Xomod gak nzhul xaa lo re kwaan beed
19
Ngunii Xaa Tubka Nak lo Ches nu lo Aarón, nu nzhé xaa:2 —Kwaane nak ley kwaan mzaa Xaa Tubka Nak, nu né xaa: Guzh lo re xaa Israel zee yiidno xaa tub la bak mex, ma wen, ma nik tub welt zer kwib yog yenn. 3 Zaa gu ma lo Eleazar, xaa nak ngwleyy, zee koo xaa ma pa nzho re gu zee gut xaa ma lo xaa. 4 Zee lee Eleazar, xaa nak ngwleyy, zen ren cheen ma kwaan kwen yaa xaa nu chuun xaaya tub gazh welt naz roo li na, Xaa Tubka Nak, 5 Zeera zeek re xaa tub la bak lo re ngwleyy nu zeek xaa yed cheen ma, xpaal ma, ren cheen ma, nu xke ma. 6 Zeera zen ngwleyy yag sedr, nu yag hisopo nu ler naxne, zee ko xaaya lo bal kwaan kayek ngoon lo. 7 Zeera zet ngwleyy xab xaa, nu gaz xaa, zeera zeeb xaa pa mbaz re xaa; per gak beed xaa axta yilo la yalnakaw. 8 Seeka xaa kwaan mzeek ngoon, noka lee xaa nzhaal zet xab xaa, nu gaz xaa, per gak beed xaa axta la yalnakaw. 9 Nu tub xaa nzhul toop xkade cheen ngoon, ma nguk, nu yalaa xaaya naz tub lad pa nzho re xaa, pa nzhul na, zee lee re xaa Israel chaal xkade tubka kwaan nis zee gaka nis nzhul; kwaane nak nis kwaan nle nzhul xaa. 10 Xaa kwaan mtoop xkade cheen ngoon nkin zet xaa xab xaa, nu gak beed xaa axta la yalnakaw. kwaane gak ley kwaan tira lo re gu xaa Israel nu lo re xaa zit xaa nzho lo gu.
11 &Nu xaa kwaan gal cho xaa ngut, gak beed xaa gazh mbizh. 12 Lee mbizh yon chuun xaa nis kwaan nle nzhul xaa nu sbaaka le xaa mbizh gazh zee gak nzhul xaa. Nu chelee xaa nachuunt xaa nis cho xaa mbizh yon nu mbizh gazh, nagakt nzhul xaa. 13 Rese xaa gal cho xaa ngut nu nagakt nzhul xaa, le beed xaa leen li na, Xaa Tubka Nak. Xaa zee nzhaal koo gu yezh Israel, nel namchubt xaa nis kwaan nle nzhul cho xaa, zee mlake beed xaa, nu tira lake beed xaa.
14 &Kwaane nak ley kwaan nle xchiin xaa gorna nzhet tub xaa leen yoo ler pa mbaz re xaa, nu loka xaa reep leen yoo ler, nu rese kwaan nzho leena, gak beed tub gazh mbizh. 15 Nu rese yas kwaan nzoxal roo nu kwaana nyaawt wen roo gak beeda.
16 &Loka xaa nzha naz wen nu gal xaa cho tub xaa ngut kwaan spad o tub xaa ngut sbaasa o cho zhit cheen xaa ngut o cho baa, gazh mbizh gak beed xaa.
17 & Xaa kwaan ngok beed, zen xaa xkade kwaan mzeek xaa ngoon, nu cheep xaaya leen tub yas nu xo xaa nis yuu leena. 18 Zeera lee tub xaa nzhul na zen tub yaa yix kwaan le hisopo, nu le bsii xaaya kwaan nis nu chuun xaaya cho yoo ler pa ngut xaa, nu cho rese kwaan nzho leena, nu cho re xaa nzhi baa. Nu noka nzhaal chuun xaaya cho re xaa mgal cho xaa ngut kwaan spad o cho xaa ngut sbaasa o cho zhit cheen xaa ngut o cho baa. 19 Xaa nzhul na nzhaal chuun nis cho xaa beed mbizh yon nu mbizh gazh, zee gak nzhul xaa mbizh gazh. Zee nzhaal zet xaa ngok beed xab xaa nu gazh xaa zee gak nzhul xaa axta la yaal yalnakaw. 20 Per lee xaa beed nangakt nzhult xaa, koo re xaa xaa yezh nel mle beed xaa li na, Xaa Tubka Nak, nel namchuunt xaa nis cho xaa, kwaanzee nlake beed xaa. 21 Kwaane gak tub ley kwaan tira lo gu. Nu loka xaa zhuun nis nzhul cho, nzhaal zet xaa xab xaa, nu seetaka loka cho xaa gal nis nzhul gak beed xaa axta la yalnakaw. 22 Nu rese kwaan gal xaa beed cho, gak beeda, nu xaa kwaan gal choya gak beed xaa axta la yalnakaw."