Mkee Aarón xni cheen bruj
8
Ngunii Xaa Tubka Nak lo Ches nu nzhé xaa:2 —Guzh lo Aarón: "Gorna yilo zob lu gazh xni yek bruj, rese zaa xni naz delant lo bruj".
3 Nu sbaa mle Aarón; mzob xaa xni zee zaaya xni naz delant lo bruj, modxa ngunabeyy Xaa Tubka Nak lo Ches. 4 Lee bruj nak nebse or nu mdexkwaa xaaya kwaan marti; xana nu yeey cheena mdexkwaa xaa kwaan marti modxa mlu Xaa Tubka Nak lo Ches, nu sbaa mdexkwaa xaaya.
Ches mle nzhul re xaa Leví
5 Ngunii Xaa Tubka Nak lo Ches nu nzhé xaa:
6 —Bloo re xaa nak dii cheen Leví lo re xaa Israel nu ble nzhul re xaa. 7 Snee nak mod kwaan gak nzhul xaa, chuun lu nis yek xaa kwaan le nzhul xaa, nu yé lu lo re xaa zee chuub xaa rese yich dub cho xaa; nu zet xaa xab xaa, zee gak nzhul xaa. 8 Zeera zaa xaa tub la ngoon yeen nu gon cheen yalgon kwaan nak arin kwaan wen doo kwaan nuch nseyt; nu zaa xaa stub la ngoon yeen zee zhe re xjwalt xaa. 9 Yé lu lo re xaa nak dii cheen Leví zee ya xaa roo li na, paro nzhaal xaa kwaan na nu toop lu rese xaa Israel. 10 Gorzee zaa lu re xaa nak dii cheen Leví lo na, Xaa Tubka Nak, zee lee re xaa Israel zhiib xaa yaa xaa yek re xaa nak dii cheen Leví. 11 Zeera lee Aarón zaa re xaa nak dii cheen Leví lo na, Xaa Tubka Nak, mod gon kwaan kun xaa lo mdo kwent cheen re xaa Israel, zee gak nzhul xaa lo xchinn na. 12 Zeera lee re xaa nak dii cheen Leví zhiib yaa yek rop ngoon yeen: tub ma teed lu zee zhe re xjwalt xaa nu lee stub ma nak gon kwaan zeek lu ma lo mdo lo na, Xaa Tubka Nak. Snee zhe re xjwalt re xaa nak dii cheen Leví. 13 Nu zo re xaa nak dii cheen Leví lo Aarón nu lo re xgann xaa, zee zaa lu xaa mod tub gon kwaan nkun lo na, Xaa Tubka Nak.
14 &Zee koo lu re xaa nak dii cheen Leví lo re xaa Israel zee gak re xaa xaa na. 15 Gorna yilo gak nzhul re xaa nak dii cheen Leví, nu yilo zaa lu xaa mod gon kwaan nkun xaa, zeera ya xaa le xaa zhiin leen li na, na paro nzhaal xaa kwaan na. 16 Nel rese xaa nak dii cheen Leví nak mod tub kwaan zelazh xaa lo na, lo rese xaa Israel kwent cheen re xaa ngol yilotlaka lo rese xaa Israel. 17 Nel xaa na nak rese xaa Israel, xaa ngol yilotlaka, re myet nu re ma; nel lee mbizh kwaan mbit na re xaa ngol yilotlaka yizhyo Egipto, zee mlo xa na re xaa ngol yilotlaka lo re gu. 18 Nu mleyy na re xaa nak dii cheen Leví xlugar rese xaa ngol yilotlaka lo re xaa Israel. 19 Na mza re xaa nak dii cheen Leví mod tub kwaan nzelazh xaa lo Aarón nu lo re xgann xaa lo re xaa Israel, zee le re xaa zhiin kwent cheen re xaa Israel leen li na, paro nzhaal na kwaan lee xaa, nu le xaa zee kwi wen re xaa Israel kwaan na. Snee zee nabiit re xaa Israel gax roo li na paro nzhaal xaa kwaan na, zee nangakt tub yalzi nawent lo re xaa Israel."
20 Ches nu Aarón nu re xaa Israel mle lo xaa nak dii cheen Leví modxa ngunabeyy Xaa Tubka Nak lo Ches. 21 Re xaa nak dii cheen Leví ngok nzhul xaa nu mzet xaa xab xaa. Zee lee Aarón mzaa re xaa mod tub gon kwaan mkun xaa lo Xaa Tubka Nak, zee mle xaa zee mzhe re xjwalt xaa zee gak nzhul xaa. 22 Zeera lee re xaa nak dii cheen Leví ngwa mle zhiin roo li Xaa Tubka Nak, lo Aarón nu lo re xgann xaa. Modxa ngunabeyy Xaa Ches, kwent cheen re xaa nak dii cheen Leví nu sbaa mle xaa kwaan re xaa.
23 Zee lee Xaa Tubka Nak ngunii lo Ches nu nzhé xaa:
24 —Lee re xaa nak dii cheen Leví, xaa nzho masra galbgaay liin, ke zhiin roo li na paro nzhaal xaa kwaan na. 25 Per gorna yo re xaa choobchii liin, laa xaa naketra xaa zhiin nu tira naketra xaa. 26 Per gwluzh nzho mod le xaa yud re wechxinn xaa lo zhiin kwaan nzho roo li na, paro nzhaal xaa kwaan na, per nakanotra xaa zhiin kwaan mkano xaa yilo. Kwaane nzhaal yé lu lo re xaa nak dii cheen Leví.