Mdil xaa kwaan re xaa Madián
31
Ngunii Xaa Tubka Nak lo Ches nu nzhé xaa:2 — Bdil re xaa Madián kwaan le re xaa Israel; zeera yet lu nu zhaal lu kwaan re sawlizh lu.
3 Zee nzhé Ches lo re xaa yezh:
—Bzo list lak gu zee ya gu dil gu kwaan re xaa Madián, nu ya gu yadil gu kwent cheen Xaa Tubka Nak. 4 Xaal gu tub mil xaa lo kad tub dii cheen gu xaa Israel zee ya xaa lo dil.
5 Sbaa mxaal xaa re xaa ngwa lo dil, tub mil xaa Israel ngwa lo kad tub dii cheen xaa Israel; nu chiibchop mil xaa listla ya lo dil. 6 Ches mxaal re xaa ngwa lo dil; tub mil xaa ngwa lo kad tub dii. Noka mxaal xaa Finees, xgann ngwleyy Eleazar, ngwa xaa lo dil, nu mbe xaa lak kwaan nle xchiin xaa leen li Xaa Tubka Nak, nu mbe xaa re trompet kwaan kwezh xaa ya xaa lo dil. 7 Nu mdil xaa kwaan re xaa Madián modxa ngunabeyy Xaa Tubka Nak lo Ches, nu mbit xaa rese xaa. 8 Nu noka mbit xaa gaay rey xaa yezh Madián: Evi, Requem, Zur, Hur nu Reba. Gaay rey cheen yezh Madián mbit xaa. Noka mbit xaa Balaam xgann Beor kwaan spad. 9 Nu mbe re xaa Israel re ngwnaa Madián kwaan re xiin me, nu mbe xaa re ma kwaan nkano xaa, nu re kwaan nzhap xaa. 10 Nu mzek xaa pa mbaz re xaa Madián nu re pa mbaz re xaa. 11 Nu mbe xaa rese kwaan mkiib xaa lo xaa, re xaa nu re ma. 12 Nu mbe xaa re xaa nu re ma lo Ches nu lo ngwleyy Eleazar nu lo re xaa Israel naz Lach Moab paro mbaz re xaa Israel, kwaan nzhi naz yezh Jericó.
13 Zee mroo Ches nu ngwleyy Eleazar, nu re xaa nabeyy lo re xaa yezh zee kayaa xaa xaa naz jwer pa mbaz re xaa. 14 Per Ches ngunayii lo re xaa nabeyy lo re soldad nu lo re xaa nabeyy lo mil xaa nu lo re xaa nabeyy lo tub gayoo, xaa mbare ngwa lo dil. 15 Zee nzhé Ches:
—¿Chozhiin nambita gu re ngwnaa? 16 Mbin me re kwaan nzhé Balaam, nu kwent cheen kwaan mle me, zee mle be jwalt lo Xaa Tubka Nak nel mbill xaa lo Baal-peor, kwaanzee zyen xaa, xaa nak xaa, Xaa Tubka Nak, ngut lo tub yalyizh.a 17 Lee nal bit gu re mad madbyi; nu bit gu re ngwnaa me mchaal xaabyi, 18 nu naguta gu re ngwnaa me zer chaal xaabyi . 19 Per re gu xaa mbit tub xaa nu xaa ngol cho tub xaa ngut, nzhaal lake gu naz jwer pa mbaz re be tub gazh mbizh lee mbizh yon nu mbizh gazh gak nzhul gu, kwaan re xaa mzen gu. 20 Sbaaka nzhaal le nzhul gu re ler nu re kwaan nak yed, nu rese kwaan mdexkwaa xaa kwaan yich led chib nu rese kwaan nak yag.
Mdiiz xaa re kwaan mle xaa gan
21 Zee lee Eleazar xaa nak ngwley nzhé lo re xaa ngwa lo dil:
—Kwaane nak kwaan nabeyy ley kwaan mzaa Xaa Tubka Nak lo Ches: 22 Lee or, plat, brons nu yiib estaño nu plomo, 23 nu rese kwaan nye lo ki, nkin deeda lo ki, zee gak nzhula, zee lee nis nzhul le nzhula. Per rese kwaan nayet lo ki nkin ted gu ya leen nis sbaasa zee gak nzhula. 24 Nu noka zet gu xab gu mbizh gazh, zee gak nzhul gu; zeera nzho mod reep gu paro mbaz re be.
25 Zee nguni Xaa Tubka Nak lo Ches nu nzhé xaa:
26 —Lu nu ngwleyy Eleazar nu re xaa nabeyy lo re dii, blo gu kwent re xaa mle gu gan lo dil nu re ma. 27 Zeera le rol gu re kwaan mle gu gan lo dil lo re xaa ngwa lo dil nu lo re stub xaa yezh. 28 Nu re kwaan mle re xaa gan ngwa xaa lo dil nzhaal koo gu kwaan yalzo na, Xaa Tubka Nak; nu koo gu tuba lo gaay gayoo kwaan yalzo na, cheleeya naka myet, ngoon, ngwes, mbakxiil, nu chib kwaan mle xaa gan. 29 Nu re kwaan zaa re soldad, kayaa ngwleyy Eleazar kwaan nak gon cheen Xaa Tubka Nak. 30 Nu rol net kwaan yalzo re xaa Israel zen gu tuba lo tub choobchiiya, chol naka myet, ngoon, ngwes, mbakxiil, nu rese lo ma, nu zaa luya lo re xtii Leví, xaa nkanap li na, Xaa Tubka Nak.
31 Eleazar mle mod ngunabeyy Xaa Tubka Nak Ches. 32 Nixa namlot xaa kwent re kwaan mzen re soldad lee re kwaan mkiib xaa lo re xaa nayii ne xaa naka xoop gayoo nzho chongal chiin mil mbakxiil nu chib, 33 chon gal nzho chiibchop mil la ngoon, 34 nu chon gal nzho tub mil ngwes, 35 nu galbchiibchop mil ngwnaa, me zer chaal xaabyi. 36 Nu re kwaan mka re xaa ngwa lo dil nak: chongayoo galbchii gaazh mil nzho gaay gayoo mbakxiil. 37 Nu mzaa xaa xoop gayoo chongal chiin mbakxiil lo Xaa Tubka Nak. 38 Nu mka xaa galbchiibxoop mil la ngoon; nu mzaa xaa chongal nzho chiibchop la ngoon lo Xaa Tubka Nak. 39 Nu mka xaa galbchii mil kwaan gaay gayoo ngwes; nu mzaa xaa chon gal tub ngwes lo Xaa Tubka Nak. 40 Nu noka mka xaa chiinmtub mil myet; nu mzaa xaa gal chiibchop myet lo Xaa Tubka Nak. 41 Mzaa Ches kwaan yalzo ngwleyy Eleazar kwaan nyalzo Xaa Tubka Nak modxa ngunabeyy Xaa Tubka Nak lo Ches.
42 Rola yalzo re xaa Israel kwaan mloxa Ches lo re xaa ngwa lo dil; 43 nu leeka leeya yalzo re xaa yezh nu lo reya nak chongayoo galchiibgazh mil nzho gaay gayoo mbakxiil, 44 galbchiibxoop mil la ngoon, 45 galbchii mil kwaan gaay gayoo ngwes, 46 nu chiinmtub mil myet. 47 Nu lo rol re kwaan yalzo re xaa Israel, mzen Ches tuba lo choobchiiya, myet nu re ma nu mzaa xaaya lo re xtii Leví, xaa nkanap li Xaa Tubka Nak, mod ngunabeyy xaa lo Ches.
48 Nu mbii re xaa nabeyy lo re soldad lo Ches xaa nabeyy lo tub mil xaa nu xaa nabeyy lo tub gayoo xaa, 49 nu nzhé xaa lo Ches:
—Lee re nu, xaa nke zhiin lo lu, mbare mloo kwent re xaa ngwa lo dil, xaa nak xaa be nu nik tub xaa nanguta. 50 Kwaanzee zaa nu gon lo Xaa Tubka Nak re kwaan nak or kwaan nguzhal nu: kwaan nyu yaa re ngwnaa, ani, aret nu re nguzbga, zee zii yalnaban cheen be Xaa Tubka Nak.
51 Zee lee Ches nu ngwleyy Eleazar mkayaa re kwaan nak or. 52 Rese or kwaan nak gon kwaan mzaa re xaa nabeyy lo tub mil xaa nu lo tub gayoo xaa lo Xaa Tubka Nak nga tub gayoo tapgal nzho tap kil. 53 Rese xaa ngwa lo dil mzaa xaa or kwaan mkiib xaa lo re madianitas xaa nayii ne xaa. 54 Mkayaa Ches nu ngwleyy Eleazar re or kwaan mzaa re xaa nabeyy lo tub mil xaa nu lo xaa nabeyy lo tub gayoo xaa, nu mbe xaaya garli Xaa Tubka Nak paro nzhaal xaa kwaan lee xaa, zee selazh re xaa Israel kwaan mle Xaa Tubka Nak kwent cheen xaa.