Mari nu Aarón ngunii nawent Ches
12
Aarón nu Mari ngunii nawent Ches, kwent cheen me mka xaa, nel nak tub ngwnaa me yezh Cus. 2 Nu nzhé rop xaa me:¿Nap nel techose lo Ches ngunii Xaa Tubka Nak? ¿Nap ne lu nanot lo be ngunii xaa?
Nu lee Xaa Tubka Nak mbin kwaan ngunii xaa. 3 (Ches ngok tub xaa nadoora lo rese xaa dubse yizhyo.) 4 Zee lee Xaa Tubka Nak nzhé lo Ches, lo Aarón nu lo Mari:
--Te yon gu roo yoo paro nzhaal xaa kwaan na.
Zee lee yon xaa ngwa. 5 Zee lee Xaa Tubka Nak mla leen tub xkaw kwaan mzoli roo li xaa. Nu mrezh xaa Aarón nu Mari, zee lee rop xaa mbii gax lo xaa. 6 Zee lee Xaa Tubka Nak nzhé:
--Bkenzha gu kwaan ni na. Gorna yo tub xaa lo gu, xaa zaa kwent kwaan yé na lo xaa, na Xaa Tubka Nak, lu na kwaan lo xaa nu nii na lo xaa lo mkaal. 7 Nalet na sbaa kwaan Ches, xaa nak xmos na, xaa nali nabeyy yezh cheen na. 8 Snee sneepa nii na lo lee xaa, nu klar doo nii na lo xaa, nu naniit na kwaan nabix lo xaa, nu sneepa lu na lo xaa xomod nak na, Xaa Tubka Nak. ¿Chozhiin namzhebt gu ngunii nawent gu lo xmos na Ches?
9 Zee lee yalnayii cheen Xaa Tubka Nak mla tich rop xaa me; nu leeka gorzee nya xaa. 10 Nu lee xkaw mbachi roo li Xaa Tubka Nak, nu lee cho Mari mzhaal yeezh kwaan nyall cho me, nu lee xpaal me nguna rus mod yeg. Nu gorna mwii Aarón lee Mari ngulola mlen yeezh kwaan nyall baal cho me, 11 nu nzhé xaa lo Ches:
--¡ Ay xaa nabeyy na, naab na lo lu, nazhiibt lu re jwalt ne tich nu nel kwaan naxen mle nu xgab zee mle nu jwalt. 12 Nalaat lu gak me mod tub madoo ngut lextoo xnaa leezha zeraka gal mad mod kwaan ngok byog. 13 Zee lee Ches ngunaab lo Xaa Tubka Nak nu nzhé xaa:
--Naab na lo lu, Dios, sekwen lu me nal.
14 Zee lee XaaTubka Nak mkeb lo Ches:
--Chol xuz me ngchuk garlo me, ¿Che natont me gazh mbizh? Roo me naz pa mbaz re gu nu zeera nzho mod bare me lo re gu stuba.