Números 17

Bar cheen Aarón

Ngunii Xaa Tubka Nak lo Ches nu nzhé xaa:

2 —Guzh lo re xaa Israel, zee kad tub xaa nabeyy lo chiibchop dii Israel yiidno xaa bar cheen xaa. Nu kee lu le re xaa choya. 3 Nu cho xpar Leví kee lu le Aarón. Zee yizata xaa nabeyy lo re dii kano bar cheen. 4 Nu yalaa lu reya leen li na, Xaa Tubka Nak, paro nzho kaj cheen trat, paro nzhaal na kwaan re gu. 5 Nu zhiib ben xpar xaa kwaan mleey na, sbaa le na zee lee re xaa Israel laa xaa nii nawent xaa gu.

6 Zee ngunii Ches lo re xaa Israel, nu kad xaa nabeyy lo dii cheen Israel mzaa xaa xpar xaa lo Ches. Lo rese xpar xaa naka chiibchop, nu lo xpar re xaa nzho bar cheen Aarón. 7 Zee lee Ches ngulaa bar cheen re xaa lo XaaTubka Nak leen li xaa, paro nzho kaj cheen trat. 8 Zee stub mbizh ngwa Ches leen li Xaa Tubka Nak, paro nzho kaj cheen trat, zee ngune xaa lo xpar Aarón, xaa nak dii cheen Leví, kwaan mlen ben, nu mzhib yeey choya nu mzaaya xle almendra. 9 Zee mloo Ches re bar cheen re xaa lo Xaa Tubka Nak nu mlu xaaya lo re xaa Israel; nu ngune re xaa loya nu mzen re xaa xpar xaa. 10 Zee nzhé Xaa Tubka Nak lo Ches:

—Blek xpar Aarón paro nzho kaj cheen trat stuba zee yizhawa zee gaka tub nseyn lo re xaa Israel, xaa ned. Sbaa le lu zee laa xaa nii nawent xaa na zee nayeta xaa.

11 Zee mle Ches mod nzhé Xaa Tubka Nak lo xaa. 12 Zee lee re xaa Israel nzhé lo Ches:

—¡Tira luux xaa nu! ¡Kayet re nu! 13 Loka xaa bii gax lo li Xaa Tubka Nak, yet xaa. ¡Rese nu telise yet!