Ley cheen re gon
15
Ngunii Xaa Tubka Nak lo Ches nu nzhé xaa:2 —Gunii lo re xaa Israel nu guzh lo xaa: Gorna reep gu yizhyo kwaan za na yo gu, 3 nu zaa gu tub gon kwaan lo na, Xaa Tubka Nak, gorna teed gu tub la ngoon o tub mbakxiil o tub chib kwaan zeek gu lo mdo, o gon kwaan zaa gu leezha yaan gu kwaan na o gon kwaan nzhal lextoo gu nu gon kwaan zaa gu gorna le gu yalni; re gon kwaan chul doo nzebech lo na, Xaa Tubka Nak, 4 kwaanzee xaa kwaan zaa gon cheen yalgon lo na, Xaa Tubka Nak, yiidno xaa gon cheen xaa kwaan nak chop kil arin wen, nu guch xaaya kwaan tub litr nseyt. 5 Nu kad mbakxiil yeen, ma kwaan zaa gu lo na, Xaa Tub Nak, ma nak gon kwaan zaa xaa kwi wen xaa nu kwaan zeek xaa ma lo mdo, chaal xaa ma kwaan tub litr xis ub. 6 Kad mbakxiil mach ma gox, ma kwaan zaa gu, chaal gu ma kwaan tap kil arin wen, nu guch guya kwaan tub masra tub litr nseyt. 7 Nu zaa gu masra tub litr xis ub, mod gon kwaan chul doo nzebech lo na, Xaa Tubka Nak. 8 Nu zaa gu tub la ngoon mod gon kwaan kwi wen gu kwaan na nu gon kwaan zeek xaa ma lo mdo, nel mle gu kwaan myaan gu o zee kwii wen gu kwaan na, XaaTubka Nak. 9 Gorna zaa gu tub la ngoon noka zaa gu xoop kil arin kwaan nuch chop litr nseyt; 10 nu zaa gu chop litr xis ub. Re kwaane gak gon kwaan chul doo nze bech kwaan lo na Xaa Tubka Nak. 11 Sbaa le xaa kwaan ngoon o mbakxiil mach ma gox, nu mbakxiil yeen o chib, 12 Snee nexa lak nak ma kwaan zaa gu, sbaa le gu kwaan rese ma. 13 Kad gorna le tub gu, xaa Israel, zaa tub gon lo na, kwaan chul doo nze bech lo na, Xaa Tubka Nak.
14 Cheleeya tub xaa zit, xaa kwaan nzho lo re gu, o nexa cho xaa nzho kwaan gu, nu nzhekla xaa zaa gon kwaan chul nze bech lo na, XaaTubka Nak, nzhaal le xaa mod le guya. 15 Leeka ley kwaan nkano gu kano re xaa zit, xaa nzho kwaan re gu. Kwaane nak tub ley kwaan tira lo re dii cheen gu. 16 Leeka ley kwaan kano gu kano re xaa zit, xaa nzho lo re gu."
17 Ngunii Xaa Tubka Nak lo Ches nu nzhé xaa:
18 —Ngunii lo re xaa Israel, nu guzh lo xaa: Gorna reep gu yizhyo kwaan wee na gu, 19 gorna zelo gu gaw gu kwaan zaa yizhyo ba, zaa gu tub gon lo na, Xaa Tubka Nak. 20 Yalgon yilotlaka kwaan dexkwaa gu, zaa gu cha yat kwaan kob kwaan yilotlaka mod nzaa xaa nzhobxtil kwaan yilotlaka mod gon kwaan nzhaal zaa gu. 21 Lo yalgon kwaan yilotlaka kwaan dexkwaa gu, zaa gu cha yat kwaan kob kwaan yilotlaka mod gon lo na, Xaa Tubka Nak, lo re dii cheen gu.
22 Gorna la gu nakozhawt gu re kwaan ngunabeyy na gu, le gu lo Ches na Xaa Tubka Nak, nu nanzeent guya, 23 loka kwaan mza na, lo Ches le gu na Xaa Tubka Nak, mbizh kwaan ngunabeyy na gu nu re dii cheen gu, zee nzhaal le guya snee: 24 Chelee re xaa yezh mle jwalt kwaan namzeent xaa mle xaa, zee rese xaa yezh nzhaal teed tub la ngoon mod gon kwaan zeek xaa ma lo mdo, kwaan gak tub bech kwaan chul doo nzebech lo na, Xaa Tubka Nak, nu tubka kwaan tub la ngoon zaa xaa gon cheen yalgon nu cheen xis ub mod nak ley. Noka zaa xaa tub chib mach kwaan gak nzhul xaanu nzhe re jwalt xaa. 25 Zee lee ngwleyy teed ma kwent cheen re xaa yezh zee gak nzhul re xaa, zee zhe re jwalt cheen xaa, nel ngoka tub kwaan namzeent xaa mle xaa. Zee zaa re xaa gon cheen xaa lo na, Xaa Tubka Nak, zee che na re kwaan nawent kwaan mle xaa. 26 Zee zhe jwalt cheen re xaa Israel nu re xaa zit xaa nzho lo re xaa, kwent cheen re jwalt kwaan namzeent xaa mle xaa.
27 Chelee tub xaa mle tub jwalt kwaan namzeent xaa mle xaa, nzhaal zaa xaa tub chib gol yeen, ma tub liin, zee zhe re jwalt xaa nu gak nzhul xaa. 28 Zee lee ngwleyy zaa ma kwent cheen xaa mle jwalt kwaan namzeent xaa mle xaa lo na, Xaa Tubka Nak, zee kwii wen xaa kwaan na nu zhe re jwalt xaa nu gak nzhul xaa. 29 Leeka ley kwaan kano gu kano xaa kwaan mle jwalt kwaan namzeent xaa mle xaa, chol naka xaa Israel o xaa zit xaa nzho lo gu 30 Chelee xaa le xaa jwalt, chol xaa ngol lo re xaa Israel o xaa zit, nle xaa kwaan nawent lo na, Xaa Tubka Nak. Koo gu xaa yezh cheen gu. 31 Tich xaa nzhob jwalt nel namlet xaa kwaan nzhé na, na Xaa Tubka Nak, nzhaal roo xaa zee yezh cheen re gu."
Xaa kwaan nakozhawt zhe sab
32 Gorna lee re xaa Israel nzo naz wen yizhyo bizh, ngune xaa lo tub xaa katoop yag naz wen zhe sab. 33 Xaa kwaan nguzhal xaa katoop yag mbe xaa xaa lo Ches lo Aarón nu lo re xaa yezh 34 Mlo xaa xaa lozhyib, nel nanet xaa cho kwaan le xaa kwaan lee xaa 35 Zee lee Xaa Tubka Nak nzhé lo Ches: "Nzhaal yet xaa ne. Rese xaa yezh bzaake gu xaa tub lad pa nzho re gu." 36 Zee lee re xaa yezh mlo xaa tub lad nu mzaake xaa xaa axta ngut xaa, mod ngunabeyy Xaa Tubka Nak lo Ches.
Doo yil cheen ler
37 Ngunii Xaa Tubka Nak lo Ches nu nzhé xaa:
38 —Ngunii lo re xaa Israel, nu guzh lo xaa: Dexkwaa gu doo yil kwaan nkenga xan xab gu nu re dii cheen gu; nu doo yil sul ne dexkwaa guya. 39 Nu tubka wee guya zee gorna wii gu loya zelazh gu kwaan ngunii na, Xaa Tubka Nak, lo gu. Zee le guya zee nalet gu kwaan nzhal lextoo gu nu kwaan nyun lo gu. 40 Sbaa selazh gu kozhaw re kwaan mxaal na le gu, zee gak nzhul gu lo na, xaa nak Xtios gu. 41 Na nak Xaa Tubka Nak, xaa nak Xtios gu, xaa kwaan mloo gu yizhyo Egipto zee gak na Xtios gu. ¡Na nak Xaa Tubka Nak, xaa nak Xtios gu!