Kwaan nzhaal le ngwleyy nu re xaa Leví
18
Lee Xaa Tubka Nak nzhé lo Aarón:— Lu, nu re xgann lu nu re dii cheen Leví nzhaal kanap li na zee nalet re xaa jwalt loya. Nu noka lu nu re xgann lu nzhaal kanap xaa ke zhiin mod ngwleyy zee nalet xaa jwalt. 2 Noka re sawlizh lu, xaa lo dii cheen Leví zo kwaan lu nu le xaa xchiin xaa, gorna lu nu re xgann lu le zhiin leen li na paro nzho wdizh kwaan myaan na kwaan gu. 3 Le re xaa kwaan nabeyy lu xaa nu nachii xaa yoo paro nzhaal gu kwaan na, per nabiit xaa lo re kwaan nle zhiin leen li na, kwaan nambey, nixa lo mdo, zee nayeta re xaa nixa re gu. 4 Rese xaa ne gak xaa le yud tu lo rese zhiin kwaan nzho leen li na. Per nik stub dii nyent mod bii paro nke gu zhiin. 5 Nebse gu nzhal ke gu zhiin leen li na, nu ke gu zhiin lo mdo, zee nayiitra na ne na re xaa Israel. 6 Na mley re sawlizh gu, xaa nak dii cheen Leví, lo re xaa Israel, nu mza na xaa lo gu mod tub kwaan nzelazh na, Xaa Tubka Nak, zee le xaa zhiin nzhaal gu kwaan na. 7 Per lee lu nu re xgann lu le zhiin cheen ngwleyy lo rese kwaan nak cheen mdo, nu re kwaan nzho naz tich ler ndok kwaan nke leen Pa Nambey, nu le guya. Na mza lo gu, mod tub kwaan nzelazh xaa, zhiin cheen ngwleyy; nu loka xaa bii lo re kwaan nambey telise yet xaa.
Kwaan gaw ngwleyy nu xaa nak dii cheen Leví
8 Xaa Tubka Nak nzhé lo Aarón:
—Na mza lo gu zee ke gu zhiin nachii gu gon cheen na. Rese gon kwaan nambey kwaan nzaa re xaa Israel lo na, za naya lo lu nu lo re xgann lu naka kwaan yizo gu, kwaane gak tub ley kwaan tira. 9 Za na lo gu re gon kwaan nambey doo kwaan yizo gu, re lo gon kwaan nanzekt xaa lo ki. Xcheen gu gak gon cheen yalgon, gon kwaan nle nzhul xaa nu kwaa che jwalt cheen xaa, nu gon kwaan nzere xaa gorna nlewann xaa. Gaka tub kwaan nambey doo lo lu nu lo re xgann lu. 10 Gaw guya pa nambey doo rese xaabyi nzhaal gawa, nu gaka kwaan nambey lo gu.
11 &Noka za na lo lu, nu lo re xgann lu, nu lo re xchaap lu, gon kwaan nkun re xaa Israel lo na. Kwaane nak tub ley kwaan tira. Loka xaa nzhul nak, xaa nzho garli lu nzho mod gawa. 12 Noka za na lo gu: nseyt kwaan wen doo, nu xis ub kwaan wen doo, nu nzhobxtil, nu re xle yilotlaka, re kwaan mzaa re xaa Israel. 13 Kwaan roo yilotlaka lo yalgon cheen xaa, kwaan zaa xaa lo na, Xaa Tubka Nak, xcheen gu gaka. Loka xaa nzhul, nak xaa nzho garli gu nzho mod gawa. 14 Rese gon kwaan mle nambeyy re xaa Israel zaa xaa lo na, noka naka xcheen gu.
15 &Nu rese xaa gal yilotlaka lo re xaa Israel, o ma gal yilotlaka lo re ma, zaa xaa lo na, Xaa Tubka Nak, nu xcheen lu gaka. Per zaa xaa demi xlugar re xaa gal yilotlaka nu re ma gal yilotlaka lo re ma nanzhult. 16 Gorna yo re xaa gal yilotlaka tub mbee zee kix xaa gaay demi plat nel tub labaa non demi kwaan nchiix xaa leen li na, Xaa Tubka Nak kwaan nga chiibtub gram. 17 Per nazaat gu demi kwent cheen xinn ngoon ma gal yilotlaka, nixa re xinn mbakxiil ma gal yilotlaka, nixa re xinn chib ma gal yilotlaka; nel nambey nak ma. Nzhaal gut gu ma nu chuun gu ren cheen ma lo mdo nu zeek gu xse ma. Lee bech kwaan chul doo nzebech gak cheen na, Xaa Tubka Nak. 18 Lee laz ma nu kor ma lad li gak xcheen gu per lee ma ngol yilotlaka dubse ma gak xcheen gu. 19 Rese gon kwaan zaa re xaa Israel lo na, Xaa Tubka Nak, nambey naka, nu za naya lo lu, nu lo re xgann lu, nu lo re xchaap lu. Kwaane nak tub trat cheen zed, nu naka tub ley kwaan tira, kwaan myaan na kwaan lu nu re dii cheen lu."
20 Xaa Tubka Nak nzhé lo Aarón:
—Nakanot lu yizhyo xcheen lu lo re yizhyo cheen re xaa Israel. Na nak kwaan kayaa lu nu kwaan nzhap lu lo re xaa Israel. 21 Na mza lo re xaa nak dii cheen Leví tub part lo chii part kwaan nzaa re xaa Israel lo na, mod xcheen xaa lo zhiin kwaan nle xaa, nel nle re xaa zhiin leen li na. 22 Re xaa Israel nabiit xaa roo li na, zee nayeta xaa lo jwalt ne. 23 Per lee re xaa nak dii cheen Leví le xaa zhiin leen li na, nu kanap xaaya. Kwaane nak tub ley kwaan tira lo re dii cheen xaa: nu nakanot xaa xkizhyo xaa lo re xaa Israel. 24 Nel lo re xaa nak dii cheen Leví mza na tub part lo chii part lo re gon kwaan nzaa re xaa Israel lo na, Xaa Tubka Nak; kwaanzee nzhé na:"Nakanot xaa xkizhyo xaa lo re xaa Israel.
25 Xaa Tubka Nak nzhé lo Ches:
26 —Yé luya lo re xaa nak dii cheen Leví: 'Gorna kayaa gu tub part lo chii part lo re kwaan nzaa re xaa Israel lo na, mza naya zee gaka xcheen gu, zee nkin zaa gu lo na, Xaa Tubka Nak, tub part lo chii part cheena. 27 Lee gon kwaan koxa gu zaa gu lo na gak mod tub gon cheen nzhobxtil nu xis ub. 28 Sbaaka zaa gu gon kwaan nak cheen gu lo na, Xaa Tubka Nak, rese kwaan nak tub part lo chii part kwaan kayaa gu lo re xaa Israel; zaa guya lo ngwleyy Aarón. 29 Rese gon kwaan nzelazh xaa kwaan nkayaa gu, nzhaal koxa gu tub part kwaan zaa gu lo na, Xaa Tubka Nak; kwaan wen doo lo rese nu kwaan nzhul nak.'
30 Noka yé lu: 'Gorna zaa xaa gon cheen xaa kwaan wenra lo na kwaane gak mod yalgon kwaan mlo xaa lo xkiyoo yo xaa. 31 Rese kwaan mlake gaw guya kwaan re xaa li gu palpa, kwaane gak kwaan yex ka gu nel nke gu zhiin leen li na. 32 Nalet gu nik tub jwalt gorna zaa gu gon kwaan wenra lo rese. Zee nalebeedt gu re kwaan nambey kwaan nak gon cheen re xaa Israel, zee nayeta gu.'"