Coré nanzheklat ngon xtizh Ches
16
Coré xgann Izhar xgann Coat, xgann Leví kwaan Datán nu Abiram xgann Eliab, nu On xgann Pelet, xaa lo dii cheen Ben mtoop xaa xaa, 2 nu ngunii nawent re xaa lo Ches, kwaan chop gayoo yirol xaa Israel, xaa nabeyy lo re xaa Israel. Mleey xaa re xaa nabeyy xaa, xaa non zee zhaal xaa kwaan lee xaa. 3 Mkasa re xaa zee ngunii nawent xaa lo Ches nu lo Aarón nu nzhé xaa:—¿Chozhiin nzak gu, gu nak xaa non? ¡Rese be nak xaa nambeyy lo Xaa Tubka Nak! ¿Chozhiin nzak gu, nebse gu nak yezh non lo Xaa Tubka Nak?
4 Gorna mbin Ches kwaan nzhé re xaa mkich yek xaa axta mla lachuzh xaa lo yo. 5 Zee nzhé xaa lo Coré nu lo re xaa xaa:
—Yee luu Xaa Tubka Nak, xana be nak xaa xaa, nu xana be nambey nak. Nebse xaa mleey xaa, xaa nambey nak, bii lo xaa. 6 Coré, le gu kwaane: zen gu kwaan nyu yaal leen, 7 ko gu ki leena nu cheep gu yaal kwaan chul nzebech leena nu yee zo guya lo Xaa Tubka Nak. Xaa kwaan kwey Xaa Tubka Nak, xaa zee nak xaa nambey. ¡Nguchela la na ne na re gu, xaa nak dii cheen Leví!
8 Zee nzhé Ches lo Coré:
—Kenzha gu, xaa nak dii cheen Leví: 9 ¿Chozhiin nzak gu mod tub kwaan nanont gorna mleey Dios cheen be, re xtii gu lo re xaa Israel, zee zo gu gax lo xaa zee le gu zhiin kwaan nzho leen li Xaa Tubka Nak zee le gu zhiin ne lo re xaa yezh? 10 Lee Xaa Tubka Nak mleey re gu, xaa dii cheen Leví, nu nzo gu gax lo xaa. ¿Lee nal noka gu nzhekla gak ngwleyy? 11 Kwaanzee lu nu re xaa lu mkasa gu nii nawent gu lo Xaa Tubka Nak; nu nalet lo Aarón nii nawent gu.
12 Zee lee Ches mxaal xaa ngwachezh Datán nu Abiram, xgann Eliab. Per lee re xaa nzhé:
—Nayat nu. 13 ¿Che nzak lu cheepse kwaan mle lu lo nu, mloo lu nu yizhyo paro lee nizh nu mzhin nxonn mod nis, zee le lu yet nu naz wen yizhyo bizh? ¡Lee nal noka nzhekla lu nabeyy lu lo nu! 14 Zer wee lu nu yizhyo paro lee nizh nu mzhin nxonn mod nis, nixa zer zaa lu yizhyo nu yag ub lo nu. ¿Chozhiin nkade lu re xaa Israel? ¡Nayat nu!
15 Zee lee Ches mxaal xyan doo nu nzhé xaa lo Xaa Tubka Nak:
—Nakayaat lu gon kwaan nzeno re xaa ne. Nel lee na zer zen na nik tub xngwes xaa, nixa zer le na nik tub nawent lo re xaa.
16 Zee nzhé Ches lo Coré:
—Lu nu rese xaa lu yee ya gu garli Xaa Tubka Nak, nu noka Aarón. 17 Kad tub gu bzen gu xcheen gu kwaan nyu yaal leen, nu cheep gu yaal leena nu zo guya delant lo Xaa Tubka Nak; zee gaka chop gayoo yirol kwaan nyu yaal leen. Lu nu Aarón, zen gu xcheen gu kwaan nyu yaal leen.
18 Kad tub xaa mzen xcheen xaa kwaan nyu yaal leen, mlo xaa ki nu yaal kwaan chul nzebech leena, nu mkasa re xaa roo li Xaa Tubka Nak paro nzhaal re xaa kwaan lee xaa, nu mzhaal re xaa kwaan Ches nu Aarón. 19 Coré mkasa re xaa Israel roo li Xaa Tubka Nak paro nzhaal xaa kwaan lee xaa, nu lee xni cheen Xaa Tubka Nak mlu lo re xaa. 20 Zee lee Xaa Tubka Nak, nzhé lo Ches nu lo Aarón:
21 —Bachi gu lo re xaa Israel, lee na luux re xaa nal.
22 Per lee Ches nu Aarón mkich yek axta mla lachuzh xaa lo yo nu nzhé xaa:
—Ay Dios, Dios xaa nzaa yalnaban lo rese myet. Tubka xaa mle jwalt, ¿chozhiin nayii lu ne lu rese xaa?
23 Zee mkeb Xaa Tubka Nak lo Ches nu nzhé xaa:
24 —Gunii lo rese xaa yezh nu guzh lo xaa: "Bachi gu cho yoo paro nzho Coré, Datán nu Abiram."
25 Zee ngwa Ches paro nzho Datán nu Abiram, nu mreke re xaa gol xaa Israel tich xaa. 26 Zee ngunii xaa lo re xaa nu nzhé xaa:
—Bachi gu cho li re xaa nle kwaan nawent, nazent gu nik tub xcheen xaa zee nayeta gu kwent cheen jwalt cheen re xaa.
27 Zee lee re xaa mbachi cho li Coré, Datán nu Abiram. Datán nu Abiram mroo roo yoo nu mzo xaa roo li xaa kwaan xngwnaa xaa nu re xinn xaa. 28 Zee lee Ches nzhé:
—Snee zee ne re gu lee Xaa Tubka Nak mxaal na zee le na rese kwaan, nu nanlet na kwaan nzhekla na, 29 chelee re xaa ne yet mod nzhet stub naz re xaa, naleet Xaa Tubka Nak mxaal na zee. 30 Per chelee Xaa Tubka Nak le tub kwaan kub, zee biil yizhyo nu keba re xaa nu re kwaan nzhap xaa, nu mban xaa la xaa naz xan, zee ne re gu lee re xaa nambint kwaan nzhé Xaa Tubka Nak.
31 Gorna lee Ches ngulo ngunii, lee yizhyo mxal paro nzo re xaa, 32 nu mdeba re xaa li Coré nu re xaa xaa, kwaan dub li re xaa, nu re kwaan nzhap re xaa. 33 Mban re xaa ne mla leen yizhyo nu kwaan re kwaan nzhap xaa. Nu lee yizhyo mzhaal stuba nu sbaa mlux re xaa ne lo re xaa Israel. 34 Gorna mbin re xaa Israel, xaa nzo zee, mrazhe re xaa ne nu mrexonn xaa, nu nzhé re xaa: "Nap lee yizhyo kageb re be". 35 Zee mroo tub bal cheen Xaa Tubka Nak, kwaan mzek chop gayoo yirol xaa kwaan kazek yaal.
36 Zee lee Xaa Tubka Nak ngunii lo Ches nu nzhé xaa:
37 —Guzh lo Eleazar, xgann ngwleyy Aarón, zee koo xaa re kwaan nyu yaal leen kwaan nzho lo ki nel nambey naka, nu yalabi xaa ki kwaan nzho leena zit. 38 Zen xaa re kwaan nyu yaal leen cheen re xaa ngutla nu dexkwaa xaa reya tub lag nales doo zee saawa cho mdo, nel mzaa re xaaya lo na, Xaa Tubka Nak, nu nambey naka. Zee gaka mod tub nseyn lo re xaa Israel.
39 Zee lee ngwleyy Eleazar mzen kwaan nyu yaal leen kwaan nak brons, kwaan mzaa re xaa ngut lo bal, nu nales doo mdexkwaa xaaya zee saaw xaa cho mdo, 40 mod tub kwaan zee selazh re xaa Israel ke nik tub xaa nanakt dii cheen Aarón nyent mod zeek yaal lo na, Xaa Tubka Nak, napa kayak lo xaa kwaan ngok lo Coré nu re xaa xaa.
Kwaane nzhé Xaa Tubka Nak lo Ches.
41 Lee stub mbizh rese xaa Israel ngunii nawent lo Ches nu lo Aarón nu nzhé xaa:
—¡Gu mbit re xaa Xaa Tubka Nak!
42 Nu gorna mkasa rese xaa yezh ngunii nawent xaa lo Ches nu lo Aarón nu gorna mlaach xaa lo li Xaa Tubka Nak, zee mlu tub xkaw kwaan msaaw dubse yoo lo re xaa, zee mlu xni cheen Xaa Tubka Nak lo re xaa. 43 Zee ngwa Ches nu Aarón roo li Xaa Tubka Nak paro nzhaal xaa kwaan lee xaa, 44 nu lee Xaa Tubka Nak nzhé lo Ches:
45 —¡Bachi gu lo re xaa ba, nel nal gorne luux na re xaa!
—Bzen kwaan nyu yaal leen, nu blo ki kwaan nzhob lo mdo leena, nu cheep yaal kwaan chul nzebech leena; nu gwa paro nzhikwaa re xaa yezh. Ble nzhul re xaa nu che xjwalt re xaa nel lee yalnayii cheen Xaa Tubka Nak nzeyak gro nu lee re xaa nzelola kayet. 47 Aarón mzen kwaan nyu yaal leen, modxa nzhé Ches lo xaa, nu ngwa xon xaa paro nzhikwaa re xaa yezh; lee re xaa nzelola kayet. Zee lee Aarón mzek yaal nu mle nzhul xaa re xaa nu mche xaa xjwal chen re yezh. 48 Nu mzoli xaa xsaw lo re xaa ngut nu lo re xaa mban, zee lee yalyizh mlaz. 49 Lo rese xaa ngut lo yalyizh zee nak tub chida mil kwaan gazh gayoo xaa, nu namloot xaa kwent re xaa ngut xkwent jwalt cheen Coré. 50 Gwluzh, gorna ngulo mlaz yalyizh, zee mbare Aarón lo Ches roo li Xaa Tubka Nak.