Gon kwaan zaa xaa gak nzhul li Xaa Tubka Nak
7
Gorna ngulo mdexkwaa Ches li Xaa Tubka Nak, nu mteeb xaa nseyt choya nu mle nambeyy xaa rese kwaan nzho leena. nu noka mteeb xaa nseyt cho mdo pa nzek xaa ma, nu rese kwaan nlexchinna. 2 Zee lee re xaa mle yud re xaa lo dii cheen xaa Israel, xaa nabeyy lo re xaa li xaa nu re dii cheen xaa, xaa mkee xaa le, nu mzaa xaa tub gon 3 nu mbe xaa garli Xaa Tubka Nak xoop karet kwaan nyaaw nu chiibchop la ngoon; chop xaa non lo tub karet nu tub xaa lo tub la ngoon, nu ngulaa xaaya paro nzhaal re xaa kwaan Xaa Tubka Nak. 4 Nu ngunii Xaa Tubka Nak lo Ches nu nzhé xaa:5 —Bkayaa re gon kwaan zaa re xaa nel leeya nak kwaan le xchinn leen li na paro nzhaal re xaa kwaan na. Nu zaa luya lo re dii cheen Leví, lo kad tub xaa lo re zhiin kwaan le xaa.
6 Zee lee Ches mkayaa re karet nu re ngoon kwaan ngulaa re xaa, nu mzaa xaaya lo dii cheen Leví. 7 Re xaa lo dii cheen Gersón ngulaa chop karet nu tap la ngoon kwaan le xchinn xaa lo re zhiin kwaan le xaa. 8 Re xaa lo dii cheen Merari ngulaa tap karet nu xon la ngoon kwaan le xchinn xaa lo re zhiin kwaan le xaa. Lee xaa wii loya nak Itamar, xgaan ngwleyy Aarón. 9 Per lee re xaa dii cheen Coat namzaat nik tub kwaan, nel re xaa ngolzo wee re kwaan nambeyy kwaan yenn xaa.
10 Re xaa non ngulaa gon zhe kwaan mzelo xaa mle xchinn xaa mdo nu mle nmbey xaaya nu mzhib re xaa gon lo mdo. 11 Zee ngunii Xaa Tubka Nak lo Ches nu nzhé xaa:
''Gorna zaa gu gon kwaan zelo mdo gak xchinn tub xaa nabeyy lo re dii yalzo tub mbizh, stub xaa nabeyy yalzo stub mbizh.
12 xaa kwaan mzaa gon mbizh yilotlaka nak Naasón xgann Aminadab xaa lo dii cheen Judá. 13 Gon cheen xaa ngu leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na. leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 14 nu tub kucher or kwaan nga tub gayoo chii gram kwaan nzho yaal leen; 15 tub la ngoon yeen, tub mbakxiil mach ma gox, nu tub mbakxiil yeen ma nzho tub liin ma gak gon kwaan zeek xaa ma lo mdo; 16 nu tub chib ma mach ma nak gon kwaan gak nambey mdo nu zhe re xjwalt xaa ; 17 nu gon kwaan kwi wen xaa kwaan na, nak chop la ngoon, gaay mbakxiil ma mach, gaay chib ma mach, nu gaay mbakxiil yeen ma nzho tub liin. kwaane ngok gon cheen Naasón xgann Aminadab.
18 Lee mbizh rop zee mzaa Natanael xgann Zuar gon kwaan gak cheen xaa, xaa nabeyy lo Isacar. 19 Mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 20 tub kucher kwaan nga chii gram or kwaan nzho yaal leen; 21 tub la ngoon yeen, tub mbakxiil mach ma gox, nu tub mbakxiil yeen ma nzho tub liin ma nak gon kwaan zeek xaa ma lo mdo; 22 nu tub chib mach ma gak gon kwaan gak nambeyy mdo nu zhe re xjwalt xaa ; 23 lee gon kwaan kwi wen xaa kwaan na nak, chop la ngoon, gaay mbakxiil mach ma gox, gaay chib ma mach, nu gaay mbakxiil yeen ma nzho tub liin. Kwaane ngok gon cheen Natanael xgann Zuar.
24 Lee mbizh yon, Eliab xgann Helón, xaa nabeyy lo re dii cheen Zabulón, 25 Mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen 26 tub kucher kwaan nak or kwaan nga tub gayoo chii gram, kwaan nzho yaal leen; 27 tub la ngoon yeen, tub mbakxiil mach ma gox, nu tub mbakxiil yeen ma nzho tub liin ma nak gon kwaan zeek xaa ma lo mdo; 28 nu tub chib mach ma nak gon kwaan gak nambeyy mdo nu zhe re xjwalt xaa; 29 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Eliab xgann Helón.
30 Lee mbizh dap mzaa Elisur xgann Sedeur gon cheen xaa, xaa nabeyy lo Ben, 31 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen 32 nu tub kucher kwaan nak or kwaan nga tub gayoo gram, kwaan nzho yaal leen; 33 tub la ngoon, tub mbakxiil mach ma gox, nu tub mbakxiil yeen ma nzhon tub liin ma nak gon kwaan zeek xaa ma lo mdo; 34 nu tub chib mach ma nak gon kwaan gak nambeyy mdo nu zhe re xjwalt xaa; 35 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Elisur xgann Sedeur.
36 Lee mbizh gaay, Selumiel xgann Zurisadai xaa nabeyy lo re dii cheen Simeón, 37 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 38 nu tub kucher kwaan nga chii gram or, kwaan nzho yaal leen; 39 tub la ngoon yeen, tub mbakxiil mach ma gox nu tub mbakxiil yeen ma nzho tub liin ma nak gon kwaan zeek xaa ma lo mdo; 40 nu tub chib mach ma nak gon kwaan gak nambeyy mdo nu zhe re xjwalt xaa; 41 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Selumiel xgann Zurisadai.
42 Lee mbizh xoop, lee Eliasaf xgann Deuel, xaa nabeyy lo re dii cheen Gad, 43 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 44 nu tub kucher kwaan nak or kwaan nga tub gayoo chii gram, kwaan nzho yaal leen; 45 tub la ngoon yeen, tub mbakxiil mach ma gox,nu tub mbakxiil yeen ma nzho tub liin ma nak gon kwaan zeek xaa ma lo mdo; 46 nu tub chib mach ma nak gon kwaan gak nambeyy mdo nu zhe re xjwalt xaa; 47 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Eliasaf xgann Deuel.
48 Lee mbizh gazh xaa nabeyy lo dii chee Efraín, Elisama xgann Amiud, 49 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 50 nu tub kucher kwaan nak or kwaan nga tub gayoo chii gram, kwaan nzho yaal leen; 51 tub la ngoon yeen, tub mbakxiil mach ma gox nu tub mbakxiil yeen ma nzho tub liin ma nak gon kwaan zeek xaa ma lo mdo; 52 nu tub chib mach ma nak gon kwaan gak nambeyy mdo nu zhe re xjwalt xaa; 53 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Elisama Xgann Amiud.
54 Lee mbizh xon xaa nabeyy lo dii cheen Manasés xgann Pedasur, 55 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 56 nu tub kucher kwaan nak or kwaan nga tub gayoo chii gram, kwaan nzho yaal leen; 57 tub la ngoon yeen, tub mbakxiil mach, nu tub mbakxiil ma nzho tub liin ma gak gon kwaan zeek xaa ma lo mdo; 58 tub chib mach ma nak gon kwaan gak nambey mdo nu zhe re xjwalt xaa; 59 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Gamaliel xgann Pedasur.
60 Lee mbizh yee xaa nabeyy lo dii cheen Benjamín, Abidán xgann Gedioni, 61 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 62 nu tub kucher kwaan nak or kwaan nga tub gayoo chii gram, kwaan nzho yaal leen; 63 tub la ngoon, tub mbakxiil mach ma gox, nu tub mbakxiil yeen ma nzho tub liin ma nak gon kwaan zeek xaa, 64 tub chib mach ma nak gon kwaan gak nambey ndo nu zhe re xjwalt xaa; 65 lee gon kwaan kwi wen xaa kwaan na, nak chop la ngoon yeen, gaay mbakxiil mach ma gox, gaay chib mach nu gaay mbakxiil yeen ma nzho tub liin. Kwaane ngok gon kwaan mzaa Abidán xgann Gedioni,
66 Lee mbizh chii xaa nabeyy lo dii cheen Dan, Ahiezer xgann Amisadai, 67 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 68 nu tub kucher or kwaan nga tub gayoo chii gram, kwaan nzho yaal leen; 69 tub la ngoon yeen, tub mbakxiil mach ma gox, nu tub mbakxiil yeen ma nzho tub liin ma nak gon kwaan zeek xaa ma lo mdo; 70 tub chib mach ma nak gon kwaan zhe re xjwalt xaa; 71 lee gon kwaan kwi wen xaa kwaan na, nak chop la ngoon, gaay mbakxiil mach ma gox, gaay chib mach nu gaay mbakxiil ma nzho tub liin. Kwaane ngok gon kwaan mzaa Ahiezer xgann Amisadai.
72 Lee mbizh chiibtub xaa nabeyy lo dii cheen Aser, Pagiel xgann Ocrán 73 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 74 nu tub kucher kwaan nak or kwaan nga tub gayoo chii gram, kwaan nzho yaal leen; 75 tub la ngoon, tub mbakxiil mach ma gox, nu tub mbakxiil yeen ma nzho tub liin ma nak gon kwaan zeek xaa ma lo mdo; 76 tub chib mach ma nak gon kwaan gak nambeyy mdo nu zhe re xjwalt xaa; 77 lee gon kwaan kwi wen xaa kwaan na, nak chop la ngoon, gaay mbakxiil mach, gaay chib mach nu gaay mbakxiil ma nzho tub liin. Kwaane ngok gon kwaan mzaa Pagiel xgann Ocrán.
78 Lee mbizh chiibchop, xaa nabeyy lo dii cheen Neftalí, Ahira xgann Enán, 79 mzaa xaa gon cheen xaa leen tub yann plat kwaan nga tub kil garol nu tub jar plat kwaan nga xon gayoo gram mod nchiix xaa re kwaan leen li na, leen ropa ngu gon cheen nzhobxtil kwaan wen doo kwaan nak gon cheen yalgon kwaan ngu nseyt leen; 80 nu tub kucher kwaan nak or kwaan tub gayoo chii gram, kwaan nzho yaal leen; 81 tub la ngoon yeen, tub mbakxiil mach ma gox, nu tub mbakxiil yeen ma nzho tub liin ma gak gon kwaan zeek xaa ma lo mdo; 82 tub chib mach ma nak gon kwaan gak nambeyy mdo nu zhe re xjwalt xaa; 83 lee gon kwaan kwi wen xaa kwaa na, nak chop la ngoon, gaay mbakxiil mach ma gox, gaay chib mach nu gaay mbakxiil ma nzho tub liin. Kwaane ngok gon kwaan mzaa Ahira xgann Enán
84 Kwaane ngok re gon kwaan mzaa re xaa nabeyy lo re dii cheen xaa Israel. Leezha mzelo xaa le xchinn xaa lo mdo, mbizh kwaan mle nzhul xaaya: chiibchop yann plat, chiibchop jar plat, chiibchop kucher or. 85 Kad yann nga tub kil garol, nu kad jar nga xon gayoo gram; lo rese naka galbgazh kil, mod nchiix xaa re kwaan leen li na. 86 Nu chiibchop kucher kwaan nak or kwaan nzho yaal leen, nga tub gayoo chii gram, mod nchiix xaa re kwaan leen li na; lo rese kucher kwaan nak or nga tub kil kwaan tap gayoo gram. 87 Lee re ma gak gon kwaan zeek xaa ma lo mdo nak: chiibchop la ngoon yeen; chiibchop mbakxiil mach ma gox, chiibchop mbakxiil yeen ma nzho tub liin nu chiibchop chib mach ma nak gon kwaan gak nambey mdo nu zhe re xjwalt xaa. Kad tub ma mzaa xaa ngok gon cheen yalgon. 88 Nu rese ma ngok gon kwaan kwii wen xaa kwaan na nak tub galbtap la ngoon, chongal mbakxiil mach ma gox, chongal chib mach nu chongal mbakxiil yeen ma nzho tub liin. Kwaane ngok gon kwaan mzaa xaa gorna mzelo xaa le xchinn xaa lo mdo, gorna ngulo mle nzhul xaaya.
89 Gorna nreep Ches leen li Xaa Tubka Nak, leezha nzhedizhno xaa xaa, nu nzhon xaa bi kwaan nroo tich kwaan nyaaw roo kaj cheen trat, pa nzob chop mandad kwaan le kerubin. Sbaa nzhedizh Xaa Tubka Nak kwaan Ches.