Nis kwaan mroo cho ke
20
Lee mbee yilotlaka lo liin, re xaa Israel mzhin yizhyo bizh pa le Zin nu mlaz xaa yezh Cades. Baa ngut Mari nu mkaach xaa me.2 Nel nyent nis go re xaa yezh, zee mdoop re xaa nu ngunii nawent re xaa lo Ches nu lo Aarón. 3 Zee lee re xaa nayii lo Ches, nu nzhé xaa:
—¡Maleey nget nu gorna ngut re wech nu delant lo Xaa Tubka Nak! 4 ¿Chozhiin nzeno gu re nu re nak xaa Xaa Tubka Nak naz yizhyo bizh ne, zee yet nu kwaan re xma nu? 5 ¿Nu chozhiin mloo gu nu yizhyo Egipto, zee nzeno gu nu pa nawent ne? Tub pa nyent mod gaan nu, yag ig, yag ub, nixa garnad, nixa nis go nu nyent.
6 Zee lee Ches rop Aarón mlaa re xaa yezh nu ngwa xaa roo li Xaa Tubka Nak, nu mkichyek xaa axta mla lachuzh xaa lo yo. Zee lee xni cheen Xaa Tubka Nak mlu lo xaa. 7 Zee lee Xaa Tubka Nak nzhé lo Ches:
8 —Bzen xpar lu nu btoop re xaa yezh, kwaan wech lu Aarón, nu nii lu lo ke delant lo re xaa. Zee roo nis choya, sbaa koo lu nis cho ke; zee zaa lu nis go re xaa nu re xma xaa.
9 Zee lee Ches mzen bar delant lo Xaa Tubka Nak, modxa ngunabeyy xaa xaa. 10 Zee mtoop Ches rop Aarón re xaa yezh paro nzob ke, nu nzhé xaa lo re xaa:
—¡Xaa nakap, bkenzha gu nal! ¿Che zle be zee roo nis cho ke ne zee go gu?
11 Nu mlep Ches yaa Ches nu mla xaa xpar xaa chop welt cho ke. Zee mroo nal doo nis, zee ngu re xaa yezh nu re xma xaa. 12 Per lee Xaa Tubka Nak nzhé lo Ches nu lo Aarón:
—¡Nel namwit gu lo na, zee mle nanont gu na lo re xaa Israel, kwaanzee nazeebt gu kwaan re xaa yezh ne yizhyo kwaan ni na za na lo gu!
13 Pa nlen nis le Meribá, pa myech re xaa, nel ngunii nawent xaa Israel lo Xaa Tubka Nak, nu lee xaa mlu yalnambey cheen xaa lo re xaa.
Re xaa Edom namlaat mded re xaa Israel
14 Axta Cades Ches mxaal xaa lo rey cheen yizhyo Edom nu nzhé xaa:
—Snee né wech lu Israel: Lu ngune wen xomod mded nu bid. 15 Lee re xey nu, xaa yilo nya ngu naz yizhyo Egipto zyen doo liin, per lee re xaa yizhyo Egipto mle nawent lo re nu nu lo re xey nu. 16 Zee ngunii nu lo Xaa Tubka Nak, nu lee xaa mbin xtizh nu, zee mxaal xaa tub mandad cheen xaa mloo xaa nu yizhyo Egipto. Lee nal nzo nu Cades, yezh kwaan gax nzhikwaa lo xkizhyo lu. 17 Naab nu lo lu zee laa lu ded nu xkizhyo lu. Nadedt nu paro nzhaan lu nixa paro nzeb yag ub cheen lu nixa nagot nu nis leen xpos lu; lee nu ya Naz kwaan nalise nded, nixa narexchot nu axta yilo ded nu xkizhyo lu.
18 Zee lee rey cheen yezh Edom mkeb:
—Nadedt gu xkizhyo na; napa lee na roo kwaan xsoldad na saaw na gu.
19 Zee lee re xaa Israel nzhé:
—Nali ya nu Naz kwaan nzha lo Rey, nu chelee nu nu re xma nu, go xis lu, kix nu paro nona. Nebse kwaan nzhekla nu nak laa lu ded nu xkizhyo lu.
20 Per lee xaa mkeb:
—Nadedt gu.
Zee mroo rey cheen Edom mzhaal kwaan re xaa kwaan zyen doo xsoldad xaa, 21 nu namlaat xaa mded re xaa Israel xkizhyo xaa, kwaanzee lee re xaa Israel mkwaan stub naz.
Aarón ngut naz Yi Hor
22 Rese xaa Israel mroo Cades nu mzhin xaa naz Yi Hor. 23 Xaa Tubka Nak ngunii lo Ches nu lo Aarón naz Yi Hor, naz paro nzhaal yizhyo Edom, nu nzhé xaa:
24 —Aarón yet nu nazeebt xaa yizhyo kwaan nzhé na za na lo re xaa Israel, nel namlet xaa kwaan ngunabeyy na xaa le xaa pa le Meribá, nis pa myech re xaa. 25 Be Aarón nu xgann xaa Eleazar, naz yek Yi Hor; 26 baa koche lu xab Aarón kwaan nak xab ngwleyy, nu segak luya xgann xaa Eleazar, nel lee Aarón yet baa.
27 Ches mle modxa ngunabeyy Xaa Tubka Nak. Nguxoob yon xaa naz yek Yi Hor delant lo re xaa Israel. 28 Zee lee Ches mloo ler kwaan nak xab ngwleyy yenn Aarón nu msegak xaaya Eleazar. Zee lee Aarón ngut yek Yi Hor. Zeera lee Ches nu Eleazar mkato naz xan yi. 29 Gorna nguné re xaa lee Aarón ngulo ngut, mbinn re xaa Israel dubse tub galbchii mbizh.