Xaa Tubka Nak mxaal mtobex
11
Tub mbizh re xaa yezh ngunii xaa lo tub xaa nu lo stub xaa, kwent cheen kwaan kaded xaa; nu gorna mbin Xaa Tubka Naka ngunayii doo xaa. Nu mroo tub bal cheen Xaa Tubka Nak kwaan mzeek dub welt pa mbaz re xaa, nu mlux lak roo yoo pa mbaz xaa. 2 Zee le re xaa re xaa yezh mbazhe ngunaab yud lo Ches, nu lee Ches ngunaab lo Xaa Tubka Nak, zee lee bal myuyy. 3 Kwaanzee mlo le xaa zee Taberaa, nel ba mla bal cheen XaaTubka Nak lo re xaa.4 Lee re xaa zit xaa mzhaal kwaan re xaa Israel nzhekla xaa gaw xaaya, nu lee re xaa Israel mbinn stub welt, nu nzhé xaa:
--¡Cho zaa baal gaw be! 5 Nselazh be mbal kwaan ndaw be sbaasa naz Egipto, re pepino, melon, puerros, chekit, nu gaj. 6 ¡Nayeent be gaw be nebse re mana ne; nguchibla lextoo be ne be re kwaane!"
7 Nu lee mana nlu mod bizh cheen kolantr nu naya mod duur. 8 Nu lee re xaa yezh nyatoopa reta pa, nu nzoog meya lo yech o nzoog meya kwaan ke, nu nseyey meya leen yas o ndexkwaa meya yat. Mod ndaawa nak mod kwaan nke nseyt. 9 Gorna nla gop nzhal yaal paro mbaz re xaa noka nla mana.
10 Nu mbin Chesb lee re xaa yezh nzhon doo, nu kad tub xaa kwaan re sawlizh nzo roo yoo ler cheen xaa. Nu nayii doo Xaa Tubka Nak, nu noka nawent myuna lo Ches, 11 zee ngunii Ches lo XaaTubka Nak:
--¿Chozhiin nawent mle lu na, xaa nke zhiin lo lu? ¿Chozhiin namlet lu kwaan wen lo na, nu mzaa lu re xaa yezh ne kanap na? 12 ¿Che na mzan re xaa yezh ne? ¿Che lo na ngol re xaa, zee né lu lo na: "Bdeezh re xaa, modxa ngezh me mad nzho nizh", nu wee lu xaa lo yizhyo kwaan nzhé lu zaa lu lo re xey nu? 13 ¿Pa yaxi na baal za na gaw tub lanee xaa yezh ne? Nel nze re xaa lo na nu nzhon xaa nu mbezh xaa: "Zaa baal gaw nu". 14 Nayet techo na lo re xaa yezh ne, naka tub kwaan nagan doo lo na. 15 Che sbaa le lu lo na, naab na lo lu mas wen laa yet na, naab na lo lu zee nakanotra na dil kwaan re xaa ne.
16 Zee nzhé Xaa Tubka Nak lo Ches:
--Btoop chongal nzho chii re xaa nak xaa gol lo re xaa yezh Israel, xaa nlabeyy nu xaa non lo re xaa, nu yiidno lu xaa roo li na Xaa Tubka Nak , nu kwaz xaa kwaan lu. 17 Zee la na zee wdizh na kwaan lu; zee zaa na leeka Mbi Naban kwaan nkano lu lo re xaa, zee wee re gu xaa kwent cheen re xaa yezh, zee naweet techo luya. 18 Zee yé lu lo re xaa yezh: "Gok nzhul gu zee yee gaw gu baal, nel mbinn gu lo Xaa Tubka Nak nu nzhé gu: "¿Cho zaa baal gaw be! ¡Wen nzho be Egipto!" Lee Xaa Tubka Nak mbin re kwaan ngunii gu nu zaa xaa baal gaw gu. 19 Nagawt guya tub mbizhaka, nixa chop mbizh, nixa gaay mbizh, nixa chii mbizh, nu nixa tub gal mbizh, 20 sinka dubse tub mbee axta paro yilo ya chiba lextoo gu nu axta paro gak mbix lextoo gu, nel namlenont gu Xaa Tubka Nak, xaa nzo lo gu, nu ngunii gu nawent lo xaa gorna nzhé gu: "¿Chozhiin mroo be Egipto?"
21 Zee nzhé Ches:
--Re nu nak xoop gayoo mil xaabyi, ¡nu lee lu né zaa lu baal gaw re xaa, nu gaw xaa ya dubse tub mbee! 22 Nixa zyen doo ngoon, mbakxiil, nu chelee xaa gut xaa re ma, ¡per nagaat re ma gaw xaa! ¡Nixa rese mbal ma nzho leen nistoo, nagaat ma gaw xaa!
23 Zee mkeb Xaa Tubka Nak lo Ches:
--¿Napa ne lu nyent moda lo na Xaa Tubka Nak? Nal ne lu zee nel che zak re kwaan ni na o nagakta. 24 Zee ngwa Ches nu nzhé xaa re kwaan nzhé Xaa Tubka Nak lo re xaa yezh. Zee mdop chon gal chii xaa gol, xaa yezh, nu mri re xaa dub welt cho li Xaa Tubka Nak. 25 Zee mla Xaa Tubka Nak leen tub xkaw nu mdizhno xaa Ches. Nu zee mzaa xaa Mbi Naban cheen xaa lo re chon gal chii xaa gol. Nu gorna mla Mbi Naban tich re xaa nu mzelo xaa mzaa xaa kwent cheen kwaan nzhé Dios lo xaa. Nu nik stub welt nangokt kwaane.
26 Nu xchop xaa gol mlaz paro mbaz re xaa, tub xaa le Eldad nu stub xaa le Medad, nu noka rop xaa mkayaa Mbi Naban. Rop xaa ne mleyy Ches, per nangwat xaa lo Xaa Tubka Nak. Leeka paro mbaz re xaa mzaa xaa kwent kwaan nzhé Dios lo xaa.
27 Tub xaa mad ngwa lo Ches, nu nzhé xaa:
--Eldad nu Medad kazaa kwent paro mbaz be.
28 Zee mkeb Josué, xgann Nun, xaa nle yud Ches, nu nzhé xaa:
--Ches, xaa nabeyy na, nalat lu le xaaya.
29 Zee mkeb Ches:
--¿Che nzhak selos lu na? ¡Maleey rese xaa yezh cheen Xaa Tubka Nak zaa kwent kwaan nzhé xaa lo xaa, nu Xaa Tubka Nak zaa Mbi Naban cheen xaa lo re xaa! 30 Zeera mbare Ches paro mbaz re xaa kwaan re xaa gol, xaa Israel.
31 Zee lee Xaa Tubka Nak mxaal tub mbi kwaan mroo leen nistoo kwaan nyaadno mtobex, nu mla ma dub welt paro mbaz re xaa. Nu ze xaa tub mbizh yaxii xaa ma tub lad nu stub mbizh yaxii xaa ma stub lad, nu nachaa nzhi ma lo yo kan chop zhit yaa xaa nzhi ma. 32 Zee dubse zhe ntoop re xaa yezh mtobex nu dubse yaal nu dubse stub mbizh, mtoop xaa mtobex. Xaa tira nazyent ma mtoop nak chii monton ma nu mchii xaa ma dub welt paro mbaz re xaa. 33 Seetaka nzho baal xan keley xaa, zeraka yilo gas xaaya, lee yalnayii cheen Xaa Tubka Nak mla tich re xaa yezh. Nu mxaal Xaa Tubka Nak tub yalyizh kwaan nakap lo re xaa, zee ngut zyen xaa. 34 Nu mlole xaa baa Kibrot-hataavac nel baa msebyo xaa re xaa yezh xaa mzoblazh. 35 Zee lee re xaa yezh mroo Kibrot-hataava nu nya xaa ngu Hazerot nu mlaz xaa baa.