Dii cheen Ben nu dii cheen Gad ngu naz ta nlen mbizh yuu Jordán
32
Re xaa dii cheen Ben nu re xaa dii cheen Gad mkano xaa zyen doo ma, zee ngune xaa lee xkizhyo Jazer nu xkizhyo Galaad, nak yizhyo wen doo, pa nxen doo ma. 2 Zee ngwa re xaa nzhé xaa lo Ches nu lo ngwleyy Eleazar nu lo re xaa non yezh:3 —Lee xkizhyo Atarot, Dibón, Jazer, Nimra, Hesbón ,Eleale, Sebam, Nebo nu Beón, 4 yizhyo kwaan mle Xaa Tubka Nak gan kwent cheen re be xaa Israel, naka yizhyo pa nxen doo ma nu lee re nu xaa nak xmos lu, nkano zyen doo ma. 5 Kwaanzee nzhé re xaa chelee lu nzak lu wena, zaa yizhyo ba lo nu zee gaka xcheen nu zee nayat nu yizhyo stub ta Yuu Jordán.
6 Per lee Ches mkeb lo re dii cheen Gad nu lo re dii cheen Ben:
—¿Che zya re wech gu lo dil, lee re gu lakeka nee? 7 ¿Chozhiin sbaa nle lu, zee nyent gan lextoo re xaa Israel, zee nayat xaa yizhyo kwaan mzaa Xaa Tubka Nak lo xaa? 8 Sbaa mle re xey gu xaa yilo, gorna mxaal na xaa Cades-barnea yasewii xaa lo yizhyo.a 9 Zee mzhin xaa roo yuu kwaan le Escol, nu gorna mbare xaa ngwasewii xaa lo yizhyo zee mle xaa zee nangut gan lextoo re xuz be xaa Israel, zee zeeb xaa yizhyo kwaan nzhé Xaa Tubka Nak zaa xaa lo re xaa. 10 Kwaanzee lee Xaa Tubka Nak ngunayii doo nu mcheroo xaa nzhé xaa: 11 "Rese xaa kwaan mroo naz yizhyo Egipto, xaa nzho masra tub gal liin, nazeebt xaa yizhyo kwaan mcheroo na za na lo Abraham, lo Chak nu lo Kob, nel nanalit ngok xaa lo na, 12 nebse Caleb xgann Jefone xaa Cenez nu Josué xgann Nun, ngok nali lo na Xaa Tubka Nak." 13 Nu sbaa lee yalnayii cheen Xaa Tubka Nak mla tich re xuz be xaa mkanze naz wen yizhyo bizh dubse tub choo liin, axta ngulo ngut rese xaa, xaa mle kwaan nawent lo Xaa Tubka Nak. 14 Lee nal re gu nakap nak mod re xuz gu xaa yilo, ¿che nzhekla gu le gu re kwaan mle re xuz gu, zee la yalnayii cheen Xaa Tubka Nak tich rese be stub welt? 15 Chelee re gu nagont gu xtizh Xaa Tubka Nak, lee xaa laa re xaa Israel naz wen yizhyo bizh nu gu le zee lux xaa re xaa.
16 Zee nzhé re xaa lo Ches:
—Dexkwaa nu korrel pa yo re xma nu nu dexkwaa nu yezh pa yo re xngwnaa nu nu re xinn nu. 17 Per lee re nu listla nu wee nu xkiib nu, nu yaner nu lo re xaa be axta le be gan zhino be re xaa yizhyo paro yo xaa. Lee re xinn nu lakeka yezh kwaan nyaaw kwaan bla zee nyent cho kwaan gak re me. 18 Nabaret nu garli nu chelee re xaa Israel zeraka le gan yizhyo kwaan gak xcheen xaa. 19 Nanzheklat nu kano nu yizhyo paro yo re stub naz xaa be, naz stub ta Yuu Jordán, nel nkanola nu xkizhyo nu naz ta nlen mbizh roo Yuu Jordán.
20 Zee lee Ches mkeb lo re xaa:
—Cheleeya sbaa mle gu xgab gwa gu lo dil delant lo Xaa Tubka Nak, 21 bzen rese gu xkiib gu nu bded gu roo Yuu Jordán. nu gwa gu lo dil kwaan Xaa Tubka Nak, le gu gan luux gu re xaa nayii ne gu. 22 Nu gorna yilo le gu gan yizhyo zee nzho mod bare gu, zee kwi wen gu kwaan Xaa Tubka Nak nu kwaan re xaa be, xaa Israel, zee lee yizhyo ne gak xcheen gu, kwaan mzaa Xaa Tubka Nak lo gu. 23 Per chelee gu le guya; zee kale gu jwalt lo Xaa Tubka Nak, zee leeka xjwalt gu teed gu bid. 24 Bdexkwaa gu yezh pa yo re xngwnaa gu nu re xinn gu, nu bdexkwaa gu korrel yo re xma gu, per ble gu kwaan ngunii gu.
25 Zee lee dii cheen Gad nu dii cheen Ben nzhé lo Ches:
—Lee nu xaa nke zhiin lo lu, le kwaan mod ngunabeyy lu lo nu. 26 Re xinn nu nu re xngwnaa nu, nu re xma nu lake re yezh Galaad. 27 Per lee re nu xaa nak xmos lu, zen nu xkiib nu zee ya nu lo dil kwaan Xaa Tubka Nak, modxa ngunabeyy lu lo nu.
28 Zee lee Ches nzhé lo ngwleyy Eleazar nu lo Josué xgann Nun nu lo re xaa nabeyy lo re dii cheen Israel, 29 — Chelee re xaabyi dii cheen Gad nu re xaabyi dii cheen Ben, ded kwaan re gu stub ta roo Yuu Jordán, be gu xkiib gu nu yadil gu kwaan Xaa Tubka Nak, nu gorna le gu gan yizhyo zee zaa gu yizhyo cheen Galaad lo xaa zee gaka xcheen xaa. 30 Per chelee re xaa nayat xaa kwaan re gu, zee nzhaal kayaa xaa yizhyo kwaan gak xcheen xaa lo re gu naz yizhyo Canaán.
31 Zee lee dii cheen Gad nu dii cheen Ben mkeb:
—Lee re nu xaa nak xmos lu le nu kwaan nzhé Xaa Tubka Nak. 32 Ya re nu kwaan xkiib nu naz yizhyo Canaán kwaan Xaa Tubka Nak, per lee yizhyo kwaan gak xcheen nu gak naz ta nlen mbizh roo Yuu Jordán.
33 Zee lee Ches, mzaa lo re xaa dii cheen Gad nu lo re xaa dii cheen Ben nu lo rol dii cheen Manasés xgann Che, rese yizhyo pa ngunabeyy Sehón, rey Amorreo nu pa ngunabeyy Og, rey Basán. 34 Lee re xaa dii cheen Gad mlek xaa yezh Dibón, Atarot nu Aroer, 35 Atarot-sofán, Jazer, Jogbeha, 36 Bet-nimra nu Bet-arán, yezh kwaan nyaaw kwaan bla; noka mdexkwaa xaa xkorel mbakxiil nu xkorel chib. 37 Lee re xaa dii cheen Ben mlek xaa yezh Hesbón, Eleale nu Quiriataim, 38 Nebo, Baal-meón, kwaan mchee xaa le, nu Sibma; rese yezh kwaan mlek xaa mloo xaa leya kwaan kub.
39 Lee re xaa dii cheen Maquir xgann Manasés, ngwa xaa yizhyo Galaad mloo xaa re xaa Amorreo nu ngu xaa zee. 40 Zee lee Ches mzaa yizhyo Galaad lo re xaa nak dii cheen Maquir, xtii Manasés, zee ngu re xaaya. 41 Noka Jair xaa lo dii cheen Manasés mzen re yezh chuut cheen xaa Amoreo nu mloole xaaya Havot-jair. 42 Sbaaka mzen Noba yizhyo Kenat nu re yezh chuut cheena, nu mloole xaaya Noba, modxa nak le xaa.