Gon kwaan nzaa xaa yizata mbizh
28
Ngunii Xaa Tubka Nak lo Ches nu nzhé xaa:2 —Gunabeyy re xaa Israel nu guzh lo xaa: nzhaal zaa xaa gon lo na mbizh kwaan nak mbizh zaa xaaya, gon kwaan zeek xaa lo ki mod kwaan gaw na kwaan chul doo nzebech kwaan nak kwaan nkayaa na.
3 &Yé lu lo re xaa: Kwaane gak gon kwaan zaa xaa lo na, Xaa Tubka Nak, yizata mbizh: chop mbakxiil ma mach nu ma wen, ma kwaan nzho tub liin mod gon kwaan zeek xaa. 4 Tub mbakxiil zeek xaa garziil nu stub ma zeek xaa mzhel yizhyo; 5 tubka kwaan gon cheen yalgon. Lee gon cheen yalgon gak chop kil arin wen, nu guch xaaya kwaan tub litr nseyt cheen olib. 6 Kwaane gak gon kwaan tubka zeek xaa lo mdo, kwaan ngunabeyy na Xaa Tubka Nak le xaa, leezha nzho re xaa yi Sinaí, zee gaka kwaan chul doo nze bech lo na. 7 Nu gon cheen xis ub, kwaan nguxoob gak tub litr nu nzhaal zaa xaaya tubka kwaan kad tub mbakxiil. Nu xo xaa xis ub leen li na, Xaa Tubka Nak. 8 Lee stub mbakxiil teed xaa lo na mzhel yizhyo; mod gon kwaan mzaa xaa garziil, zaa xaaya tubka kwaan nak gon cheen yalgon nu gon cheen xis ub, kwaane nak kwaan zaa xaa lo na Xaa Tubka Nak, kwaan chul doo nze bech.
Gon kwaan nzaa xaa yizata sab
9 &Lee zhe sab nzhaal zaa xaa chop mbakxiil, ma mach ma nzho tub liin ma wen, tubka kwaan gon cheen xis ub nu gon cheen yalgon, kwaan nak tap kil arin kwaan wen doo kwaan guch nseyt. 10 Kwaane gak gon kwaan nzek xaa lo mdo yizata sab, tubka kwaan nzek xaa lo mdo yizata mbizh kwaan xis ub.
Gon kwaan nzaa xaa yizata mbee
11 &Yizata mbizh yilotlaka xche mbee nzhaal zaa xaa gon kwaan nzek lo mdo lo na, Xaa Tubka Nak. Gon ne nak chop la ngoon yeen, tub mbakxiil, ma mach ma gro, nu gazh mbakxiil ma mach ma nzho tub liin ma wen. 12 Kad tub la ngoon yeen ma zaa xaa zhaal gon cheen yalgon kwaan gak xoop kil arin kwaan nuch nseyt nu tubka kwaan mbakxiil ma mach ma gro, ma zhaal kwaan tap kil arin kwaan nuch nseyt; 13 nu tubka kwaan kad tub mbakxiil, ma yeen, ma zhaal kwaan chop kil arin kwaan nuch nseyt. Kwaane nak gon kwaan nzek xaa lo mdo lo na, Xaa Tubka Nak, kwaan nak bech kwaan chul doo nzebech. 14 Nu kad tub la ngoon yeen chaal xaa kwaan chop litr xis ub, kad mbakxiil ma mach ma gro, chaal xaa kwaan tub litr yirola, nu kwaan kad tub mbakxiil yeen chaal xaa tub litra. Kwaane nak gon kwaan nzek xaa lo mdo dubse xan mbee yizata liin. 15 Noka nzhaal zaa xaa tub chib mach zee zhe re jwalt cheen xaa lo na, Xaa Tubka Nak, nu zaa xaa gon kwaan yizata mbizh kwaan nzek xaa lo mdo tubka kwaan gon cheen xis ub.
Gon kwaan nzaa xaa lo yalni cheen Paskwa
16 &Lee mbee yilotlaka zhe chida xche mbee, le xaa yalni cheen Paskwa lo na, Xaa Tubka Nak, 17 nu lee zhe chiin xche mbee ne le xaa yalni, nu le xaaya dubse tub gazh mbizh, pa gaw xaa yat kwaan nanyut lebadur leen. 18 Zhe yilotlaka mbizh nambey nzhaal zhaal re xaa nu nalet xaa nik tub zhiin. 19 Nu nzhaal zaa xaa re ma wen zee zeek xaa ma lo mdo lo na, Xaa Tubka Nak: chop la ngoon yeen, tub mbakxiil ma mach ma gro, nu gazh mbakxiil ma mach ma nzho tub liin. 20 Kwaan kad tub la ngoon yeen nzhaal chaal xaa gon cheen yalgon kwaan gak xoop kil arin kwaan nuch nseyt; nu tubka kwaan mbakxiil, ma mach ma gro, nzhaal chaal xaa tap kil arin kwaan nuch nseyt; 21 nu tubka kwaan kad tub mbakxiil ma yeen, nzhaal zaa xaa chop kil arin. 22 Noka nzhaal zaa xaa tub chib mach ma zhe re xjwalt nu gak nzhul xaa zee kwi wen xaa kwaan na. 23 Nu noka zaa xaa gon kwaan nzek xaa ma lo mdo yizata garziil tubka kwaan re gon ne. 24 Snee nzhaal le xaa dubse tub gazh mbizh lo yalni cheen Paskwa, zaa xaa kwaan nak gon kwaan nzek xaa, kwaan chul doo nzebech lo na, mod kwaan gaw na Xaa Tubka Nak. Noka nzhaal zeek xaa gon kwaan nzek xaa lo mdo yizata mbizh tubka kwaan xis ub. 25 Lee mbizh gazh nzhaal zhaal re xaa nu nalet xaa nik tub zhiin.
Gon kwaan nzaa xaa lo yalni cheen sman
26 & Lee mbizh kwaan zaa xaa gon kwaan nak xle yilotlaka lo na, Xaa Tubka Nak, nzhaal zhaal re xaa lo yalni cheen rese sman, nu nalet xaa nik tub zhiin. 27 Nzhaal zaa xaa gon kwaan zeek xaa lo mdo kwaan nak bech kwaan chul doo nzebech lo na, Xaa Tubka Nak: chop la ngoon yeen, tub mbakxiil ma mach ma gro, nu tub gazh mbakxiil ma mach ma tub liin. 28 Kwaan kad tub la ngoon yeen chaal xaa gon cheen yalgon kwaan gak xoop kil arin kwaan nuch nseyt; nu kwaan mbakxiil, ma mach ma gro, chaal xaa tap kil arin, 29 nu kwaan kad tub mbakxiil ma yeen, nzhaal zaa chop kil arin. 30 Nu noka nzhaal zaa xaa tub chib mach ma zhe re xjwalt xaa nu gak nzhul xaa. 31 Noka nzhaal zaa xaa gon cheen xis ub kwaan re ma kwaan zeek xaa. Nu noka nzhaal zeek xaa gon kwaan nzek xaa lo mdo yizata mbizh tubka kwaan gon cheen yalgon. Nu re ma kwaan zaa xaa nzhaal gak ma duzna ma wen.