Re xaa Israel ngunii nawent lo Xaa Tubka Nak
14
Zee lee rese xaa Israel mrazhe, nu dubse yaal zee mbinn doo re xaa. 2 Rese xaa Israel ngunii nawent lo Ches nu lo Aarón, nu nzhé re xaa:—¡Maleey nget nu yizhyo Egipto! ¡Nu maleey yet nu yizhyo bizh ne! 3 ¿Chozhiin nzeno Xaa Tubka Nak nu yizhyo ne zee yet nu kwaan spad, xngwnaa nu re xiin nu yiga nu lo re xaa nayii ne nu? ¿Che nawent bare nu naz yizhyo Egipto?
4 Nu mbezh tub xaa lo stub xaa:
—Kwey be tub xaa nabeyy lo be, xaa wee be naz yizhyo Egipto stuba.
5 Zee lee Ches nu Aarón mkichxub xaa axta mla lachuzh xaa lo yo lo re xaa Israel. 6 Nu lee Josué xgann Nun nu Caleb xgann Jefone, xaa ngwa mlabeyy yizhyo, mchaz xaa xab xaa nel nales doo ngok lextoo xaa. 7 Zee nzhé rop xaa lo re xaa yezh Israel:
—¡Lee yizhyo kwaan ngwasewii nu lo nak yizhyo wen doo! 8 Chelee Xaa Tubka Nak yula mod nle be, lee xaa wee be yizhyo ne nu zaa xaaya lo be; naka tub yizhyo pa nxonn nizh nu mzhin mod nis. 9 Kwaanzee nagakt ned gu lo Xaa Tubka Nak nixa nazhebt gu ne gu re xaa nzho yizhyo ne, nel lee re be gaw xaa modxa nzhaw xaa yat, nel nankanot xaa xaa nkanap xaa, nel Xaa Tubka Nak nzo kwaan re be, kwaanzee nazhebt gu.
10 Zee lee re xaa nzhekla zaa ke xaa. Per lee xni cheen Xaa Tubka Nak, mlu re xaa Israel leen li xaa paro nzhaal xaa kwaan lee xaa. 11 Zee lee Xaa Tubka Nak nzhé lo Ches:
—¿Chozhiin nle nanont re xaa yezh ne na? ¿Nu axta cho gor wii re xaa ne lo na, nixa mle na zyen kwaan gro doo lo re xaa? 12 Na xaal tub yalzi kwaan lux re xaa, per lee lu le na tub yezh kwaan ngezh doo lo re xaa.
13 Per lee Ches mkeb lo Xaa Tubka Nak nu nzhé:
—Lu, Xaa Tubka Nak, kwaan yalnabeyy cheen lu mloo lu re nu, xaa yezh ne, naz yizhyo Egipto, nu gorna gon re xaa Egipto kwaan le lu, 14 nu yé re xaa Egipto kwaan ngok. Mbinla re xaa lee lu, Xaa Tubka Nak, nzo lo re nu, nu snee sneepa myun lu lo re nu. Nu xkaw cheen lu nzo kwaan re xaa lu, lee zhe nzha lu delant lo re nu leen tub xkaw kwaan nlu kwenta mdun ndok, nu lee yaal tub xkaw kwaan nzaa bal. 15 Chelee lu gut lu re xaa ne, lee re xaa re yezh gon kwaan mle lu, nu yé xaa: 16 "Nel nyent mod nge Xaa Tubka Nak re xaa lo yizhyo kwaan nzhé xaa zaa xaa lo re xaa, kwaanzee mbit xaa re xaa naz wen, yizhyo bizh". 17 Lee nal, Xaa Tubka Nak, laa wii re xaa lo yalnabeyy cheen lu, mod né lu: 18 "Na, Xaa Tubka Nak, nen doo yii na, nu gro doo nak yalnkela cheen na, nu noka che na re jwalt kwaan mle gu, gorna nambint gu xtizh na. Per noka ted na re xaa nle jwalt bid, re xiin xaa, nu re xos xaa, nu re xiin xos xaa, nu re xiin xiin xos xaa." 19 Che jwalt cheen re xaa yezh ne nal kwaan gro doo yalnles cheen lu, modxa mche lu jwalt cheen re xaa gorna mroo xaa yizhyo Egipto nu axta mbizh nalzhe.
Xaa Tubka Nak mted re xaa Israel bid
(Dt 1.34-40)
20 Lee Xaa Tubka Nak nzhé:
—Na mche xjwalt re xaa mod né lu. 21 Wlipa na, lu na yalnabeyy cheen na dubse yizhyo, 22 per nik tub re xaa ne, xaa ngune lo yalnabeyy cheen na nu lo re kwaan gro kwaan mle na yizhyo Egipto nu naz wen yizhyo bizh nu mle xaa preb na tub chii welt nu namlet xaa kwaan nzhé na lo xaa, 23 nanet re xaa ne lo yizhyo kwaan nzhé na lo re xey gu za na lo xaa. Nik tub xaa ned nanet loya. 24 Per lee xmos na Caleb, xa doo ngok xgab cheen xaa nu nali ngok xaa lo na; na le zee zeeb xaa yizhyo kwaan ngulabeyy xaa nu gaka cheen re dii cheen xaa. 25 Bare gu naz yizhyo bizh kwaan nzhikwaa naz ta roo Nistoo Naxne; per nayat gu paro nzho re xaa Amalec nu re xaa Canaán.
26 Ngunii Xaa Tubka Nak lo Ches nu lo Aarón nu nzhé xaa:
27 —¿Axta cho gor yela na ne na re xaa yezh ne, xaa nakap nii nawent lo na? Mbinla na xomod ngunii nawent re xaa Israel na. 28 Guzh lo re xaa: Wlipa na nii na, Xaa Tubka Nak, modxa ngunii gu na, sbaaka le na lo gu. 29 Naz wen, yizhyo bizh, lake xkwerp gu gorna yet gu, rese gu, xaa kwaan mke le, xaa nzho masra tub gal liin, xaa kwaan ngunii nawent na. 30 Nu nebse Caleb xgann Jefone nu Josué xgann Nun, zeeb yizhyo kwaan mcheroo na za na za na lo xaa yo xaa. 31 Per lee re xinn gu, xaa nzhé gu yiga lo re xaa nayii ne xaa, na we xaa zee labeyy xaa yizhyo kwaan nanzheklat re gu kayaa. 32 Per lee xkwerp gu lake naz wen yizhyo bizh. 33 Re xinn gu ze naz wen choo liin yizhyo bizh, nu yalzo xaa kwaan mle gu, axta gorna yilo yet re gu naz wen yizhyo bizh. 34 Nu choo mbizh ngulabeyy gu yizhyo; noka tub choo liin kix gu re kwaan mle gu; tub liin nak tub mbizh. Snee ne gu xomod ted na gu bid. 35 Na, Xaa Tubka Nak, nguniiya. Sbaa le na lo rese xaa ne, xaa nakap, xaa nayii ne na. Yizhyo bizh ne yet re gu.
36 Gorna mbare re xaa kwaan mxaal Ches labeyy yizhyo, mle xaa zee ngunii nawent re xaa yezh lo Ches, nu nzhé xaa nawent nak yizhyo; 37 re xaa kwaan nzhé nawent nak yizhyo ngut lo yalzi, kwaan mxaal Xaa Tubka Nak. 38 Per lee Josué xgann Nun nu Caleb xgann Jefone, nebse rop xaa ne, nak xaa mban lo rese xaa kwaan ngwa ngulabeyy yizhyo.
Re xaa yezh nzhekla le gan yizhyo
(Dt 1.41-46)
39 Ches nzhé rese kwaane lo re xaa Israel, zee lee re xaa ngok nales doo lextoo xaa. 40 Nu nguxche re xaa garziil doo nu nguxoob xaa yek yi, nu nzhé xaa:
—Nee nzo nu zee ya nu paro né Xaa Tubka Nak, nel mle nu jwalt.
41 Zee lee Ches mkeb:
—¿Chozhiin namlet gu kwaan ngunabeyy Xaa Tubka Nak? Nixa kwaane nareket wen. 42 Nayat gu, nel lee Xaa Tubka Nak nanzot lo re gu: napa lee re xaa nayii ne gu kayut gu. 43 Nel lee re xaa Amalec nu re xaa Canaán nzo naz delant lo re gu kwaan spad, napa kayut xaa re gu, nel lee Xaa Tubka Nak nanzotra kwaan re gu, nel nanet gu reke gu tich xaa. 44 Per lee re xaa ne namlet xaa kas nu ngwa xaa yi cheen Canaán; per lee kaj chee trat cheen Xaa Tubka Nak nu Ches namroot xaa paro mlaz re xaa. 45 Zee mla re xaa Amalec nu re xaa Canaán xaa nzho yi, nu mle xaa gan lo xaa nu mreke xaa tich re xaa axta yezh Hormaa.