Números 13

Ches mxaal chiibchop xaa ya Canaán

Ngunii Xaa Tubka Nak lo Ches nu nzhé xaa:

2 --Xaal lu lak xaa nlabeyy yizhyo Canaán, kwaan za na lo re xaa Israel; xaal lu xaa nabeyy lo kad tub dii.

3 Zee mxaal Ches xaa, nu gorna nzhi gu naz wen yizhyo bizh Parán, mod nzhé Xaa Tubka Nak. Rese xaa ne nak xaa nabeyy lo re xaa Israel. 4 Snee le re xaa: Samúa xgann Zacur xaa lo dii cheen Ben, 5 Safat xgann Horí xaa lo dii cheen Simeón, 6 Caleb xgann Jefone xaa lo dii cheen Judá, 7 Igal xgann Che xaa lo dii cheen Isacar, 8 Oseas xgann Nun xaa lo dii cheen Efraín, 9 Palti xgann Rafú xaa lo dii cheen Benjamín, 10 Gadiel xgann Sodi xaa lo dii cheen Zabulón. 11 Gadi xgann Susi xaa lo dii cheen Che, 12 Amiel xgann Gemali xaa lo dii cheen Dan, 13 Setur xgann Micael xaa lo dii cheen Aser, 14 Nahbi xgann Vapsi xaa lo dii cheen Neftalí, 15 Geuel xgann Maqui xaa lo dii cheen Gad.

16 Snee le re xaa mxaal Ches labeyy yizhyo. Ches mlole Oseas, xgann Nun, Josué.

17 Zee mxaal Ches xaa labeyy yizhyo Canaán, nu nzhé xaa lo xaa:

--Yixoob gu Neguev nu zeera yixoob yi yizhyo Canaán. 18 Nu wii gu ne xomod nak yizhyo nu xomod nak re xaa nzhoya, che ngezh xaa o nangezht xaa, che zyen xaa o nazyent xaa; 19 xomod nak yizhyo pa nzho xaa, che wena o nawenta; nu xomod nak yezh pa nzho xaa, che nzoxala o nyaawa; 20 nu cho klas yizhyo, che yo nxen kwaana o yo nanxent kwaana; che nzeb yaga o nanzebta. Ya gu nu yiidno gu xle cheen yizhyo ba.

Nel re mbizh zee merla toop xaa ub kwaan yilotlaka.

21 Zee ngwa re xaa, mroo xaa yizhyo bizh cheen Zin nu mzhin xaa axta Rehob, gax paro nzhi Hamat. 22 Mdedyo xaa Neguev nu mzhin xaa axta Hebrón. Baa ngu Ahimán, Sesai nu Talmai, xgann Anac xaa ndok. (Hebrón mri gazh liin yilo lo Zoán naz Egipto). 23 Nu mzhin xaa axta lach roo Yuu Escol, nu mchoog xaa tub rasum yag ub kwaan nkee zyen doo ub lo, zee nkin chop xaa mbeya kwaan tub lee yag, noka mla xaa garnad nu ig. 24 Nu mloole xaa lach ba Escol^a, nel baa mchoog xaa Israel rasum ub.

25 Ngulo nguxoob choo mbizh ngulabeyy re xaa yizhyo zee mbare re xaa stuba. 26 Zee ngwa xaa lo Ches nu lo Aarón nu lo re xaa Israel naz yo bizh Parán, naz Cades. Mzaa re xaa kwent lo re xaa yezh nu mlu xaa xle cheen yizhyo zee lo re xaa. 27 Nu noka mzaa xaa kwent nu nzhé xaa:

--Gorna mzhin nu yezh kwaan mxaal lu nu, wlipa leeya nzho nizh nu mzhin mod nis, kwaane nak xle kwaan nzaaya. 28 Per re xaa kwaan nzho yezh ba ngezh doo re xaa nu naro doo yezh, nu nyaawa; noka ngune nu lo re xgann Anac xaa ndok. 29 Xaa Amalec nzho yizhyo Neguev; xaa Het, xaa Jebús nu xaa Amorreo nzho leen re yi; nu lee xaa Canaán nzho gax roo nistoo nu gax roo yuu Jordán.

30 Zee lee Caleb mle zee zheta ngok re xaa yezh lo Ches, nu nzhé xaa:

--Ya be yo be yizhyo ba nal nel nzho mod le be gan lo re xaa nzho baa.

31 Per re xaa nzha kwaan lee xaa nzhé:

--Nyent mod dil be kwaan re yezh ba, nel ngezhra re xaa ba lo re be.

32 Ngunii nawent re xaa lo re xaa Israel lo yizhyo pa ngulabeyy re xaa, nu nzhé re xaa:

--Lee yizhyo kwaan ngwasewii nu lo, nak yizhyo kwaan nzhut myet, xaa nzho baa. Nu rese xaa yezh xaa mwii nu lo ba naro doo. 33 Nu noka ngune nu lo xgann Anac, xaa ndok doo, xaa nze lo re ben ndok. Re nu nzak xaa mod mbeso nu sbaa nyun re nu lo xaa.