Ley cheen kwaan nyaan xaa lo Dios
30
Ngunii Ches lo re xaa nabeyy lo re dii cheen Israel nu nzhé xaa:—Kwaane nak kwaan ngunabeyy Xaa Tubka Nak. 2 Gorna lee tub xaabyi yaan le tub kwaan lo Xaa Tubka Nak, o cheroo xaa le xaa tub kwaan, nkin le xaa rese kwaan myaan xaa nu nacheet xaa xtizh xaa.
3 &Per chelee tub ngwnaa me techo, me seetaka nzho garli xuz, nu yaan me le me tub kwaan lo Xaa Tubka Nak, zee nkwan me le me kwaan ngolzo me, 4 nu chelee xuz me ne lee me myaan le tub kwaan ngolzo me per nayét xaaya lo me nkin le me rese kwaan myaan me. 5 Per chelee xuz me nazeyalt le me kwaan myaan me, zee nakint le meya, nu lee Xaa Tubka Nak nanaabt kwent lo me nel lee xuz me namlaat le meya.
6 & Chelee tub ngwnaa me techo yaan le tub kwaan nu namlet wen me xgaba nu ka me xaabyi, 7 nu chelee xmyi me neya nu naniit xaa lo me, zee lee kwaan myaan me nu kwaan ngolzo me nkin le meya. 8 Per chelee xmyi me nalaat le meya gorna ne xaaya, zee lee kwaan myaan me nu kwaan ngolzo me le me nagaknont. Zee lee Xaa Tubka Nak, nanaabt kwent lo me.
9 &Per cheleeya byud me o mlaa xaabyi me, nzhaal le me rese kwaan myaan me.
10 &Chelee tub ngwnaa, me nkano xaabyi, yaan le tub kwaan o cheroo me le me tub kwaan nii me, 11 nu gorna lee xmbyi me neya nu naniit xaa lo me, zee lee rese kwaan myaan me nu kwaan ngolzo me nkin le meya. 12 Per chelee xmyi me mbizh kwaan ne xaaya nu yé xaa nanont rese kwaan ngunii me, zee lee Xaa Tubka Nak, nanaabt kwent lo me.
13 &Loka kwaan myaan me le me nu mkwan me nu mcheroo me le me lee xmbyi me nzho mod yé nona o nanonta. 14 Per cheleeya nded tub mbizh nu stub mbizh nu naniit xaa lo me, zee lee rese kwaan myaan me nkin le meya, nu rese kwaan ngolzo me le me, lee xaa yalzo leya nel nanguniit xaa lo me gorna ngune xaaya. 15 Per chelee xaa le nanont xaaya gwluzh gorna mdedla mbizh ngune xaaya, zee tich xaa nzhob xjwalt me."
16 Kwaane nabeyy ley, kwaan mzaa Xaa Tubka Nak lo Ches, lo xaabyi nu lo ngwnaa, lo xuz xaa nu lo xchaap xaa, re me nzhoka garli xuz.