Números 27

Re xchaap Zelofehad

Zee zee mbid re xchaap Zelofehad xaa ngok xgann Hefer, xgann Galaad, xgann Maquir, xgann Manasés, xaa li Manasés nak xgann Che; nu snee le re me: Maala, Noa, Hogla, Milca nu Tirsa. 2 Nu ngwa re me lo Ches nu lo ngwleyy Eleazar, nu lo re xaa nabeyy lo re xaa yezh, roo li Xaa Tubka Nak, paro nzhaal xaa kwaan re xaa, nu nzhé re me:

3 —Xuz be ngut naz wen yizhyo bizh. Nu namzhaalt xaa re xaa Coré, xaa ngunayii ne Xaa Tubka Nak^a, sinka kwent ngut xaa leeka kwent cheen xaa, nu namkanot xaa xgann xaa. 4 ¡Nawent zhe le xuz nu lo re xaa li xaa nel namkanot xaa xgann xaa! Zaa tub lee leyo lo nu nu lo re xich nu kwent cheen xuz nu.

5 Zee lee Ches nzhé xkwent re me lo Xaa Tubka Nak, 6 zee le Xaa Tubka Nak mkeb lo Ches:

7 —Wli kwaan nzhé re xchaap Zelofehad. Zaa lu kwaan nyalzo xuz xaa nu re wech xaa xich xaa, nu zaa lu yizhyo kwaan gak cheen xuz me lo me. 8 Nu lo re xaa Israel yé lu: Gorna lee tub xaa yet nu nanlaat xaa xgann xaa, zee zaa lu xkizhyo xaa lo xchaap xaa. 9 Nu chelee xaa nankanot xaa nik tub xiin xaa nixa xchaap xaa, zee zaa lu xkizhyo xaa lo re wech xaa; 10 nu chelee xaa nankanot xaa wech xaa, zee zaa lu xkizhyo xaa lo re wech xuz xaa. 11 Chelee xuz xaa nankanot xaa wech xaa, zee zaa lu xkizhyo xaa lo sawlizh xaa xaa gax, zee gaka xcheen xaa . Lo re xaa Israel leeya nak tub ley, mod ngunabeyy na, Xaa Tubka Nak lo Ches.

Josué xaa mzo nii Ches

12 Xaa Tubka Nak nzhé lo Ches:

—Guxoob yek Yi Abarim zee wii lu lo yizhyo kwaan mza na lo re xaa Israel. 13 Gorna yilo wii lu loya, noka lu yet nu zhaal lu kwaan re sawlizh lu mod mzhaal Aarón wech lu kwaan re xaa. 14 Re gu ngok ned lo kwaan ngunabeyy na gu le lu naz wen yo bizh cheen Zin, gorna namlet gu kwaan mxaal na le gu, zee ngunii re xaa yezh nawent lo na , gorna mroo nis cho ke Meribá nu Cades, naz yizhyo bizh cheen Zin.^b

15 Zee mkeb Ches lo Xaa Tubka Nak:

16 —Xaa Tubka Nak, Dios, xaa nabeyy rese xaa mban, bzo tub xaa lo re xaa Israel, 17 bzo tub xaa ya delant lo re xaa zee wee xaa xaa. Nalat lu gak re xaa yezh cheen lu mod mbakxiil, ma nyent cho nkanap.

18 Zee nzhé Xaa Tubka Nak lo Ches:

—Bzo Josué xgann Nun, nel lee xaa nak tub xaa nkano mbi naban, zhib yaa lu yek xaa. 19 Be xaa lo ngwleyy Eleazar nu lo re xaa yezh, nu lo re xaa zaa lu zhiin kwaan le xaa. 20 Zaa lu cheep yalnabeyy xcheen lu lo xaa, zee gon re xaa Israel xtizh xaa. 21 Lee xaa ya lo ngwleyy Eleazar zee ne xaa cho kwaan yé na, Xaa Tubka Nak, lo xaa, modxa nlu na kwaan kwent cheen Urim^c. Kwaan yalnabeyy cheen xaa roo re xaa lo dil nu kwaan yalnabeyy cheen xaa bare re xaa ya lo dil, nu tubka reke re xaa Israel tich xaa.

22 Ches mle mod nzhé Xaa Tubka Nak lo xaa, nu mbe xaa Josué lo ngwleyy Eleazar nu lo re xaa yezh. 23 Nu lee Ches mzhib yaa yek Josué nu mzaa yalnabeyy lo xaa, mod ngunabeyy Xaa Tubka Nak lo xaa.