24
Gorna ngune Balaam nyula Xaa Tubka Nak nii wen xaa lo re xaa Israel, namlet xaa yalwezh mod mle xaa rop welt yilo, sinka mwii xaa naz yizhyo bizh. 2 Nu gorna mlu re xaa Israel lo xaa lee re xaa nzhikwaa kad xaa kwaan dii cheen xaa, zee lee Mbi Naban cheen Dios ngunabeyy lextoo xaa. 3 Zee mbill xaa nu nzhé xaa:"Nzhé Balaam xgann Beor,
mbill na kwaane,
nzhé na kwaan nlu lo na, kwaan nanlut lo re myet;
4 nzhé xaa kwaan mbin xaa, kwaan nzhé Dios lo xaa,
mlu xaa nkano dubse yalnabeyy tub kwaan lo xaa;
mkich xub xaa lo yo per nyun kwaan zer gak lo xaa:
5 ¡Chul doo nzhak li re gu, dii cheen Kob,
Re gu xaa Israel, chul doo nzhak paro nzho gu!
6 Gu nak mod yo bzo naro kwaan nzhi roo yuu,
mod yilo kwaan nzob roo yuu,
mod áloe kwaan mxeen Xaa Tubka Nak,
mod yag sedr kwaan nzeb pa nzho nal nis.
7 Israel kano nal doo nis,
go xaa nu zoog xaa re xcheen xaa.
Lee rey cheen xaa nkanora yalnabeyy lo rey Agag,
nu lee pa nabeyy xaa gak narora.
8 Dios nak xaa mloo xaa yizhyo Egipto,
nkano xaa jwers mod ngoon.
Nu Israel mluux xaa re xaa nayii ne xaa,
nu nle byog xaa xchit re xaa,
nu nseweey xaa xaa kwaan wez cheen xaa.
9 Nzha xaa Israel mod tub mbezh,
mod tub mbezh gol, ¿nu cho nzho mod kosche ma.?
¡Nii wen na lo re xaa nii wen lo lu,
xobde na lo re xaa xobde lo lu! [Gen 27:29]
Stub kwaan nzhé Balaam, kwaan gak
10 Zee lee Balac ngunayii doo lo Balaam, nu mchaal xaa yaa xaa nu nzhé xaa:
—Mrezh na lu zee xobde lu lo re xaa nayii ne na, per lee lu ngunii wen lo re xaa yon welt ne. 11 Lee nal zyaa lazh lu. Na nzhé za na zyen doo kwaan lo lu, per lee Xaa Tubka Nak mle zee nakayaat luya.
12 Lee Balaam mkeb:
—¿Che nanzhét na lo re xaa mxaal lu: 13 "Nixa zaa Balac li xaa kwaan nyazhe plat nu or leen, nyent mod le na kwaan nanét Xaa Tubka Nak, nixa kwaan wen nixa kwaan nawent, nebse kwaan kwent cheen na; per kwaan né Xaa Tubka Nak kwaanzee ni na"? 14 Lee nal lee na nya lazh na; per laa ni na tub kwaan lo lu, cho kwaan le re xaa ne lo re xaa lu re mbizh ne.
15 Zee mbill xaa nu nzhé xaa:
"Nzhé na, xaa nak Balaam xgann Beor,
nzhé na kwaan nlu lo na, kwaan nanlut lo re myet;
16 nzhé xaa mbin kwaan nzhé Xaa Tubka Nak,
mlu xaa nzob naz yiba yalnzhak cheen xaa lo na,
mlu xaa nkano dubse yalnabeyy tub kwaan lo na;
mkich xub na zee mlu Dios lo na:
17 Nlu tub xaa lo na, per nyent xaa nal;
nlu xaa lo na per nanlut xaa gax.
Roo tub xaa lo re xtii Kob, gak mod tub mbal yiba,
roo tub rey lo re xaa Israel.
Taazh xaa yek re xaa Moab
nu luux xaa re dii cheen Set.
18 Le xaa gan nabeyy xaa yizhyo cheen re xaa Edom, noka nabeyy re xaa Seir,
re xaa nayii ne xaa.
Lee re xaa Israel gak ngezhra.
19 Lo Kob roo tub xaa le gan
nu luux xaa re kwaan lake leen yezh."
20 Gorna mwii Balaam lo Amalec, nu mbill xaa nu nzhé xaa:
"Amalec nak tub yezh non doo lo rese yezh,
per tira luxa."
21 Gorna mwii xaa lo re xaa Ceneo, nu mbill xaa nu nzhé xaa:
"Nye nak paro nzho lu;
nu lee yezh cheen lu nak mod laaz kwaan nzob cho ke.
22 Per lee re gu xaa nak dii chee Ceneo lux gu tira,
gorna lee re xaa Asiria wee gu sebyoo gu."
23 Mbill xaa nu nzhé xaa:
"¡Ay! ¿Cho banra gorna lee Dios le re kwaane?
24 Yiid re bark kwaan roo naz yezh Quitim, kwaan nzhi roo nistoo,
nales doo ded re xaa Asiria nu re xaa Heber lo yalzi,
per noka lee xaa lux tira.
25 Zee lee Balaam mbare, noka Balac mbare.