Rey Balac mxaal xaa ngwachezh Balaam
22
Re xaa Israel mroo nu mlaz xaa naz wen yizhyo bizh Moab, roo yuu Jordán, paro nlu Jericó.2 Gorna ngune Balac xgann Zipor re kwaan mle re xaa Israel lo re xaa Amorreo, 3 zee mzheb doo re xaa yizhyo Moab ngune re xaa Israel, nel zyen doo re xaa, 4 zee nzhé re xaa lo re xaa gol xaa yizhyo Madián:
—Lee nal re xaa ne luux rese kwaan nkano be modxa nluux ngoon yix kwaan nzeb wen.
Lee mbizh zee, Balac xgann Zipor, nak rey naz Moab, 5 zee mxaal xaa lak xaa yichezh Balaam xgann Beor, xaa nzho naz Petor kwaan nzhikwaa gax roo yuu Éufrates. Balac mxaal xaa ne nzhé: "Naz Egipto mroo zyen doo xaa nu nguzhe xaa dubse yizhyo nu nze xaa yo xaa gax paro nzhoo na. 6 Naab na lo lu zee yiid lu, zee xobde lu re xaa yezh ne xkwent na nel mas ngezhra xaa lo na; zeesi le na gan lo re xaa nu ko na xaa yizhyo, Na ne xaa kwaan nii wen lu lo wen yo xaa le xaa kwaan xobde lu lo na went yo xaa.
7 Zee mroo re xaa gol xaa yizhyo Moab nu re xaa gol xaa yizhyo Madián, nu mbe xaa demi kwaan kix xaa ka xaa. Nu gorna mzhin xaa zee nzhé xaa kwaan nzhé Balac. 8 Zee lee Balaam mkeb:
—Lake gu nawzhe, zee lee na ni lo gu kwaan né Xaa Tubka Nak lo na.
—¿Cho xaa nzo kwaan lu?
10 Zee lee Balaam mkeb lo Dios:
—Balac xgann Zipor, xaa nak rey yizhyo Moab, mxaal re xaa né lo na: 11 "Naz Egipto mroo zyen doo xaa nu nguzhe xaa dubse yizhyo. Yiid lu nal nu xobde lu re xaa; zeesi nzho mod le na gan lo re xaa nu ko na xaa lo yizhyo ne."
12 Zee lee Dios nzhé lo Balaam:
—Nayat lu kwaan re xaa mxal Balac nu nixa naxobdet lu re xaa Israel nel na ngunii wen lo re xaa.
13 Nguni yizhyo nguxche Balaam nu nzhé xaa lo re xaa gol, xaa nak xaa Balac:
—Bare gu xkizhyo gu, nel lee Xaa Tubka Nak nanzheklat ya na kwaan gu.
14 Zee lee re xaa non xaa yizhyo Moab mbare lo Balac nu nzhé re xaa:
—Balaam nanzheklat yiid kwaan re nu.
15 Mbare Balac mxaal stub naz xaa mas non nu mas zyenra xaa lo re xaa yilo, 16 nu ngwa re xaa lo Balaam nu nzhé xaa:
—Snee né Balac xgann Zipor: "Nalaat lu zee nik tub xaa le zee nayiidt lu lo na, 17 nalet lu xgab le non doo na lu nu le na rese kwaan né lu. Te nal nu xobde lu re xaa yezh ne."
18 Per lee Balaam mkeb lo xmos Balac:
—Nixa zaa Balac li xaa kwaan nyazhe plat nu or leen lo na, nyent mod le na kwaan nanét Xaa Tubka Nak, xaa nak Xtios na, nixa kwaan win nixa kwaan naro. 19 Naab na lo gu nal lake gu nee nawzhe, zee ne na cho kwaan né Xaa Tubka Nak lo na.
20 Lee yaal zee mlu Dios lo Balaam nu nzhé xaa:
— Chelee re xaa nzechezh lu gwa kwaan re xaa; per le lu nebse kwaan ni na lo lu.
Mandad cheen Xaa Tubka Nak nu xpur Balaam
21 Balaam nguxche garziil doo nu mlo xaa xab xpur xaa nu nzha xaa kwaan re xaa non xaa yizhyo Moab. 22 Per lee yalnayii cheen Dios mla nel nzha xaa kwaan re xaa zee, nu lee mandad cheen Xaa Tubka Nak msaaw naz. Nu lee xaa nzob tich xpur xaa nzha xaa, nu noka nzha xchop xaa nke zhiin lo xaa. 23 Gorna lee mandad cheen Xaa Tubka Nak mlu lo bur nzo leen naz kwaan spad, zee mroo ma naz nu mzeeb ma naz leen wen. Per lee Balaam mla bar tich ma zee bare ma naz leen naz. 24 Zee lee mandad cheen Xaa Tubka Nak mzo saaw leen naz, naz leen yag ub paro nsaaw ke tub ta nu stub ta. 25 Gorna lee bur mlaach lo mandad cheen Xaa Tubka Nak, zee mke ma cho bla, nu mtaaw ma kor Balaam cho bla. Zee lee Balaam mla bar tich ma stub welt. 26 Nu lee mandad cheen Xaa Tubka Nak mzo len naz zee nyentra mod ngded lad li nu lad beg. 27 Gorna mlaach bur lo mandad cheen Xaa Tubka Nak, zee ngoot ma lo yo. Zee lee Balaam mzhaal xyan zee mzaa yag xaa ma. 28 Zee lee Xaa Tubka Nak mle zee lee bur ngunii nu nzhé ma lo Balaam:
—¿Cho kwaan mle na lo lu; kwaane nzha chon welt nzhala luya tich na?
29 Balaam mkeb:
—¿Chozhiin kayitno lu na? ¡Chol nzho tub spad yaa na nal gorne gut na lu!
30 Lee bur nzhé lo Balaam:
—¿Che nanakt na xpur lu? Tich na nzob lu axta yilo nu mbizh nalzhe ¿Che nzho tub welt nzha le na snee lo lu?
—Aa
—mkeb Balaam.
31 Zee lee Xaa Tubka Nak mxal garlo Balaam, zee mlu mandad cheen Xaa Tubka Nak lo xaa nzo leen naz, nzho spad yaa. Balaam mkichyek axta mla lachuzh lo yo. 32 Lee mandad cheen Xaa Tubka Nak nzhé:
—¿Chozhiin mla luya tich xpur lu chon welt? Na nak xaa msaaw leen naz, nel kwaan nzha le lu nanakta kwaan wen lo na. 33 Lee bur ngune lo na nu namdedt ma lo yon welt ne. Nu chelee ma ngded ma lo na, ngulola mbit na lu nu lee ma banaka.
34 Zee lee Balaam nzhé lo xmandad Xaa Tubka Nak:
—Mle na jwalt nel nanet na chelee lu msaaw delant lo na leen naz; per lee nal cheleeya nzak lu nawenta, bare na.
35 Per lee mandad cheen Xaa Tubka Nak nzhé lo Balaam:
—Gwa kwaan re xaa ba; per nebse yé lu re wdizh kwaan ni na lo lu.
Zee lee Balaam ngwa kwaan re xaa non, xaa mxaal Balac. 36 Gorna lee Balac mbin lee Balaam nze, ngwa xaa mkayaa xaa xaa tub yezh cheen Moab, gax roo Yuu Arnón paro nzhaal xkizhyo xaa. 37 Zee lee Balac nzhé lo Balaam:
—Mxaal na xaa ngwachezh lu, ¿chozhiin nanzheklat lu nyiid lu lo na? ¿Che nle lu xgab nyent mod za na zyen doo kwaan lo lu?
38 Zee lee Balaam mkeb lo Balac:
—Wii, nzola na lo lu. ¡Per nyent mod le na kwaan nzhekla lu; nebse nzho mod ni na kwaan né Dios lo na.