Mdil Arad rey cheen Canaán
21
Gorna mbin rey xaa nzho yezh Arad cheen Canaán, xaa nzho yizhyo Neguev, lee re xaa Israel nze naz Atarim, mdil xaa kwaan re xaa Israel nu mzen xaa lak xaa. 2 Zee lee re xaa Israel myaan kwaan Xaa Tubka Nak, nu nzhé xaa: "Chelee lu koo xa lu re xaa yezh ne lo nu, luux nu re xaa ". 3 Zee lee Xaa Tubka Nak mloo xa re xaa, mod nzhé re xaa Israel, zee mle re xaa gan lo rey xaa Canaán nu mbit xaa re xaa nu mluux xaa re yezh cheen xaa. Kwaanzee mlo lee xaa baa Hormaa.Mball ma nak brons
4 Zeera mroo xaa Yi Hor nu nzha xaa naz kwaan nzha naz Nistoo Naxne, zee mlo xaa welt zee mded naz roo yezh Edom. Per nanyulat re xaa naz zee 5 nu mzelo re xaa ngunii nawent xaa Dios nu Ches:
—¿Chozhiin mloo lu nu Egipto zee yet nu naz wen yizhyo bizh? ¡Nyent yat gaw nu nixa kwaan go nu! ¡Ngulola nguchib yat naguuzh ne lextoo nu!
6 Zee lee Xaa Tubka Nak mxaal lak mball, ma nayii doo, lo re xaa yezh. Zee ndawye ma re xaa, zee ngut zyen doo xaa Israel. 7 Zee lee re xaa Israel ngwa lo Ches nu nzhé xaa:
—Mle nu jwalt nel ngunii nawent nu lo Xaa Tubka Nak nu lo lu. Naab lo Xaa Tubka Nak zee kiib xaa re mball ne lo re nu zee ngunaab Ches kwent cheen re xaa Israel..
8 Zee lee Xaa Tubka Nak mkeb:
—Dexkwaa tub mball nu kee gu ma yek tub yag; nu loka xaa kee maya zee gorna wii xaa lo mball ma nak brons zee ban xaa.
9 Zee mdexkwaa Ches tub mball ma nak brons nu mkee xaa ma yek tub yag nu gorna kee maya xaa, zee gorna wii xaa lo mball ma nak brons zee ban xaa.
Re xaa Israel mri dub welt yizhyo Moab
10 Zeera ngwa re xaa Israel naz Obot nu baa mlaz re xaa. 11 Zeera mroo xaa naz Obot nu ngwa xaa mlaz xaa Ije-abarim naz wen pa nyun Moab, naz pa nlen mbizh yizhyo Moab. 12 Zeera mroo xaa nzha xaa nu mlaz xaa naz lach cheen Zered. 13 Nu zeera mroo xaa nzha xaa naz stub ta Yuu Arnón, kwaan nzhi naz wen yobizh, paro nzhaal xkizhyo xaa Amorreo kwaan xkizhyo xaa Moab , nel lee Yuu Arnón nak paro nzhaal ropse yezh. 14 Kwaanzee nzhé yech kwaan nzaa kwent cheen kwaan dil xaa cheen Xaa Tubka Nak:
"Kwaan mle xaa leen Nistoo Naxne
nu roo Yuu Arnón;
15 nu naz ta roo yuu kwaan nzha naz Ar
naz paro nzhaal xkizhyo re xaa Moab"b.
16 Zee mded xaa bzo kwaan le Beer, paro nzhé Xaa Tubka Nak lo Ches: "Btoop re xaa yezh, zee za na nis go re xaa".
17 Zee mbill re xaa Israel kwaane:
"¡Roo, nis leen bzo! ¡Gool re beya!
18 Bzo kwaan mdeen re xaa non,
xaa nabeyy lo re xaa yezh mdeena,
kwaan xpaston xaa mdeen xaaya ."
Zee ngwa re xaa Matana, 19 zee ngwa xaa Nahaliel naz Nahaliel mroo xaa zee ngwa naz Bamot, 20 zee ngwa xaa naz lach wen yizhyo Moab, pa nyun yek Yi Pisga, kwaan ngwii naz yizhyo bizh.
Mle Israel gan lo Sehón, rey cheen xaa Amorreo
21 Zee lee re xaa Israel mxaal lak xaa ya yé lo Sehón rey cheen xaa Amorreo, kwaan wdizh ne:
22 "Naab na lo lu zee laa lu ded nu xkizhyo lu; nadedt nu pa nzhaan gu nu nixa nadedt nu leen yag ub cheen gu, nu nixa nagot nu nis xpos gu, sinka lee nu ded naz kwaan nali nded axta yilo ded nu leen xkizhyo lu".
23 Per lee rey Sehón namlaat mded re xaa Israel leen xkizhyo xaa, sinka mtoop xaa re xaa xaa nu mroo re xaa mdil xaa kwaan re xaa Israel. Nu mzhin Jahaza, naz yizhyo bizh, zee mdil xaa kwaan re xaa Israel. 24 Zee mbit re xaa Israel re xaa xaa nu mzen xaa xkizhyo xaa, re yizhyo kwaan nzhi xsaw Yuu Arnón nu Yuu Jaboc, nu axta paro nzhaal re xaa Amón, nel paro nzhaal re xaa Amón nyaawa. 25 Zee mzen re xaa Israel rese yezh cheen xaa, nu gu re xaa rese yezh cheen re xaa Amorreo, naz Hesbón nu dubse pa nabeyya. 26 Nel Hesbón ngok yezh cheen Sehón, rey cheen xaa Amorreo, xaa kwaan mdil yilo kwaan rey cheen Moab, nu mkiib xaa dubse pa nabeyy xaa axta Yuu Arnón.
27 Kwaanzee nii re xaa nzhak:
"Te gu ne yezh Hesbón yezh cheen Sehón, bdexkwaa guya nu ble kub guya.
28 Nel bal mroo naz Hesbón, nu mroo ki naz yezh Sehón,
nu mzeka Ar yizhyo Moab, nu re xaa nzho roo Yuu Arnón.
29 ¡Aka nales doo nzhak re gu xaa Moab!
¡Kalux yezh cheen gu, xaa nak xaa Quemos, xaa nak xtios gu,
nu mtexon xaa re xgann gu nu lee re xchaap gu mbe xaa zee ngok me me nke zhiin!
Re kwaan nakap ne ngok kwent cheen Sehón, rey cheen xaa Amorreo.
30 Mbit nu re xaa ngu Hesbón axta re xaa ngu Dibón,
nu mbit nu re xaa Nofa nu re xaa Medeba.
31 Sbaa ngu Israel yizhyo cheen re xaa Amorreo.
Mle Israel gan lo Og, rey cheen xaa Basán
32 Noka mxaal Ches xaa ya labeyy Jazer; nu mle re xaa gan xkizhyo xaa, nu mloo re xaa Israel xaa nzho Amorreo. 33 Zeera ngwa xaa naz Basán. Zee mroo rey Og, rey cheen xaa Basán, kwaan re xaa xaa zee dil xaa kwaan xaa Israel naz Edrei. 34 Zee nzhé Xaa Tubka Nak lo Ches:
—Nazhebt lu, nel na za re xaa yezh nu xkizhyo xaa lo lu. Ble leeka kwaan mle lu kwaan Sehón, rey cheen xaa Amorreo, xaa kwaan ngunabeyy naz Hesbón.
35 Sbaa mle xaa lo xaa nu lo re xiin xaa nu lo re xaa xaa, nu mzen xaa xkizhyo xaa nu mbit xaa rese xaa.