xaa Tubka Nak naz Gilgal.
34 Zee nya Samuel naz Ramá, lee Saúl nya naz garli naz Gabaa cheen Saúl.
35 Nu dubse mbizh kwaan mban Samuel nangunetra xaa lo Saúl. Nu mbinn doo Samuel kwent cheen Saúl, nel ngok nales lextoo Xaa Tubka Nak nel mzo xaa Saúl ngok rey lo re xaa Israel.