Trompet kwaan nak plat
10
Ngunii Xaa Tubka Nak lo Ches nu nzhé xaa:2 --Bdexkwaa chop kach kwaan nak plat kwaan marti, kwaan le xchinn lu zee toop lu re xaa yezh nu leeya kwezh lu zee roo re gu paro mlaz gu. 3 Gorna kwezh lu rop kach, rese xaa yezh kasa zhaal kwaan lu roo li na, paro nzhaal xaa kwaan na. 4 Per gorna kwezh tuka kach zee kasa nebse re xaa nabeyy kwaan lu, re xaa nabeyy lo re xtii Israel. 5 Lee gorna kwezh lu kach nye doo zee roo re xaa mlaz naz ta nlen mbizh. 6 Lee gorna kwezh lu kach nye doo welt rop zee roo re xaa mlaz naz ta yat; gorna kwezha gorzee lee re xaa roo. 7 Per gorna toop lu re xaa yezh kwezh lu kach per kwezh luya stub mod.
8 &Re xgann Aarón, xaa nak ngwleyy, kwezh kach: kwaane nak tub ley kwaan tira lo re dii cheen gu.
9 &Gorna roo gu ya dil gu kwaan re xaa nayii ne gu, xaa nrenal gu, kwezh gu kach, zee selazh na re gu nu zee naguta xaa re gu. Na nak Xaa Tubka Nak, xaa nak Xtios gu. 10 Lee mbizh cheen yalnix cheen gu, kwaan nak yalni kwaan nle gu xan mbee, kwezh gu kach gorna zaa gu gon kwaan nzek xaa ma lo mdo nu gorna zaa gu gon zee kwi wen gu kwaan na. Zee luu lee na selazh re gu, na nak Xaa Tubka Nak, xaa nak Xtios gu.
Re xaa Israel mroo Sinaí nu mzhin axta Parán
11 Lee liin rop, nu mbee rop zhe gal xche mbee, lee xkaw ngwas yek li Xaa Tubka Nak paro nzho kaj cheen trat, 12 nu lee re xaa Israel mroo naz wen yizhyo bizh Sinaí nu mze re xaa modxa nzhaal ze re xaa. Zee lee xkaw mlaz naz wen yizhyo bizh Parán. 13 Mroo re xaa welt yilotlaka modxa ngunabeyy Xaa Tubka Nak lo Ches. 14 Bander cheen Judá mroo yilotlaka. Naasón, xgann Aminadab, ngunabeyy lo re soldad cheen xaa. 15 Natanael, xgann Suar, ngunabeyy lo re soldad cheen dii cheen Isacar. 16 Eliab, xgann Helón, ngunabeyy lo re soldad xaa nak dii cheen Zabulón.
17 Gorna ngulo mbril li Xaa Tubka Nak, zee mroo re xaa Gersón nu re xaa Merari re xaa nzheya.
18 Zeera mroo bander cheen Ben. Elisur, xgann Sedeur, ngunabeyy lo re soldad cheen xaa. 19 Selumiel, xgann Zurisadai, ngunabeyy lo re soldad cheen dii cheen Simeón. 20 Eliasaf xgann Deuel, ngunabeyy lo re soldad cheen dii cheen Gad.
21 Zeera mroo re xaa nak dii cheen Coat, xaa nzhano re kwaan nzho leen li Xaa Tubka Nak; nu gorna nzhin xaa pa kwaz xaa, ngulola mza xaa li Xaa Tubka Nak.
22 Zeera mroo bander cheen Efraín. Elisama, xgann Amiud, ngunabeyy lo re soldad cheen xaa. 23 Gamaliel, xgann Pedasur, ngunabeyy lo re soldad dii cheen Manasés. 24 Abidán, xgann Gedeoni, ngunabeyy lo soldad xaa nak dii cheen Benjamín.
25 Nu gwluzhtlaka mroo bander cheen Dan. Ahiezer, xgann Amisadai, ngunabeyy lo re soldad cheen xaa. 26 Pagiel, xgann Ocrán, ngunabeyy lo re soldad xaa nak dii cheen Aser. 27 Ahira, xgann Enán, ngunabeyy lo re soldad xaa nak dii cheen Neftalí. 28 Snee nak mod mroo re xaa Israel gorna nzha xaa lo dil, tub nazga xaa mroo.
29 Zee nzhé Ches lo xazhap xaa Hobab, xgann Ragüel, xaa yezh Midian:
—Lee re nu roo ya yizhyo paro né Xaa Tubka Nak zaa xaa lo nu. Chaa ya re be. Wen wee nu lu, nel lee Xaa Tubka Nak myaan le wen lo re xaa Israel.
30 Lee xaa mkeb nzhé:
—Nayat na, sinka nzhekla na bare na yizhyo cheen na nu lo re sawlizh na.
31 Zee lee Ches nzhé:
—Naab na lo lu nalaat lu nu, nel lu nlabeyy wen naz wen yizhyo bizh paro ya nu. Lu gak xaa wee nu. 32 Nu chelee lu ya lu kwaan re nu, gorna kano re nu kwaan wen kwaan zaa Xaa Tubka Nak lo nu, zaa nuya lo lu.
33 Snee mroo re xaa Israel yi cheen Xaa Tubka Nak. Chon mbizh mze re xaa nu lee kaj cheen trat cheen Xaa Tubka Nak nzhaner lo re xaa dubse tub chon mbizh kwaan mze xaa, nu mkwaan xaa tub pa kwaza. 34 Leeka gorna mroo xaa paro mlaz xaa, lee xkaw cheen Xaa Tubka Nak, nzhaner lo re xaa dubse zhe.
35 Gorna lee re xaa nzhe kaj cheen trat, lee Ches mbezh:
¡Gwa, Xaa Tubka Nak!
¡Nu le zee reech re xaa nayii ne lu,
nu le zee xoon re xaa nanet kela lu!
36 Nu gorna lee kaj cheen trat mbaz, lee Ches mbezh:
¡Blaz Xaa Tubka Nak,
lo re nu nel zyen doo nak re nu xaa Israel!