Yalni cheen Paskwa
9
Ngunii Xaa Tubka Nak lo Ches naz wen yizhyo bizh Yi Sinaí, liin rop mbee yilotlaka leezha ngulo mroo re xaa Egipto, nu nzhé xaa:2 —Re xaa Israel nzhaal le yalni cheen Paskwa mer mbizh kwaan nyalzo le xaaya. 3 Le guya mzhel yizhyo chida xche mbee yilotlaka, mbizh kwaan nyalzo le guya nu mod nii ley le guya.
4 Zee nzhé Ches lo re xaa Israel zee le xaa yalni cheen Paskwa. 5 Mle xaa yalni cheen Paskwa chida xche mbee yilotlaka, mzhel yizhyo naz wen yizhyo bizh Sinaí; modxa ngunabeyy Xaa Tubka Nak Ches, sbaa mle re xaa Israel. 6 Per ngu xaa namlet yalni cheen Paskwa nel ngok beed xaa mgal xaa cho xaa ngut, nu nagarlot ngle xaa yalni cheen Paskwa mbizh zee. Nu leeka mbizh zee ngwa xaa lo Ches nu lo Aarón, 7 nu nzhé xaa:
—Re nu na beed nel mgal nu cho xaa ngut. ¿Chozhiin nyent mod zaa nu gon lo Xaa Tubka Nak tubka kwaan re stub naz xaa Israel gorna nyalzo zaa xaaya?
8 Ches mkeb nzhé:
—Kwaz gu, nal ya na lo XaaTubka Nak zee nel cho kwaan né xaa kwent cheen re gu.
9 Zee nzhé Xaa Tubka Nak lo Ches:
10 —Nii lo re xaa Israel, nu guzh lo xaa: "Gorna lee tub gu o tub re dii cheen gu na beed nel mgal xaa cho xaa ngut o nzha xaa stub yezh, nzhaal le xaa yalni cheen Paskwa lo na, Xaa Tubka Nak, 11 mzhel yizhyo chida xche mbee rop. Gaw gu yat kwaan nanyut lebadur leen nu mbakxiil nu gaw gu yix nala. 12 Nu nalaat gu nik tik ma axta stub mbizh, nu nixa nakicht gu nik tik xchit ma; nu le guya mod nak ley xchee cheen Paskwa. 13 Chelee xaa nzhul na xaa nu nanzhat xaa stub yezh zit, nu chelee xaa nalet xaa xchee cheen Paskwa, koo gu xaa yezh cheen gu. Nu tich xaa nzhob re jwalt, nel nalet xaa yalni cheen Paskwa mer gorna kwaan nzhaal zaa xaa gon lo na, Xaa Tubka Nak.
14 &Cheleeya xaa zit xaa nzho lo gu le yalni cheen Paskwa lo na, Xaa Tubka Nak, le xaaya mod naka nu mod nak ley cheena. Leeka mod nle re guya, sbaa nzhaal le xaa zit nu re xaa yezh cheen gu.
Xkaw kwaan nzoli yek li Dios
15 Mbizh kwaan ngwa li Xaa Tubka Nak, paro nzhal xaa kwaan re xaa, lee tub xkaw msaaw dubse li xaa, paro nzho kaj cheen trat. Nu dubse yaal nlu tub bal ki leen xkaw yek li xaa, mzhel yizhyo, nu axta garziil. 16 Sbaa naka tubka, zhe nsaaw xkawa lee yaal nzaaya bal. 17 Gorna lee xkaw nyas yixoob yek li Xaa Tubka Nak; gorzee lee re xaa Israel nze nya axta paro mbaz xkaw, zee mbaz re xaa Israel. 18 Gorna lee Xaa Tubka Nak nabeyy, gorzee lee re xaa Israel nze, nu gorna nabeyy Xaa Tubka Nak zee mbaz re xaa; rese mbizh gorna lee xkaw mbaz yek li Xaa Tubka Nak, zee mbaz re xaa. 19 Nu gorna lee xkaw mbaz zyen doo mbizh yek li Xaa Tubka Nak, gorzee lee re xaa Israel ngozhaw kwaan ngunabeyy Xaa Tubka Nak nu nanzet xaa. 20 Nu gorna lee xkaw mbaz lakse mbizh yek li Xaa Tubka Nak, nu mod ngunabeyy Xaa Tubka Nak mbaz xaa nu gorna ngunabeyy Xaa Tubka Nak nze xaa. 21 Gorna lee xkaw mbaz mzhel yizhyo nu axta garziil, nu lee garziil nyas xkaw, zee lee re xaa nze, o cheleeya mbaza dubse tub mbizh nu lee yal nyasa zee lee re xaa nze. 22 Per chelee xkaw kwaz chop mbizh yek li Xaa Tubka Nak, tub mbee o tub liin nu gorna leeya zheta mbaz lee re xaa Israel zheta mbaz. Nu gorna lee xkaw yas gorzee lee re xaa nze. 23 Gorna ngunabeyy Xaa Tubka Nak mbaz xaa, nu gorna ngunabeyy Xaa Tubka Nak nze xaa. Sbaa ngozhaw xaa kwaan ngunabeyy Xaa Tubka Nak lo Ches.