23
Balaam nzhé lo Balac:
—Bdexkwaa gazh mdo nee, nu list zo lu gazh ngoon yeen nu gazh mbakxiil.
2 Balac mle kwaan nzhé: Balaam zee mted tub la ngoon yeen nu tub mbakxiil lo kad tub mdo.
3 Zee nzhé Balaam lo Balac:
—Bzo gax lo mdo pa mted lu ma, lee na ya zee nel che zhaal na kwaan Xaa Tubka Nak, nu loka kwaan né xaa lo na ni naya lo lu.
—Gazh mdo mdexkwaa na, nu kad lo tub mdo mted na tub la ngoon yeen nu tub mbakxiil.
5 Zee lee Xaa Tubka Nak nzhé kwaan yé Balaam, nu nzhé xaa:
—Bare pa nzo Balac nu guzh lo xaa kwaan ni na lo lu.
6 Zee mbare Balaam lo Balac, lee xaa nzo lo mdo cheen xaa, paro nzo xaa kwaan xaa non lo re xaa Moab. 7 Zee lee Balaam mbil kwaane:
"Naz Aram ngwaxii Balac na,
rey, xaa non Moab, mxaal xaa yichezh na axta naz ta yi pa nlen mbizh.
¡Te, zee xobde lu Kob;
te, zee yii lu ne lu re xaa Israel!
8 ¡Nyent mod xobde na xaa kwaan naxobdet Dios!
¡Nyent mod yii na ne na re xaa nyakla Xaa Tubka Nak ne!
9 Nel axta yek ke nyun re xaa lo na,
nu axta pa mas ya nzeb nyun xaa lo na;
Nyun lo na tub yezh kwaan mroo xa,
nu nanzakt xaa nak xaa kwenta re stub naz yezh.
10 ¡Nyent xaa nzho mod koo kwent lak nak re xaa dii cheen Kob,
nixa nyent mod koo xaa kwent lak nak tub part lo tap part re xaa Israel!
Nzhekla na yet na mod yet re xaa nali nak,
nu nya na pa nya re xaa nali nak.
11 Zee nzhé Balac lo Balaam:
—¿Cho kwaan mle lu lo na? Ngwaxii na lu zee xobde lu lo xaa nayii ne na, ¡ nu lee lu nzhekla nii wen lo xaa!
12 Lee xaa mkeb nu nzhé xaa:
—¿Che nzak lu nanzhaalt ni na kwaan né Xaa Tubka Nak lo na?
13 Zee nzhé Balac:
—Naab na lo lu zee yiid lu lo nu ne, zee wii lu lo nebse lo tub part re xaa yezh ne, zee xobde lu lo xaa axta paro nzo lu.
14 Zee mbe xaa xaa naz wen cheen Zofim, naz yek Yi Pisga. Naz ba ngunabeyy xaa re xaa xaa mdexkwaa xaa gazh mdo, nu mted xaa tub la ngoon yeen nu tub mbakxiil lo kad tub mdo.
15 Zee nzhé Balaam lo Balac:
—Bzo lo mdo cheen lu, lee na ya zhaal kwaan Xaa Tubka Nak baa.
16 Zee lee Xaa Tubka Nak mzhaal kwaan Balaam, mle xaa zee yé xaa kwaan nzhekla xaa, nu nzhé xaa:
—Bare pa nzo Balac, nu snee yé lu lo xaa.
17 Zee mbare xaa lo xaa, nu lee xaa nzo lo mdo cheen xaa, nu mzhake re xaa nabeyy Moab tich xaa. Balac mnabdizh lo xaa nu nzhé xaa:
¿Cho kwaan né Xaa Tubka Nak lo lu?
18 Zee lee Balaam mbill nu nzhé:
—Balac, xgann Zipor, kenzha kwaan ni na:
19 Dios nanakt myet zee kade xaa,
nixa nanakt xaa xgann myi zee che xaa mod mlela xaa xgab.
¿Napa ne lu nii xaaya nu nalet xaaya?
¿Napa ne lu né xaaya nu nalet xaaya?
20 Mxaal xaa na nii wen na lo re xaa;
lee xaa ngunii wen lo xaa zee nyet mod xobde na xaa.
21 Na wiit xaa lo kwaan nawent kwaan mle Kob,
nu nixa nawit xaa lo kwaan nawent kwaan le re xaa Israel.
Xaa Tubka Nak, Xtios xaa, nzo kwaan lee xaa,
nu nyakla re xaa Israel lee re xaa mbazhe lo xaa lee xaa nak rey cheen xaa.
22 Dios mloo re xaa Egipto,
nu nkano xaa yalngezh mod ngoon.
23 Nyent yalwezh le gan lo Kob,
nu nixa nyent bruj le gan lo re xaa Israel.
Yé xaa yizhyo: "¡Wen mle Dios lo Kob nu lo re xaa Israel"!
24 Yezh ne yasya mod mbezh gol,
nu mod mbezh mach yasya re xaa.
Nu nambazt ma axta le ma gan zen ma ma,
nu nzho ma ren cheen ma ngut.
25 Zee nzhé Balac lo Balaam:
—¡Naxobdet lu lo xaa, nu nixa nii nawent lu lo xaa.
26 Balaam mkeb lo Balac nu nzhé xaa:
—¿Che nanguniit na lo lu rese kwaan né Xaa Tubka Nak lo na, nkin nii naya lo lu?
27 Zee nzhé Balac lo Balaam:
—Naab na lo lu zee yiid lu lo nu ne, zee we na lu stub pa, zee nel che zeyal Dios xobde re xaa ba paro nzo xaa.
—Bdexkwaa gazh mdo, nu list bzo lu gazh ngoon yeen nu gazh mbakxiil.
30 Balac mle mod nzhé Balaam nu mted xaa tub la ngoon yeen nu tub mbakxiil lo kad tub mdo.