Welt rop mdoop le re dii cheen Israel naz yizhyo Moab
26
Ngulo mded yalzi, zee lee Xaa Tubka Nak ngunii lo Ches nu lo Eleazar, xgann ngwleyy Aarón, nu nzhé xaa:2 —Toop gu le re xaa yezh Israel, xaa nzho masra tub gal liin, loka lak nak re sawlizh xaa, rese xaa kwaan nzho mod ya lo dil.
3 Ches nu ngwleyy Eleazar ngunii lo re xaa naz wen yizhyo Moab stub ta Yuu Jordán, paro nlu yezh Jericó nu nzhé xaa:
4 —Bkee gu le re xaa nzho masra tub gal liin, modxa ngunabeyy Xaa Tubka Nak lo Ches.
Le re dii xaa Israel, xaa mroo naz yizhyo Egipto nak:
5 Ben ngok xaa yilotlaka lo Jacob; nu lo re xgann Ben mkee xaa le: re xtii Nok, re xtii Falú, 6 re xtii Hezrón, nu re xtii Carmi. 7 Re xaa ne nak re xaa lo dii cheen Ben, lo rese xaa mke le nak choobchon mil kwaan gazh gayoo galbchii xaa. 8 Xgann Falú nak Eliab. 9 Lee re xgann Eliab: nak Nemuel, Datán nu Abiram. Datán nu Abiram, xaa ngok xaa ngunabeyy lo re dii cheen xaa, mzhaal kwaan Coré nu ngunayii re xaa ne Ches nu Aarón, gorna ngunii nawent re xaa lo Xaa Tubka Nak.a 10 Zee lee yizhyo mxal nu mdeba rop xaa ne tubka kwaan Coré; sbaa ngut re xaa gorna lee bal mzek chop gayoo yirol xaa. Kwaane ngok tub nseyn lo re xaa. 11 Per lee re xiin coré nanguta.
12 Lo re xgann Simeón mkee xaa le: Re xtii Nemuel, re xtii Jamín, re xtii Jaquín 13 re xtii Zera, nu re xtii Saúl. 14 Re xaa ne nak re xaa lo dii cheen Simeón, lo rese xaa mke le nak galbchop mil kwaan chop gayoo xaa.
15 Lo re xgann Gad mkee xaa le: re xtii Zefón, re xtii Hagui, re xtii Suni, 16 re xtii Ozni, re xtii Eri, 17 re xtii Arod, nu re xtii Areli. 18 Re xaa ne nak xaa lo dii cheen Gad, lo rese xaa mke le nak choo mil kwaan gaay gayoo xaa.
19 Lo re xgann Judá ngol Er nu Onán, per Er nu Onán ngut xaa yizhyo Canaán.b 20 Lo re xgann Judá mkee xaa le: re xtii Sela, re xtii Fares, nu re xtii Zera. 21 Re xgann Fares ngok re xaa xtii Hezrón nu re xaa xtii Hamul. 22 Re xaa ne nak xaa lo dii cheen Judá, lo rese xaa mke le nak chongal nzho chii mil kwaan gaay gayoo xaa.
23 Lo re xgann Isacar mkee xaa le: re xtii Tola, re xtii Fúa, 24 re xtii Jasub, nu re xtii Simrón. 25 Re xaa ne nak xaa lo dii cheen Isacar, lo rese xaa mke le nak chongal nzho tap mil kwaan chon gayoo xaa.
26 Lo re xgann Zabulón mkee xaa le: re xtii Sered, re xtii Elón, nu re xtii Jahleel. 27 Re xaa ne nak xaa lo dii cheen Zabulón, lo rese xaa mke le nak chongal mil kwaan gaay gayoo xaa.
28 Re xgann Che nak Manasés nu Efraín. 29 Lo re xgann Manasés mkee xaa le: re xtii Maquir, Maquir ngok xuz Galaad. nu Mkee xaa le re xtii Galaad. 30 Lo re xgann Galaad mkee xaa le: re xtii Jezer, re xtii Helec, 31 re xtii Asriel, re xtii Siquem, 32 re xtii Semida, nu re xtii Hefer. 33 Lee Zelofehad, xgann Hefer, namkanot madbyi, nebse madnaa mkano xaa. Snee le re xchaap Zelofehad: Maala, Noa, Hogla, Milca, nu Tirsa. 34 Re xaa ne nak xaa lo dii cheen Manasés lo rese xaa mke le nak choobchiibchop mil kwaan gazh gayoo xaa.
35 Lo re xgann Efraín mkee xaa le: re xtii Sutela, re xtii Bequer, nu re xtii Tahán. 36 Lo xtii Sutela mke xaa le re dii Erán. 37 Re xaa ne nak dii cheen Efraín lo rese xaa mke le nak galbchiibchop mil kwaan gaay gayoo xaa. Rop xaa ne nak xgann Che, nu re dii cheen xaa.
38 Lo re xgann Benjamín mkee xaa le: re xtii Bela, re xtii Asbel, re xtii Ahiram, 39 re xtii Sufam, nu re xtii Hufam. 40 Lo rop xgaan Bela mkee xaa le re xtii Ard nu re xtii Naamán. 41 Re xaa ne nak xgann Benjamín lo rese xaa mke le nak choobgaay mil kwaan xoop gayoo xaa.
42 Lo re xaa xgann Dan mkee xaa le re xtii Súham; re xaa ne nak dii cheen Dan. 43 Re dii cheen Súham lo rese xaa mke le nak chongal nzho tap mil kwaan tap gayoo xaa.
44 Lo re xgann Aser mkee xaa le: re xtii Imna, re xtii Isúi, nu re xtii Bería. 45 Nu lo re xgann Bería mkee xaa le: re xtii Heber, nu re xtii Malquiel. 46 Aser mkano tub xchaap me le Sera. 47 Re xaa ne nak xgann Aser lo rese xaa mke le nak choobchiibchon mil kwaan tap gayoo xaa.
48 Lo re xgann Neftalí mkee xaa le: re xtii Jahzeel, re xtii Guni, 49 re xtii Jezer, nu re xtii Silem. 50 Re xaa nak xgann Neftalí lo rese xaa mke le nak choobgaay mil kwaan tap gayoo xaa.
51 Tub lanee nak rese xaa Israel xaa mke le: xoop gayoo mil nzho tub mil kwaan gazh gayoo nzho galbchii xaa.
Xomod nzhaal kiiz xaa yizhyo lo re xaa
52 Ngunii Xaa Tubka Nak lo Ches nu nzhé xaa:
53 —Bdiiz yizhyo lo re xaa zee gaka xcheen xaa, loka lak nak re dii xaa. 54 Lee re dii xaa zyenra; grora kwaan zaa lu ka xaa; lee re dii xaa nazyent nayizot groya. Kad lo tub dii zaa luya lo loka paro nak re xaa. 55 Lee yizhyo kiiz lu kwaan swert; zee gaka xcheen xaa modxa mke le kad tub xaa nu re dii cheen xaa. 56 Kwaan swert kiiz luya lo dii zyenra nu lo re dii nazyent.
Toop le re dii cheen Leví
57 Lo re xgaan Leví mkee xaa le: re xtii Gersón, re xtii Coat, nu re xtii Merari. 58 Noka re xaa ne nak dii cheen Leví: Libni, Hebrón, Mahli, nu Musi.( Coat ngok xey Amram. 59 Lee xngwnaa Amram le Jocabed, tub me dii cheen Leví, me ngol naz yizhyo Egipto. Kwaan Amram mkano me: Aarón, Ches, nu bzan xaa Mari. 60 Lee xgann Aarón ngok Nadab, Abiú, Eleazar, nu Itamar. 61 Per lee Nadab nu Abiú ngut xaa gorna mzek xaa yaal tub mod nanzhaalt le xaa lo Xaa Tubka Nak.) 62 Lo rese xaa nak dii cheen Leví, nu re xaa nzho masra tub mbee nak tub galbchon mil xaa; nu namket le re xaa lo re xaa Israel, nel namkayaat xaa yizhyo mod re stub naz xaa Israel.
Caleb nu Josué
63 Re xaa ne nak xaa Israel, xaa mtoop Ches nu ngwleyy Eleazar le naz wen Moab, stub ta Yuu Jordán paro nlu Jericó. 64 Lo rese xaa ne nanzhot nik tub xaa kwaan mkee Ches nu ngwleyy Aarón le, gorna mkee xaa le re xaa Israel naz wen yizhyo Sinaí. 65 Nel lee Xaa Tubka Nak nzhé lo re xaa: "Yet re gu naz wen yizhyo bizh", nu nik tub re xaa namlaket, rese xaa ngut. Nebse Caleb, xgann Jefone nu Josué, xgann Nun nanguta.